Read Batak Karo ULANGEN 32 Bible Online

ULANGEN 32 - Batak Karo bible

ULANGEN 32

¹“O, langit ras doni, begikenlah perkatanku. Dengkehkenlah kai si kubelasken.

²Pengajarenku ndabuh bagi taktak udan sehkenca i bas taneh salih jadi embun. Perkatanku ndabuh bagi udan rintik-rintik ku babo sinuan-sinuan si nguda denga bagi udan remang ku babo dukut si ertunas.

³Ateku muji gelar TUHAN, janah bangsaNa nuriken kehaganNa.

⁴ TUHAN kap pengawalndu si mbisa, serta Ia i bas kerina perbahanenNa. Dibatandu setia dingen bujur; ilakokenNa kai si mehuli dingen patut.

⁵Tapi kam la setia, la metunggung pe jadi bangsaNa, sabap kam sada bangsa si perdosa dingen dem alu tipu.

⁶Bagenda kin arusna perbahanenndu man TUHAN, o kam, bangsa si bodoh dingen la rukur? Bapandu kap Ia, si nepa kam; ibahanNa kam jadi sada bangsa.

⁷Ukurilah paksa si enggo lepas, paksa si nuria nai; suruh lah bapandu nuriken kai si jadi nai, suruh lah kalak si enggo metua nuriken kerna paksa si enggo lepas.

⁸Si Meganjangna netapken negeri si jadi bagin bangsa-bangsa; itentukenNa i ja bangsa-bangsa arus ringan. ItetapkenNa dibata si man sembahen tep-tep bangsa, [159†]

⁹tapi sinursur Jakup ipilihNa jadi sikerajangenNa.

¹⁰IdapetiNa bangsa e mampa-mampa arah gurun pasir, sada ingan si mesuni, taneh mesawang si ipaspasi angin meter. IkawaliNa ras iarak-arakNa ia kerina, bali ras pengkawaliNa anak mataNa.

¹¹Bagi rajawali ngajari anakna kabang, natang-natang anakna e i babo kabeng si ikirbangken, bage me TUHAN njagai Israel gelah ola guling.

¹²Sisada kap TUHAN mabai bangsana, la Ia perlu penampat dibata si deban.

¹³IbereNa bangsana ngkuasai uruk-uruk si meganjang, mangani buah sinuan-sinuan si turah i bas mbalmbal. Idatca tengguli i bas batu-batu; batang saitunna turah mehumur i bas taneh si erbatu-batu.

¹⁴Lembuna ras kambingna melala susuna; la lit si terulin asa biri-birina, kambingna, ras lembuna, la lit si terjilen asa gandumna ras lau anggurna.

¹⁵Bangsa TUHAN reh bayakna reh dekahna, tapi nggit ngelawan; mbur ia dingen mbestang ibahan pangan. Itadingkenna Dibata si nepa ia, itulakna si ngkelinisa si mbisa.

¹⁶Berhala-berhalana erbahanca mecimberu ate TUHAN perbahanenna si jahat erbahanca merawa ateNa.

¹⁷Ibahanna persembahen man dibata-dibata si la tuhu, dibata-dibata si mbaru si la penah itandai nini-ninina, dibata-dibata si la penah iikutken Israel. [160†]

¹⁸Ilupakenna Dibatana, si ngkelinisa si mbisa, Ia, si enggo mereken kegeluhen man bana.

¹⁹Sanga iidah TUHAN si enda, merawa Ia, e maka anak-anakNa si dilaki ras si diberu e itulakNa.

²⁰‘Lanai ateKu nampati ia,’ nina, ‘jenari Kunehen me kai si jadi bana, man bangsa si mekeng dingen la setia.

²¹Alu gana-ganana ipekekena rawangKu, alu gana-gana si palsu ipeturahna ateKu mecimberu. E maka alu sada bangsa si deban pekulah-kulah Kupekeke ka me rawana; alu sada bangsa kalak motu Kupeturah atena mecimberu. [161†]

²²RawangKu gurlah bagi api nciluk si nasa lit i doni. Gurlahna seh ku doni kalak mate erbahanca meseng palas deleng-deleng.

²³Kutamaken mara si la erkeri-kerin man bana, janah Kupanahken kerina anak panahKu man bana.

²⁴Mate me ia erkiteken kelihen ras sakit panas; mate me ia erkiteken penakit si mejin. Kusuruh rubia-rubia si merawa ngayak-ngayak ia, ras nipe si erbisa nagutisa.

²⁵Erkiteken perang melala kalak mate ampar i pasar-pasar kebiaren ngerimrim i rumah-rumah. Anak perana ras singuda-nguda mate me; subuk anak kitik bage pe tua-tua la lit si pulah.

²⁶Ulin kap min mbarenda Kukernepken ia, gelah olanai ise pe nginget ia.

²⁷Tapi la Aku ngasup ngidah musuh-musuhna ermegah ukur alu ngataken maka enggo italukenna bangsangKu, sedangken Aku nge situhuna ngeripukken bangsangKu.’

²⁸Israel e me sada bangsa si la lit pengertinna; sitik pe la ia rukur.

²⁹La iangkana ngkai maka ia italuken; la iertina kai si enggo jadi.

³⁰Engkai maka sekalak naluken seribu, dua kalak naluken sepuluh ribu? TUHAN Dibatana enggo nadingken ia, Dibatana si mbisa enggo ngendesken ia.

³¹Ieteh musuh-musuhna nge maka dibata-dibatana la ergegeh, la mbisa bagi Dibata Israel.

³²Musuh-musuhna, seri macikna ras Sodom ras Gomora, bali kap ras batang anggur si erbuahken buah si pagit dingen lit racunna,

³³bali ras lau anggur si ibahan i bas bisa nipe nari.

³⁴Iinget TUHAN kai si enggo ibahan musuh-musuhna; itimaiNa paksa si payo guna ngukum ia.

³⁵ TUHAN la banci la erbalas ras ngukum ia; paksana ia guling seh me; wari keruntuhenna enggo ndeher. [162†]

³⁶Ipulahi TUHAN me bangsaNa kenca idahna enggo keri gegehna. Mekuah ateNa man kalak si nembah man baNa, adi idahNa maka lanai lit gegehna. [163†]

³⁷Kenca bage isungkun TUHAN me bangsaNa, ‘I ja dage dibata-dibata ‘si mbisa’ penalemenndu?

³⁸Iberendu nakan ia alu tabeh-tabeh persembahenndu ras ipersembahkenndu lau anggur man inemenna. Suruh dage ia nampati kam genduari; suruh lah ia mulahi kam.

³⁹Aku, janah Aku kal kap ngenca Dibata; dibata si deban palsu kerina. Aku nge si munuh, Aku ka nge si pegeluhken, Aku nge si ngelukai, Aku ka nge si pepalemken. Janah ise pe la ngasup ngelawan kai si Kulakoken.

⁴⁰Kuangkat tanKu guna melasken sumpah alu bage tuhu Aku Dibata si nggeluh

⁴¹bage me pe Kugarut pedangKu si erndilap guna majekken keadilen. Erbalas Aku man musuh-musuhKu janah Kuukum kalak si ernembeh ate man bangKu.

⁴²Kusuruh anak panahKu ngincep darehna, janah pedangKu mangani jukut kalak si ngelawan Aku. Ise si ngimbangi Aku, sekalak pe la kupulahi; subuk si luka bage pe kalak tabanen la banci la mate.’

⁴³O, bangsa-bangsa, pujilah bangsa TUHAN sabap ise si munuhsa, iukumNa. Erbalas Ia man musuh-musuhNa, tapi ialemiNa dosa-dosa bangsaNa.” [164†]

⁴⁴Musa ras Josua anak Nun melasken ende-enden enda alu megang, gelah banci ibegi kalak Israel.

⁴⁵Kenca musa enggo dung mereken pengajaren Dibata man bangsa e,

⁴⁶nina, “Jaga gelah iikutkenndu kerina perentah-perentah si enggo kubereken man bandu sendah. Ulih-ulihilah e nurikenca man anak-anakndu, gelah alu tutus iikutkenna kerina ajaren-ajaren Dibata.

⁴⁷Kerina pengajaren enda labo si sea-sea, tapi kegeluhenndu kap e. Ikutkenlah e maka nggedang umurndu i negeri si i lepar Lau Jordan ah si nandangi iinganindu.”

⁴⁸I bas wari e ka pe nina TUHAN man Musa, [165†]

⁴⁹“To ku Deleng Abarim, i negeri Moap, petala-tala ras kuta Jeriho. Nangkihlah ku Deleng Nebo, jenari tatap lah negeri Kanaan si nandangi Kubereken man bangsa Israel.

⁵⁰I das deleng e me kam mate, bagi seninandu Harun pe mate i das Deleng Hor,

⁵¹erkiteken duana kam la erkemalangen man bangKu i lebe-lebe bangsa Israel. Tupung kam i ulu Lau Meriba, deher kuta Kades i taneh si mesawang Sin, la Aku ipehagandu i lebe-lebe bangsa e.

⁵²E maka kam terjeng natap negeri e saja ngenca i dauh-dauh nari, tapi labo ibengketindu negeri si nandangi Kubereken man bangsa Israel.”