Read Batak Karo ULANGEN 33 Bible Online

ULANGEN 33 - Batak Karo bible

ULANGEN 33

¹Enda me pasu-pasu Musa, suruh-suruhen Dibata e, si isehkenna man bangsa Israel ope denga ia mate.

² TUHAN reh i Deleng Sinai nari; Ia desken matawari si mbincar i kepultaken negeri Edom nalsali bangsaNa i Deleng Paran nari. Sepuluh ribu malekat ikut ras Ia, gara api i bas tanNa si kemuhen.

³Keleng ate TUHAN man bangsaNa, ikawaliNa sikerajangNa. E maka erjimpuh kita i lebe-lebe naheNa, janah siikutken perentah-perentahNa.

⁴Siikutken Undang-undang si ibereken Musa man banta, e me kap erta bangsanta si mehergana.

⁵ TUHAN jadi raja bangsa Israel sanga suku-suku bangsa e ras peminpin-peminpinna pulung ras-ras.

⁶Nina Musa kerna suku Ruben, “Ola ndigan pe Ruben keri mate aminna gia rayatna la nterem.”

⁷Kerna suku Juda nina, “Dengkehkenlah penderkuhna, O TUHAN, persadalah ia mulihken ras suku-suku si deban. Erperang lah guna ia, TUHAN, sampatilah ia ngelawan musuh-musuhna.”

⁸Kerna suku Lewi nina, “O, TUHAN, cidahken lah peratenndu, arah Urim ras Tumim. Arah suruh-suruhenNdu si patuh, kalak Lewi. Iujindu ia i Massa, janah teridah maka ia setia i Meriba. [166†]

⁹Icidahkenna maka patuhen ia man baNdu asangken man orang tua, senina, tah pe anak-anakna. Iikutkenna perentah-perentahNdu janah setia ia nandangi perpadanen si ibahanNdu.

¹⁰Ia me si ngajari anak-anakNdu gelah patuh man Undang-undangNdu. Ia me si nehken persembahen i babo batar-batarNdu.

¹¹TUHAN, sampatilah maka sukuna ergegehna; meriahlah ateNdu erkiteken kai si ilakokenna. Perperkenlah kerina musuh-musuhna, olanai pelepas ndigan pe keke ka.”

¹²Kerna suku Benyamin nina, “Enda me suku si ikelengi ras ikawali TUHAN, ijagaiNa ia gedang-gedang wari, Ia ringan i tengah-tengah suku e.”

¹³Kerna suku Jusup nina, “Ipasu-pasu TUHANlah tanehna alu lau udan, dingen alu lau si rehna i teruh taneh nari.

¹⁴Ipasu-pasu TUHANlah tanehna alu ulih sinuan-sinuan si mehulina, siturah i bas kerina musim bekas isalsali matawari ras bulan.

¹⁵Dem lah uruk-urukna si nuria alu buah kayu si mehuli.

¹⁶Dem lah negerina alu kasa kai si mehuli, bekas pemasu-masun TUHAN, si ngerana i bas rambah si gara e nari. Sehlah pasu-pasu enda man suku Jusup, sabap ia me nai peminpin i tengah-tengah senina-seninana.

¹⁷Gegeh Jusup desken gegeh jenggi lembu tandukna desken tanduk kelede si meliar. Tandukna e me kap kalak Manase si meribu-ribu ras kalak Eperaim si erpuluh-puluh ribu. Alu e me iegasna bangsa-bangsa janah ijulungna seh ku tampuk doni.”

¹⁸Kerna suku-suku Sebulon ras Isakar nina, “Sangaplah Sebulon i bas perbinaganna i lawit, dingen ertambah-tambah lah kebayaken Isakar i kuta.

¹⁹Iundangna bangsa-bangsa si deban ku delengna janah ipersembahkenna persembahen si metunggung i je. Idatca kebayakenna i lawit nari ras i bas kersik nari si lit i gedang-gedang tepi lawit.”

²⁰Kerna suku Gat nina, “Pujilah TUHAN, si erbahanca mbelang daerah Gat. Gat nggempangi desken sada singa ngeretapken tan ntah pe mecahken tulan takal.

²¹Ibuatna taneh si mejilena man sikerajangenna bagin sekalak peminpin iendesken man bana. Iikutkenna perentah ras undang-undang TUHAN tupung peminpin-peminpin Israel pulung ras-ras.”

²²Kerna suku Dan nina, “Dan e me kap anak singa si lompat ndarat i Basan nari.”

²³Kerna suku Naptali nina, “Naptali ngena kal ate TUHAN, dingen ialokenna pasu-pasu si mbue. Tanehna mulai i Dano Galilea nari, seh ku Selatan.”

²⁴Kerna suku Aser nina, “Aser buen ngaloken pasu-pasu asa suku-suku si deban. Ialah min si ngenana ate senina-senina, janah tanehna dem alu batang minak saitun.

²⁵Terkawallah kuta-kutana alu gerbang besi ras tembaga dingen kidekah geluhna, aman lah iakapna.”

²⁶“O, bangsa Israel, la kap lit dibata bagi Dibatandu, si erdalin i das langit alu dem kehagan si erdahin mentasi embun-embun guna nampati kam.

²⁷Dibata kap gelgel nari pertahanenndu; tanNa si paguh rasa lalap, natang-natang kam. IpelawesNa musuh-musuhndu asum kam ngasak janah isuruhNa kam engkernepkenca kerina.

²⁸Erkiteken si e maka sinursur Jakup nggeluh i bas dame nggeluh alu aman i bas negeri si dem gandum ras anggur i ja embun i langit nari ngelembapi taneh.

²⁹Tuhu senang kal iakapndu, o Israel! La lit ise pe bagi kam, sada bangsa si iselamatken TUHAN. TUHAN jine ampang-ampangndu ras pedangndu, si ngkawali kam ras mereken kemenangen man bandu. Reh me musuh-musuhndu mindo perkuah ate man bandu, janah iperjakindu me ia.”