Read Batak Karo ULANGEN 5 Bible Online

ULANGEN 5 - Batak Karo bible

ULANGEN 5

¹Ipepulung Musa kerina bangsa Israel, jenari nina man kalak e, “O bangsa Israel, begiken kerina undang-undang si kubereken man bandu i bas wari enda. Pelajarilah undang-undang e, janah jaga maka ola la iikutkenndu.

²Sanga i Deleng Sinai, ibahan TUHAN Dibatanta perpadanen

³labo ras nininta saja ngenca, tapi man banta pe si nggeluh denga genduari enda.

⁴Sanga i datas Deleng Sinai, ngerana TUHAN petala-tala ras kam i bas api nari.

⁵I bas paksa si e tedis aku kelang-kelang kam ras TUHAN nuriken kata TUHAN man bandu, erkiteken mbiar kam api e, janah la kam nggit ku das deleng e. Nina TUHAN,

⁶‘Aku kap TUHAN Dibatandu si mulahi kam i Mesir nari, sanga kam jadi budak i jah.

⁷Ola sembah dibata-dibata si deban, seakatan Aku.

⁸Ola bahan man bandu gambar-gambaren kerna kai pe si lit i langit ntah i doni, ntah pe si i bas lau i teruh doni. [27†]

⁹Ola kam nembah erjimpuh man gana-gana, erkiteken Aku kap TUHAN Dibatandu si percimberu. Kuukum kalak si rate nembeh man bangKu, seh ku kesusurenna sundut si peteluken ras si peempatken. [28†]

¹⁰Tapi Kucidahken keleng ateKu man meribu-ribu kalak si erkeleng ate man bangKu ras si ngikutken undang-undangKu.

¹¹Ola pake gelarKu ku tujun si jahat, sabap Aku, TUHAN Dibatandu, ngukum kalak si make gelarKu ku tujun si lepak. [29†]

¹²Perdiateken wari Sabat, maka ipebadiakenndu e; enda me perentahKu man bandu, Aku TUHAN Dibatandu. [30†]

¹³Enem wari banci idahikenndu dahinndu, [31†]

¹⁴tapi wari si pepituken e me wari pekesahken si iendesken man bangKu. E maka i bas wari si e, ise pe la banci erdahin, subuk kam, ntah anak-anakndu, subuk budak-budakndu ntah asuh-asuhenndu, subuk kalak tandang si ringan i negerindu. Budakndu pe arus pekesahken bali ras kam.

¹⁵Ingetlah maka kam pe nai budak nge i Mesir, janah Aku kap, TUHAN Dibatandu si mbebasken kam alu kuasa gegehku si mbelin. Em sabapna maka Aku, TUHAN Dibatandu merentahken kam mperdiateken wari Sabat.

¹⁶Hamati nandendu ras bapandu; enda me perentahKu, TUHAN Dibatandu, gelah mejuah-juah, janah cawir metua kam i bas negeri si Kubereken man bandu e. [32†]

¹⁷Ola munuh. [33†]

¹⁸Ola erlua-lua. [34†]

¹⁹Ola nangko. [35†]

²⁰Ola ise pe iadukenndu alu pengadun si la tuhu. [36†]

²¹Ola mengga atendu ndehara kalak; ola mengga atendu rumahna, tanehna, budakna, lembuna, keledena, ntah kai pe sikerajangenna.’ [37†]

²²Enda me perentah-perentah TUHAN, si iberekenNa man bandu sanga kam pulung i deleng e. Sanga Ia ngerana i bas api ras embun si mekapal nari alu sora si dem kuasa, iberekenNa perentah-perentah enda janah lanai lit perentah si deban. Kenca bage maka isuratkenNa perentah-perentah e i bas dua papan batu, e maka iberekenNa man bangku.” [38†]

²³“Sanga gara api i belang-belang deleng e, janah ibegindu sora e i bas gelap nari, reh peminpin ras pengulu-pengulu i bas tep-tep sukundu nari ndahi aku,

²⁴nina, ‘ TUHAN Dibatanta encidahken man kami kuasa kemulianNa, sanga ibegi kami Ia ngerana i bas api nari. Sendah enggo idah kami maka banci kepe kalak tetap nggeluh, amin pe Dibata enggo ngerana man bana.

²⁵Tapi man kade kami ndarami dalan mate? Api si gurlah e banci pagi ngkernepken kami. Pasti kami mate, adi ibegi kami ka TUHAN Dibatanta ngerana.

²⁶Pernah kin lit jelma nggeluh kenca ibegina Dibata ngerana i bas api nari?

²⁷To lah mulihken, Musa, begiken asa kai si ikataken TUHAN Dibatanta. Kenca bage reh ka kam ku jenda, turiken man kami kai nina man bandu, maka ibegiken kami ras ikutken kami.’

²⁸Kenca ibegi TUHAN kai nindu nina man bangku, ‘Enggo Kubegi kai si ikataken bangsa e, janah payo nge kai si ikatakenna e.

²⁹Merandal kal e adi bagelah lalap perukurenna. Merandal kal adi tetap ihamatina Aku, janah adi iikutkenna kerina perentahKu, mejuah-juah ia ras sinursurna seh asa lalap.

³⁰To, suruh ia mulih ku kemahna.

³¹Tapi kam, o Musa, tading kam lebe i jenda ras Aku, maka Kubereken man bandu kerina undang-undangKu, ras perentahKu. Ajarken lah e man bangsa e, maka iikutkenna undang-undang e i bas negeri si Kubereken man bana.’

³²Jaga dage, o bangsa Israel, maka tetap iikutkenndu kerina si enggo iperentahken TUHAN Dibatandu man bandu. Ola sada pe ilanggarndu undang-undangNa.

³³Ikutkenlah kerina maka kam mejuah-juah, maka kam tetap nggeluh i taneh si nandangi iinganindu.”