Read Batak Karo ULANGEN 6 Bible Online

ULANGEN 6 - Batak Karo bible

ULANGEN 6

¹“Enda me kerina undang-undang si iperentahken TUHAN Dibatandu man bangku, gelah kuajarken man bandu. Ikutken lah kerina undang-undang e, i bas negeri si nandangi iinganindu.

²Kidekah geluhndu, arus maka kam ras sinursurndu erkemalangen man TUHAN Dibatandu, dingen ngikutken undang-undangNa si Kubereken man bandu, gelah nggedang umurndu i bas negeri e.

³O bangsa Israel, begiken ras ikutken lah undang-undang e! Adi bage mejuah-juah ras jadi bangsa si mbelin me kam, janah ngiani taneh si mehumur e, sue ras si enggo ipadanken TUHAN Dibata nu nini-nininta.

⁴O Israel ingetlah enda! Maka TUHAN si sada e kap ngenca Dibatanta! [39†]

⁵Kelengilah TUHAN Dibatandu asa ukurndu, asa tendindu, asa gegehndu lit. [40†]

⁶Ola ndigan pe lupaken kerina perentah-perentah si kubereken sendah man bandu. [41†]

⁷Ajarkenlah e man anak-anakndu. Persingetilah rusur, subuk sanga kam i rumah, ntah sanga kam i bas perdalanen, subuk sanga kam ngadi-ngadi ntah pe sanga kam erdahin.

⁸Iketkenlah undang-undang e i bas pergelangen tanndu pakeken i bas perdempakenndu, gelah jadi persinget man bandu.

⁹Suratken e i bas binangun pintun rumahndu ras i babo pintu gerbangndu.”

¹⁰“Bagi si ipadanken TUHAN Dibatandu man nini-ninindu Abraham, Isak, ras Jakup, maka Ia mereken man bandu sada negeri rikut ras kuta-kuta si mbelin ras mehuli si labo kam majekkenca. [42†]

¹¹I bas kerina rumah e melala barang si mehuli, si la bekasndu namakenca i je; idapetindu sumur la bekasndu ngkali, ras peken anggur ras saitun la bekasndu nuan. Kenca ibaba TUHAN kam ku negeri e, janah enggo sikap kerina i je si man panganndu,

¹²jaga maka ola kam lupa TUHAN si mulahi kam i taneh Mesir nari, sanga kam jadi budak i je.

¹³Mbiarlah man TUHAN Dibatandu. Ia sajalah ngenca sembah. Erpadanlah i bas gelarNa saja. [43†]

¹⁴Ola nembah man dibata-dibata si deban, dibata-dibata kalak si tading i sekelewetndu.

¹⁵Adi isembahndu dibata-dibata si deban e, pernembeh TUHAN reh man bandu bagi api, ngkernepken kam kerina, erkiteken TUHAN Dibatandu percimberu tuhu-tuhu.

¹⁶Ola cubai TUHAN Dibatandu bagi perbahanndu sanga kam i Massa. [44†]

¹⁷Jagalah, maka tetap iikutkenndu kerina undang-undang si enggo iberekenNa man bandu.

¹⁸Dahiken lah kai si mehuli ras payo bagi si ikataken TUHAN gelah mejuah-juah kam. Alu bage ngasup kam muat taneh si mehumur e jadi sikerajangenndu, taneh si enggo ipadanken TUHAN man nini-ninindu.

¹⁹Ipelawesndu musuh-musuhndu, bagi si ipadankenNa.

²⁰I bas paksa si reh enda nungkun anak-anakndu man bandu nina, ‘Engkai maka iperentahken TUHAN Dibatanta kita ngikutken kerina undang-undang enda?’

²¹Bagendalah jabapndu, ‘Mbarenda kami budak raja Mesir. Tapi TUHAN enggo mbebasken kami alu gegehNa si mbelin.

²²Iidah kami alu mata kami jine ilakokenNa tanda kuasa ras ibahanNa kejadin-kejadin si erbahanca mbiar bangsa Mesir ras rajana, ras kerina pegawaina.

²³IbebaskenNa kami i Mesir nari guna maba kami ku jenda janah iberekenNa man kami negeri enda sue ras padanNa man nini-nininta.

²⁴Kenca bage iperentahken TUHAN Dibatanta kita ngikutken kerina undang-undang enda, janah mbiarlah man baNa. Adi bage perbahanenta Ia lalap si njagai bangsanta ras erbahanca mehuli sikerajangenta.

²⁵Adi tutus ateta ngikutken asa kai si iperentahken Dibata man banta, ngena ateNa man banta.’ ”