Read Batak Karo ULANGEN 7 Bible Online

ULANGEN 7 - Batak Karo bible

ULANGEN 7

¹“TUHAN Dibatandu maba kam ku taneh si nandangi iinganindu. IpelawesNa nterem bangsa si deban i jenari. Adi kam ngasak, ipelawesNa pitu bangsa si belinen dingen gegehen asang kam, e me: bangsa Heti, bangsa Girgasi, bangsa Amori, bangsa Kanaan, bangsa Peris, bangsa Hewi, bangsa Jebusi. [45†]

²Sanga TUHAN Dibatandu ngendesken bangsa-bangsa e ku teruh kuasandu, janah italukenndu ia, arus maka ibunuhndu ia kerina. Ola bahan perpadanen rassa, ola cidahken perkuah atendu man bana.

³Ola erjabu rassa. Anakndu pe ola bere erjabu rassa

⁴gelah ola ibabaina anak-anakndu e nilah i bas TUHAN nari jenari nembah man dibata-dibata si deban. Adi bage nembeh TUHAN man bandu, janah minter kam ikernepkenNa.

⁵Dage, runtuhken lah batar-batar ingan persembahenna, pecahken tugu sembah-sembahenna, penggelken gambar-gambar Dewi Asera dibata-dibatana, ciluk gana-ganana. [46†]

⁶Lakokenlah e, erkiteken kam kap sikerajangen TUHAN Dibatandu. IpeserapNa kam i bas kerina bangsa-bangsa i doni enda nari jadi bangsaNa khusus. [47†]

⁷Ikelengi ras ipilih TUHAN kam labo erkiteken teremen kam asang bangsa-bangsa si deban; kam kap bangsa si kitikna i doni enda.

⁸Tapi TUHAN ngkelengi kam dingen isehkenNa ateNa padan si ipadankenNa man nini-ninindu. E me sabapna maka iselamatkenNa kam alu kuasaNa si mbelin, janah ibebaskenNa kam i bas perbudaken raja Mesir nari.

⁹Ingetlah, maka TUHAN Dibatandu e ngenca Dibata janah Ia setia kap. Tetap icikepNa padanNa, janah icidahkenNa kekelengenNa si tetap man meribu-ribu kalak si ngkelengi Ia ras ngikutken undang-undangNa. [48†]

¹⁰Tapi la ralang-alang Ia ngukum kalak si ernembeh ate man baNa.

¹¹E maka genduari ikutlah kai si enggo iajarken man bandu; ikutken lah kerina undang-undang si enggo kubereken man bandu wari enda.”

¹²“Adi ibegikenndu kerina undang-undang enda, janah iikutkenndu alu tutus, TUHAN Dibatandu tetap ncikep perpadanenNa man bandu, janah icidahkenNa keleng ateNa si tetap, bagi si enggo ipadankenna man nini-ninindu. [49†]

¹³IkelengiNa ras ipasu-pasuNa kam, gelah erteremna kam, janah nterem pupusndu. Ipasu-pasuna jumandu gelah mbuah pagendu, anggurndu, minak saitundu. Ipasu-pasuna kam alu mereken mbue lembu ras biri-biri man bandu. Kerina pasu-pasu enda isehkenNa man bandu i bas negeri si enggo ipadankenNa man nini-ninindu nai maka iberekenNa man bandu.

¹⁴La lit bangsa si deban i babo doni enda si seri buena ndat pasu-pasu ras kam. La lit sada pe i bas kam nari ntah i bas asuh-asuhenndu nari si la lit anakna.

¹⁵Ipedauh TUHAN kerina penakit i bas kam nari. La ibereNa kam kena penakit si mekelek bagi si idahndu sanga i Mesir mbarenda tapi itamakenNa man musuh-musuhndu.

¹⁶Kernepken kerina bangsa-bangsa si iendesken TUHAN Dibatandu man bandu. Ola sitik pe cidahken atendu mekuah nandangi ia. Ola sembah dibata-dibatana, sabap e jadi siding man bandu.

¹⁷Ola iukurkenndu maka bangsa e belinen asang kam, ras la terpelawesndu.

¹⁸Ola mbiar man bana. Ingetlah kuga perbahanen TUHAN Dibatandu man raja Mesir ras rayatna.

¹⁹Ingetlah mara kelesa si mejin, si iidahndu alu matandu jine, tanda-tanda kuasa, ras kejadin-kejadin si mejin, ras gegeh si mbelin si ipake TUHAN Dibatandu mbebasken kam; kuga perbahanenNa man bangsa Mesir bage ka me perbahanenNa nandangi bangsa-bangsa si ibiarindu genduari e.

²⁰IsuruhNa perkis laga ku tengah-tengah kalak e, seh maka kalak si sempat denga kiam ntah cebuni pe ikernepken nge kerina.

²¹E makana ola kam mbiar man bangsa-bangsa e. TUHAN Dibatandu si ngarak-ngarak kam; Ia kap Dibata si mbisa si arus ibiari.

²²Sanga kam ngasak, sitik-sitik ipelawesNa bangsa e. Labo terkernepkenndu ia alu sekaligus, sabap adi sekaligus, maka ertambah-tambah beligan rubia-rubia si meliar, janah e kebiaren man bandu.

²³ TUHAN ngendeskenca musuh-musuhndu ku teruh kuasandu, janah iguntariNa musuh-musuhndu seh maka ia ikernepken.

²⁴IendeskenNa raja-raja ku teruh kuasandu. Ibunuhndu ia, janah minter imasapkenndu gelarna i doni enda nari. Ise pe la ngasup ngambati kam; ikernepkenndu kerina kalak.

²⁵Ciluk gana-ganana. Ola mengga atendu man pirak tah emas si lit i bas gana-gana e, janah ola buat bandu. Adi ibuatndu, kam enggo kena siding kematen, erkiteken nembeh kal ate TUHAN adi isembah dibata-dibata si deban.

²⁶Ola baba sada pe gana-gana e ku bas rumahndu. Adi ibabandu, sumpah kebilangen si man bana e, e ka pe kena man bandu. Arus maka segat ras ciga atendu gana-ganana e, erkiteken ia enggo kena sumpah TUHAN.”