Read Batak Karo ULANGEN 9 Bible Online

ULANGEN 9 - Batak Karo bible

ULANGEN 9

¹“Begiken, o bangsa Israel! Sendah ikeparindu me Lau Jordan, janah iinganindu me taneh bangsa-bangsa si belinen ras gegehen asang kam. Kuta-kutandu mbelin, erbentengken tembok si meganjang seh ku langit.

²Rayatna nggedang mbelin bali ras raksasa. Enggo ibegikenndu maka ise pe la ngasup nalukenca.

³Tapi genduari iidahndu jine kuga TUHAN Dibatandu erdalan arah lebendu bali ras api si merawa. ItalukenNa bangsa-bangsa e adi iperangindu, gelah banci ia minter ipelawes ras ikernepkenndu sue ras si enggo ipadanken TUHAN.

⁴Kenca enggo ipelawes TUHAN Dibatandu bangsa-bangsa e, ola nindu i bas ukurndu, maka ibereken TUHAN man bandu negeri enda e me perbahan kam metunggung.

⁵Labo erkiteken ulindu ras perbahanenndu benar maka ipelepas TUHAN kam muat taneh bangsa-bangsa e, tapi erkiteken bangsa-bangsa e jahat, janah ate TUHAN nehken si enggo ipadankenNa man nini-ninindu si Abraham, Isak ras Jakup.

⁶Tek lah maka labo perbahan kam metunggung maka ibere TUHAN man bandu taneh si mehumur e. Lang! Sabap kam bangsa si mekeng kap.

⁷Ola ndigan pe ilupakenndu kuga TUHAN Dibatandu nembeh i gurun pasir erkiteken perbahanenndu. Mulai kin kam nadingken Mesir seh ngayak warina kam seh i jenda, kam enggo ngelawan TUHAN.

⁸Sedangken i Deleng Sinai pe, seh kal rawana TUHAN erkiteken kam. Erkiteken nembehna ateNa menam pe ikernepkenNa kam.

⁹Lawes aku nangkih Deleng Sinai, guna ngaloken papan batu si dua, i ja isuratken perpadanen si ibahan TUHAN ras kam. Empat puluh wari empat puluh berngi aku tading i das la man ras la minem. [52†]

¹⁰Kenca bage ibereken TUHAN man bangku papan batu si dua e, i ja enggo isuratkenNa alu tanNa jine kai si enggo ikatakenNa man bandu i bas api e nari, sanga kam pulung i deleng e.

¹¹Bage me, kenca enggo lepas si empat puluh wari empat puluh berngi e, ibereken TUHAN man bangku papan batu si dua i ja enggo isuratiNa perpadanen e.

¹²Kenca bage ngerana TUHAN man bangku, ‘Pedasken susuri deleng enda, sabap enggo ceda ras jahat bangsa si enggo ibabandu ndarat i Mesir nari e.’ Enggo nimpang ia i bas perentah-perentahKu jenari ibahanna gana-gana man sembahenna.

¹³Tole nina TUHAN man bangku, ‘Kueteh maka tuhu mekeng kal bangsa enda.

¹⁴Ola iolang-olangindu Aku. Kukernepken ateKu kalak enda, gelah masap gelarna i doni nari. Jenari maka Kujadiken kam bapa sada bangsa si belinen ras gegehen asang ia.’

¹⁵Kenca bage maka nusur aku i das deleng e nari, maba dua papan batu i ja perpadanen e isuratken.

¹⁶Kuidah maka enggo ilanggarndu perentah si enggo ibereken TUHAN Dibatandu man bandu. Enggo erdosa kam man baNa, erkiteken ibahanndu gana-gana i bas bentuk anak lembu i bas logam nari man sembah-sembahenndu.

¹⁷E maka i lebe-lebendu perper kudampesken batu si dua lambar ndai.

¹⁸E maka erjimpuh aku ngadap ku lebe-lebe TUHAN sekali nari, empat puluh wari empat puluh berngi dekahna la aku man la aku minem. Kulakoken e, erkiteken enggo kam erdosa man TUHAN erbanca ia merawa.

¹⁹Mbiar aku gara pernembeh TUHAN, sabap erkiteken nembeh ateNa menam kam ikernepkenNa; tapi ibegikenNa ka aku sekali nari. [53†]

²⁰Man Harun pe merawa kal ate TUHAN. Menam pe ia ibunuhna. E maka kerna ia pe ertoto ka aku.

²¹Kubuat barang si kemali si ibahanndu e, e me kap anak lembu emas e, e maka kuambekken ku api. Kenca bage kuperperken, kugiling jadi abu, jenari kuambekken abu e ku lau si maler i das deleng nari.

²²Tole pe ibahanndu ka maka nembeh TUHAN Dibatandu sanga i Tabera, sanga i Massa, ras sanga i Kiberot Taawa. [54†]

²³Janah isuruh TUHAN kam i Kades-Barnea nari i ja iperentahkenNa kam berkat ras nciati taneh si ateNa iberekenNa man bandu, mberontak kang kam man baNa. La kam tek, dingen la kam erkemalangen man baNa. [55†]

²⁴Kidekah kam kutandai, berontak nge kam lalap man TUHAN.

²⁵E me sabapna, maka erjimpuh aku ngadap i adep-adepen TUHAN i bas si empat puluh wari empat puluh berngi e, sabap kueteh maka ugapa pe ikernepkenNa ateNa kam.

²⁶E maka ertoto aku ningku, ‘O, TUHAN si Mada Kuasa ola kal ikernepkenNdu bangsaNdu si ipulahiNdu i taneh Mesir nari alu gegeh dingen kuasaNdu si mbelin.

²⁷Ola min taktaki kuga kengna kalak enda, ola min taktaki kejahaten ras dosa kalak enda, tapi ingetlah suruh-suruhenndu Abraham, Isak ras Jakup.

²⁸Adi la bage, tentu nina kalak Mesir, maka la kap tertaruhkenNdu bangsaNdu enda ku negeri si enggo ipadankenNdu man bana. Ikataken bangsa Mesir me maka ibabaNdu bangsaNdu ku gurun pasir guna munuh ia, erkiteken nembeh ateNdu man bana.

²⁹Bangsa enda kap bangsa si enggo ipilihNdu jadi sikerajangenNdu si enggo ibabaNdu ndarat i Mesir nari alu kuasa ras gegehNdu si mbelin.’ ”