Read Batak Karo JOHANES 1 Bible Online

JOHANES 1 - Batak Karo bible

JOHANES 1

¹Ope denga ijadiken Dibata doni enda, Kata e enggo lit. Kata e ras Dibata, janah Kata e Dibata.

²Mula-mulana nari Kata e ras Dibata.

³Arah Kata e ijadiken Dibata kerina si nasa lit; la lit sada pe i bas kerina si enggo jadi e ijadiken la arah Kata e.

⁴Kata e me ulu kegeluhen, janah kegeluhen e maba terang man manusia.

⁵Terang e ersinalsal i bas gelap janah la tertaluken gelap e terang ndai.

⁶Isuruh Dibata persuruhenNa, gelarna Johanes. [1†]

⁷IA reh guna meritaken kerna terang e man manusia, gelah kerina manusia megiken dingen tek man berita e.

⁸Labo si Johanes terang e; ia reh meritaken kerna terang e.

⁹Enda me terang si tuhu-tuhu; terang e sangana reh ku doni enda nerangi kerina manusia.

¹⁰Kata e enggo i bas doni enda. Doni enda ijadiken Dibata arah IA, tapi la itandai doni enda IA.

¹¹Reh IA ndahi negeriNa jine, tapi bangsaNa e la ngaloken IA.

¹²Amin bage gia lit nge kalak si ngaloken IA dingen tek man baNa; man kalak si bage iberekenNa hak jadi anak-anak Dibata.

¹³Kalak e jadi anak-anak Dibata labo tubuh arah dareh manusia bagi biasana, ntah tubuh erkiteken sekalak dilaki, tapi Dibata kap Bapana.

¹⁴Kata e enggo jadi manusia, janah IA ringan i tengah-tengahta. Enggo idah kami kemulianNa si mbelin, e me kemulian si ibereken Dibata man baNa erkiteken IA Anak Dibata si Tonggal. Anak e encidahken lias ate ras kai si benar kerna Bapa e.

¹⁵Kerna IA me si iberitaken Johanes, asum nina, “IA me katangku asum ningku, ‘Pudin IA reh asangken aku, tapi belinen IA asa aku, sabap ope denga aku tubuh pe IA enggo lit.’ ”

¹⁶Erkiteken IA dem perkuah ate, ipasu-pasuNa kita kerina, iberekenNa man banta lias ate si la erkeri-kerin.

¹⁷Dibata mereken undang-undang arah Musa tapi lias ate ras kebenaren kerna Dibata reh arah Jesus Kristus.

¹⁸Ise pe labo pernah ngidah Dibata. Tapi Anak si Tonggal, si bali ras Dibata, dingen si rembak ras Bapa, IA me si enggo mpetandaken Dibata.

¹⁹Piga-piga kalak Jahudi si erkuasa i Jerusalem nuruh imam-imam ras suku Lewi njumpai Johanes guna nehken penungkunen, “Ise kin kam si tuhuna?”

²⁰Johanes la nggit erbual. Ngaku ia alu terus terang nina ngaloi, “Aku labo Mesias si ipadanken Dibata.”

²¹Nina ka kalak ndai, “Adi bage, ise dage kam si tuhuna? Kam kin Elia?” Erjabap Johanes, “Lang, labo aku.” Nungkun tole kalak ndai nina, “Kam kin Nabi si itimai kalak e?” Erjabap Johanes, “Lang.” [2†]

²²Nina ka kalak ndai, “Kataken dage ise kin kam si tuhuna, sabap kami arus ngelapur man si nuruh kami. Turikenlah kerna dirindu.”

²³Ngaloi Johanes alu make ayat-ayat i bas kitap Nabi Jesaya nari nina, “Aku e me, ‘Sora si erlebuh i taneh si mesawang; bahanlah dalan pinter gelah IA mentas!’ ” [3†]

²⁴Kalak si nungkun enda ndai bekas persuruhen kalak Parisi kap.

²⁵Nungkun ka ia man Johanes nina, “Adi labo kam Mesias si ipadanken Dibata ntah Elia, bage pe labo kam Nabi si itimai kami, ngkai maka kam mperidiken?”

²⁶Erjabap Johanes, “Aku mperidiken alu lau; tapi i tengah-tengahndu nari reh me Sekalak si la itandaindu.

²⁷IA reh pudin asa aku, tapi ngosari tinali sepatuNa pe aku la metunggung.”

²⁸Kerina si enda jadi i Betani, arah timur Lau Jordan. I Lau Jordan e me Johanes mperidiken kalak.

²⁹Pepagina idah Johanes reh Jesus ndahi ia. E maka nina Johanes, “Nehenlah, enda me Anak Biri-biri Dibata, si ngangkut dosa doni enda!

³⁰Kerna IA me katangku asum ningku, ‘Pudin IA reh asa aku, tapi belinen IA asa aku, sabap ope denga aku tubuh pe IA enggo lit.’

³¹Aku pe nai labo kutandai IA tapi guna mpetandaken IA man kalak Israel, reh aku mperidiken alu lau.”

³² [32-33] Tole nina Johanes, “Aku pe nai labo kueteh ise IA. Tapi Dibata si nuruh aku mperidiken alu lau, ngataken man bangku nina, ‘Adi idahndu pagi Kesah Si Badia nusur janah ringan i bas sekalak manusia, IA me si mperidiken alu Kesah Si Badia.’ Enggo kuidah Kesah Si Badia e nusur i Surga nari bagi nderapati janah ringan i bas IA.

³³

³⁴Kukataken man bandu maka IA kap Anak Dibata.”

³⁵Pepagina Johanes ras dua kalak ajar-ajarna tedis i bas inganna si biasa.

³⁶Asum idah Johanes mentas Jesus, ngerana ia nina, “Enda me anak Biri-biri Dibata.”

³⁷Megi katana e, ajar-ajar Johanes si dua kalak e lawes ngikutken Jesus.

³⁸Asum itulihken Jesus ku pudi idahNa si dua kalak e, e maka nina, “Kai daramenndu?” Erjabap kalak ndai, “O Rabbi, i ja rumahNdu?” (I bas cakap Heber, Rabbi ertina: “Guru”.)

³⁹Ngaloi Jesus, “Marilah gelah idahNdu.” Iikutken kalak e Jesus e maka enggo ietehna i ja rumah Jesus. I bas wari si ndai asa ben ia i je. (Paksa si e kira-kira jam empat karaben.)

⁴⁰Sekalak i bas si ngikutken Jesus e gelarna Andereas sembuyak Simon Petrus.

⁴¹Minter ijumpai Andereas si Simon Petrus jenari nina, “Kami enggo jumpa ras Mesias, Mesias si ipadanken Dibata.” (Mesias i bas cakap Heber bali ras Kristus i bas cakap Junani.)

⁴²Jenari itaruhkenna Simon ndahi Jesus. Ipernehen Jesus ia, jenari nina, “Kam kap si Simon anak Johanes, tapi pagi kam igelari Kepas.” (Kepas cakap Heber bali ras Petrus i bas cakap Junani; ertina: batu.)

⁴³Pepagina berkat Jesus ku Galilea. I Galilea jumpa IA ras Pilipus. Nina Jesus man bana, “Mari, ikutken Aku.” (

⁴⁴Pilipus asalna i Betsaida nari, e me kuta Andereas ras Petrus.)

⁴⁵Jenari ijumpai Pilipus si Natanael nina, “Kami enggo jumpa ras IA, si isingetken Musa i bas Kitap Undang-undang bage pe si isingetken i bas kitap nabi-nabi. Gelarna Jesus; IA anak Jusup i Nasaret nari.”

⁴⁶Tapi nina Natanael, “Banci kin si mehuli reh i Nasaret nari?” Ngaloi Pilipus, “Marilah sinehen.”

⁴⁷Asum idah Jesus reh Natanael ndahi IA, ngerana IA kerna Natanael nina, “Enda me kalak Israel si asli; la lit si palsu i bas ia!”

⁴⁸Megi si e nungkun Natanael nina, “Kuga penandaindu aku?” Erjabap Jesus, “Ope denga kam idilo Pilipus, enggo kuidah kam i teruh batang ara.”

⁴⁹Ngaloi Natanael, “O Guru, Kam kap Anak Dibata! Kam me Raja kalak Israel!”

⁵⁰Nina Jesus man bana, “Perbahan Kukataken Kuidah kam i teruh batang ara, maka kam tek man bangKu? Pagin idahndu me kejadin-kejadin si belinen asangken si enda.”

⁵¹Jenari nina Jesus man kalak e, “Idahndu me pagi talang Surga jenari nangkih-nusur malekat-malekat Dibata ndahi Anak Manusia si isuruh Dibata.” [4†]