Read Batak Karo JOHANES 10 Bible Online

JOHANES 10 - Batak Karo bible

JOHANES 10

¹Tole nina Jesus, “Kukataken man bandu: Si tuhuna kalak si bengket ku karang biri-biri la arah pintun, tapi inangkihna dingding, pinangko dingen pengerampok kap ia.

²Ise si bengket arah pintun, ia me permakan biri-biri e.

³Si erjaga i bas pintun nalangi pintun guna permakan e janah biri-biri megiken sorana. Sada-sadai igelari permakan e biri-birina janah ibabaina ndarat i bas karang nari.

⁴Kenca ndarat biri-biri e kerina, erdalan ia arah lebe. Biri-biri e ngikutken ia, sabap itandai biri-biri e sorana.

⁵Adi kalak si deban labo nggit biri-biri e ngikutkenca; kiam pe biri-biri e lawes sabap la itandaina sorana.”

⁶Ituriken Jesus perumpaman enda, tapi la iangka kalak ndai kai maksud Jesus.

⁷Jenari nina ka Jesus, “Kukataken man bandu maka Aku kap pintun guna biri-biri e.

⁸Kerina si reh leben asangken Aku pinangko dingen pengerampok, janah labo ibegiken biri-biri e ia.

⁹Aku me pintun. Ise bengket arah Aku terkelin me. Ku bas-kudarat ia, janah idatna gagaten.

¹⁰Penangko reh guna nangko, munuh dingen meneken saja. Tapi Aku reh gelah si megiken sorangKu ngaloken kegeluhen si cukup.

¹¹Aku me permakan si tuhu-tuhu. Permakan si tuhu-tuhu nggit ngasamken kesahNa guna biri-biri e kerina.

¹²Tapi kalak upahen, si labo ia permakan dingen si labo ia empuna biri-biri e, kiam nge ia nadingken biri-biri e adi idahna serigala reh. E maka irigep serigala me biri-biri e seh merap kerina.

¹³Kalak upahen e kiam sabap upahen ngenca ia labo diatena biri-biri e.

¹⁴[14-15] Aku me permakan si tuhu-tuhu. Bagi itandai Bapa Aku janah Kutandai Bapa, bage me pe Kutandai biri-biringKu e janah itandai biri-biringKu Aku. Janah nggit Aku ngasamken kesahKu guna biri-biri e. [37†]

¹⁶Lit denga biri-biringKu si deban si la bengket i bas karang enda. Si e pe arus Kubaba, janah ibegikenna nge pagi sorangKu. Kerina pagi ia jadi sada rarasen dingen sada nge permakanna.

¹⁷Keleng ate Bapa e Aku sabap nggit Aku ngendesken kesahKu, gelah Kualoken ka mulihi.

¹⁸Labo lit kalak si ngasup muat kesahKu i bas Aku nari. Aku jine nge si merekenca. Lit hakKu mereken kesahKu janah lit pe hakKu ngalokenca mulihi. Enda me si enggo itetapken BapangKu guna Kudalanken.”

¹⁹Erkiteken kata Jesus enda, turah ka perubaten i bas kalak Jahudi. Piga-piga kalak ngatakenca,

²⁰“IA enggo setanen dingen adon! Engkai maka ibegikenndu IA?”

²¹Tapi deba ngatakenca, “Kalak si setanen labo ngasup bagi IA e ngerana! Ngasup kin kalak si setanen erbahanca kalak pentang erpengidah?”

²²Asum pesta peringeten mengket Rumah Pertoton i Jerusalem, paksa perudan,

²³erdalan Jesus arah serambi Salomo i bas Rumah Pertoton e.

²⁴Pulung kalak Jahudi engkeleweti IA, jenari nina man Jesus, “Asakai nari dekahna kami kemamangen ibahanNdu? Katakenlah man kami terus terang; tuhu kin Kam Mesias si ipadanken Dibata e?”

²⁵Nina Jesus, “Enggo Kukataken man bandu tapi la kam tek. Perbahanen si Kulakoken i bas kuasa BapangKu, naksiken kerna Aku kap.

²⁶Tapi la kam tek perbahan kam la biri-biringKu.

²⁷Biri-biringKu ibegikenna nge sorangKu. Kutandai nge biri-biringKu e janah ikutkenna Aku.

²⁸Man biri-biringKu e Kubereken kegeluhen si tuhu-tuhu si la erkeri-kerin. Asa lalap ia la mate, janah ise pe la ngasup nirangken ia i bas kepkepenKu nari.

²⁹BapangKu belinen asa kai pe, janah kai si enggo iberekenNa man bangKu ise pe la ngasup muatsa i bas kepkepen BapangKu nari.

³⁰Bapa ras Aku sada kap.”

³¹Jenari ibuat kalak Jahudi e batu, atena menteri Jesus.

³²Tapi nina Jesus man bana, “Enggo melala perbahanen si mehuli Kucidahken man bandu i bas gelar Bapa. Dahin si apai kin erbahanca maka ibenterindu atendu Aku?”

³³Ngaloi kalak Jahudi e, “Labo erkiteken perbahanen si mehuli e, tapi erkiteken ipekitik Kam Dibata! Kam sekalak manusia, tapi iakukenNdu maka Kam me Dibata.” [38†]

³⁴Nina Jesus, “I bas Undang-undangndu lit tersurat maka nina Dibata, ‘Kam me dibata-dibata.’ [39†]

³⁵Sieteh maka kai si tersurat i bas Pustaka Si Badia tuhu kap. Kalak si man bana ipeseh kata Dibata, igelari Dibata kap ia: dibata-dibata.

³⁶Payo kin iakapndu Aku encekuraki Dibata erkiteken ngaku Aku maka Aku me Anak Dibata? Aku kap si ipilih Dibata dingen si isuruhNa ku doni enda.

³⁷Adi la kin dahin Dibata Kudahiken ola kam tek man bangKu.

³⁸Tapi adi dahin Dibata nge Kudalanken, la gia kam tek man bangKu, si lang-langna teklah kam nandangi kai si Kubahan e gelah ietehndu dingen ngaku kam maka Bapa e i bas Aku janah Aku i bas Bapa e.”

³⁹Sekali nari icubaken kalak ndai nangkap Jesus, tapi pulah Jesus i bas ia nari.

⁴⁰Jenari mulihken Jesus ngepari Lau Jordan ku ingan Johanes mperidiken nai; i je me IA ringan. [40†]

⁴¹Nterem kalak reh ndahi IA ku je. Nina kalak si nterem e, “Johanes nai la erbahan tanda-tanda sengget, tapi tuhu kerina si ikatakenna kerna kalak enda.”

⁴²E maka nterem kalak si i je tek man Jesus.