Read Batak Karo JOHANES 11 Bible Online

JOHANES 11 - Batak Karo bible

JOHANES 11

¹I Betani lit sekalak si penakiten, gelarna Lasarus. Ia turang si Maria ras Marta. [41†] (

²Si Maria enda me si ncurcurken minak si merim ku nahe Tuhan dingen si ngapusisa alu bukna.) [42†]

³Si Maria ras Marta erbahan berita man Jesus nina, “O Tuhan temanNdu si ikelengiNdu paksana sakit.”

⁴Kenca seh berita e man Jesus nina, “Penakit enda labo erkedungen i bas kematen; tapi penakit enda jadi gelah terpuji Dibata, janah enda me jadi sada dalan gelah terpuji Anak Dibata.”

⁵Si Marta, Maria ras Lasarus keleng kal ate Jesus.

⁶Tapi kenca ibegiNa pe berita kerna Lasarus sakit, la minter idahiNa; tapi lit dua wari nari dekahna IA i bas ingan e.

⁷Kenca si dua wari e nina man ajar-ajarNa, “Ota ku Judea kita mulihken.”

⁸Ngaloi ajar-ajarNa, “O Guru, mbaru denga pe ibenteri kalak Jahudi atena Kam; mulihken ka ateNdu ku jah?”

⁹Erjabap Jesus, “Ma sepuluh dua jam sada wari? Adi suari kalak erdalan labo ia tertuktuk, sabap idahna terang doni enda.

¹⁰Tapi adi berngi ia erdalan tertuktuk me ia, sabap la lit terang i bas ia.”

¹¹Bagenda me nina Jesus. Jenari tole nina, “Temanta Lasarus enggo tunduh, janah ateKu lawes guna ngingeti ia.”

¹²Ngaloi ajar-ajarNa, “O Tuhan, adi enggo tunduh ia, malemna me e.”

¹³Si tuhuna maksud Jesus e me Lasarus enggo mate; tapi iakap ajar-ajarNa maksud Jesus si Lasarus tunduh saja.

¹⁴E maka ikataken Jesus man ajar-ajarNa e alu terus terang, “Lasarus enggo mate.

¹⁵Tapi meriah ukurKu sabap la Aku i jah, sabap erkiteken si e banci kam tek man bangKu. Otalah si dahi ia.”

¹⁶Jenari Tomas (si igelari Kembar) ngerana man temanna sapih ajar-ajar, “Ota ku jah kita ras Guru enda, gelah mate kita kerina ras IA!”

¹⁷Kenca seh Jesus i Betani, idapetiNa enggo empat wari dekahna Lasarus ikuburken.

¹⁸I Jerusalem nari ku Betani la lit telu kilometer dauhna.

¹⁹E maka i Jerusalem nari pe nterem kalak reh ngapuli Marta ras Maria erkiteken turangna Lasarus enggo mate.

²⁰Kenca ibegi Marta maka Jesus enggo reh, ndarat ia njumpai Jesus; tapi Maria tading i rumah.

²¹Nina Marta man Jesus, “O Tuhan, bicara i jenda min ndai Kam, labo mate turangku e!

²²Tapi amin bage gia, tek nge aku maka kai pe ipindoNdu genduari man Dibata iberekenNa nge.”

²³Nina Jesus man Marta, “Nggeluh nge turangndu mulihken.”

²⁴Ngaloi Marta, “Kueteh nge maka i bas wari pendungi pagi keke nge IA i bas si mate nari.”

²⁵Nina Jesus man Marta, “Aku kap si mereken kegeluhen ras mpekeke kalak mate. Ise tek man bangKu, nggeluh me aminna gia enggo mate.

²⁶Kalak si nggeluh dingen tek man bangKu ndigan pe la mate. Tek kam katangKu e?”

²⁷Erjabap Marta, “Tek aku, Tuhan! Tek aku maka Kam Anak Dibata, Si Engkelini si ipadanken Dibata enggo reh ku doni enda.”

²⁸Kenca bage mulihken Marta ku rumah. Ikusikkenna man Maria nina, “Enggo i jenda Guru, idiloNa kam.”

²⁹Kenca ibegi Maria kai si ikataken Marta, minter tedis ia jenari lawes ia njumpai Jesus. (

³⁰Paksa si e Jesus langa seh i bas kuta. IA tetap denga i bas inganNa jumpa ras Marta ndai.)

³¹Ngidah Maria rempet tedis, iakap kalak Jahudi si reh ngapuli e, lawes ate Maria ku kuburen. E maka ikutkenna Maria lawes.

³²Kenca Maria ngidah Jesus janah kenca seh ia i bas ingan Jesus, minter ia erjimpuh i lebe-lebe Jesus, jenari nina, “O Tuhan, bicara i jenda min ndai Kam labo mate turangku e!”

³³Asum idah Jesus si Maria tangis ras kalak Jahudi si reh ras si Maria e megogo dingen ceda ateNa.

³⁴E maka isungkunNa kalak ndai nina, “I ja ia ikuburkenndu?” Erjabap kalak ndai, “Ota sinehen, Tuhan.”

³⁵Tangis Jesus.

³⁶E maka nina kalak Jahudi, “Nehenlah, seh kal tuhu ateNa kelengna si Lasarus e!”

³⁷Tapi lit ka si ngerana, “Kalak pentang ibahanNa jadi erpengidah, la kin IA ngasup erbahanca gelah ola min ndai mate si Lasarus e?”

³⁸Alu ate megogo lawes Jesus ku kuburen e; kuburen e liang si itutupi alu batu.

³⁹“Gulingken batu enda!” nina Jesus. Tapi ngaloi Marta turang si mate e, “O Tuhan, enggo mbau ia, sabap enggo empat wari ikuburken!”

⁴⁰Nina Jesus man Marta, “Ma enggo ndai Kukataken man bandu maka adi tek kam idahndu nge kuasa Dibata?”

⁴¹E maka igulingken kalak e batu ndai. Jenari ertoto Jesus man Dibata nina, “O Bapa, bujur Kukataken man baNdu sabap ibegikenNdu pemindonKu.

⁴²Kueteh nge maka katawari pe ibegikenNdu pemindonKu, tapi si enda Kukataken guna kalak si tedis i jenda, gelah tek IA maka Kam kap si nuruh Aku.”

⁴³Kenca bage, alu sora megang erlebuh Jesus nina, “O Lasarus, mari ndaratken!”

⁴⁴E maka ndarat si enggo mate e. Tanna ras nahena ibaluti alu uis mbentar, ayona ibaluti alu uis. Jenari nina Jesus man kalak si i je, “Tangtangi balutna e, jenari pelepas ia lawes.”

⁴⁵Ngidah kejadin e nterem kalak Jahudi si reh ngapuli Maria jadi tek man Jesus.

⁴⁶Tapi lit piga-piga kalak i bas ia nari mulihken ku kalak Parisi nuriken perbahanen Jesus e.

⁴⁷Erkiteken si e runggu kalak Parisi ras imam-imam si mbelin nina, “Kai nge arus sibahan? Enggo melala tanda-tanda sengget ibahanNa!

⁴⁸Adi sipelepas lalap IA erbahan si bage, nandangi kerina me kalak tek man baNa. Janah dungna reh me Pemerentah Roma ngeruntuhken Rumah Pertoton dingen ngkernepken bangsanta enda.”

⁴⁹Jenari ngerana sekalak i bas si runggu e, gelarna Kayapas; ia me Imam si Mbelin i bas tahun si ndai. Nina Kayapas, “La kap iangkandu.

⁵⁰La kin ietehndu maka ulin sekalak mate guna bangsanta asangken kerina bangsanta enda kernep?”

⁵¹Si tuhuna kai si ikatakenna enda labo i bas ukurna nari. Tapi erkiteken ia Imam si Mbelin i bas tahun si ndai, ernubuat ia maka mate me Jesus guna kalak Jahudi.

⁵²Janah labo guna kalak Jahudi saja, tapi pe gelah kerina anak-anak Dibata si merap ipersadaNa.

⁵³Mulai i bas wari si ndai nari enggo ersada arih kalak Jahudi si erkuasa guna munuh Jesus.

⁵⁴E maka lanai terang-terangen Jesus erdalan arah Judea. Lawes IA ku kuta Eperaim deherken gurun pasir; i je me IA ringan ras ajar-ajarNa.

⁵⁵Paksa si ndai lanai ndekah Wari Raya Paskah kalak Jahudi. I kuta-kuta nari nterem kalak reh ku Jerusalem guna mbersihken dirina ope denga paskah e.

⁵⁶Asum ia pulung i Rumah Pertoton, idaramina Jesus. Nungkun ia sapih-sapih ia nina, “Kuga nge pengakapndu? Ugapa pe labo IA reh ku wari Paskah e, ma bage?”

⁵⁷Imam-imam si mbelin ras kalak Parisi enggo erbahan momo maka ise metehsa i ja Jesus arus ilaporkenna gelah banci itangkap.