Read Batak Karo JOHANES 12 Bible Online

JOHANES 12 - Batak Karo bible

JOHANES 12

¹Enem wari ope Wari Raya Paskah, Jesus lawes ku Betani kuta Lasarus si enggo ipekekeNa i bas si mate nari.

²E maka kuskas Marta nikapken pangan guna ielaken man Jesus ras temue si debanna. Lasarus kundul ras Jesus.

³Kenca e reh Maria, ibabana sada botol galang minak merim si meherga. Icurcurkenna minak e ku nahe Jesus, jenari isapuina alu bukna. E maka merim kerina i bas rumah e. [43†]

⁴Jenari ngerana sekalak ajar-ajar Jesus, gelarna Judas Iskariot (si ndayaken Jesus) nina,

⁵“Engkai maka la idayaken saja minak e telu ratus duit pirak jenari duitna e ibereken man kalak musil?”

⁶Si enda ikatakenna labo erkiteken iukurina kalak musil, tapi erkiteken pinangko ia. Ia kap si njemak perduiten kalak enda janah megati ipakena duit e.

⁷Tapi nina Jesus, “Ola kam nuhsahi diberu enda! Pelepaslah ibahanna enda guna penguburenKu!

⁸Adi kalak musil lit nge pagi lalap ras kam, tapi Aku labo pagi lalap ras kam.” [44†]

⁹Nterem kalak Jahudi megi berita maka Jesus paksa si e i Betani. E maka lawes kalak Jahudi e ku jah. Kalak ndai lawes ku Betani labo erkiteken Jesus saja, tapi pe guna ngenehen Lasarus si enggo ipekeke Jesus i bas si mate nari.

¹⁰E maka imam-imam ersura-sura munuh Lasarus pe;

¹¹sabap erkiteken Lasarus enggo nterem kalak Jahudi nadingken peminpin-peminpinna janah tek ia man Jesus.

¹²Pepagina kalak si nterem si reh ku Jerusalem ngerayaken Paskah megi berita maka Jesus sangana i dalan nandangi seh ku Jerusalem.

¹³E maka itektekna lambe jenari ialo-alona Jesus. Ersurak-surak ia nina, “Pujilah Dibata! Ipasu-pasu gelah Kam si reh i bas gelar Tuhan! Ipasu-pasu gelah Raja kalak Israel!” [45†]

¹⁴Paksa e idapeti Jesus sada kelede si nguda denga. IersakNa kelede e bagi si tersurat i bas Pustaka Si Badia,

¹⁵“Ola mbiar o kuta Sion! Nehenlah reh Rajandu, iersakNa kelede nguda!” [46†]

¹⁶Paksa si e la iangka ajar-ajar Jesus kai ertina kata enda. Tapi kenca Jesus ipakuken ku kayu persilang janah kenca IA ipekeke Dibata i bas si mate nari, iinget ajar-ajar maka si tersurat enda e me kerna Jesus janah enggo pe jadi man baNa.

¹⁷Kalak si i je tupung Jesus ngelebuh Lasarus gelah ndarat i bas kuburen nari dingen mpekekesa i bas si mate nari terus ersaksi kerna kejadin e.

¹⁸Erkiteken si e me maka nterem kalak njumpai Jesus, sabap ibegina maka enggo ibahan Jesus tanda sengget si mbelin e.

¹⁹Nina kalak Parisi sapih-sapih ia, “Nehenlah, kerina usahanta sia-sia, sabap i ja pa pe nterem kalak ngikutken IA!”

²⁰I bas jelma si nterem si lawes ku Jerusalem guna ngikuti kebaktin i bas wari raya e, lit piga-piga kalak Junani.

²¹Ijumpaina Pilipus (ia i Betsaida daerah Galilea nari) jenari nina, “O, tuan mesikel kal kami jumpa ras Jesus.”

²²Idahi Pilipus si Andereas, jenari iturikenna sura-sura kalak Junani e man bana. Kenca bage duana ia lawes ngatakenca man Jesus.

²³Ngaloi Jesus man bana duana, “Genduari enggo seh paksana, Aku, Anak Manusia persuruhen Dibata ipermuliaken.

²⁴Kukataken man bandu: Si tuhuna sengkebuah page labo reh buena adi la kin isuanken dingen mate. Adi benih e isuanken dingen mate, melala me buahna.

²⁵Kalak si engkelengi geluhna si i doni enda, bene kap kegeluhenna e. Tapi kalak si nembeh atena geluhna si i bas doni enda, kegeluhen si tuhu-tuhu dingen si rasa lalap tetap jadi sikerajangenna. [47†]

²⁶Ise atena jadi persuruhenKu, ikutkennalah Aku; gelah persuruhenKu tetap ras Aku amin i japa pe Aku ringan janah persuruhenKu ipehaga BapangKu.”

²⁷Jenari nina Jesus, “Genduari ceda kal ateKu. Kuga ndia ningKu? Kukataken ndia pagi, ‘O Bapa, pedauh min paksa kiniseran enda i bas Aku nari?’ Lang, sabap guna si e kap Aku reh, gelah Kunanami kiniseran e.

²⁸O Bapa ipermuliakenlah gelarNdu!” Jenari terbegi sora i langit nari Nina, “Enggo Kupermuliaken IA, janah tetap denga Kupermuliaken.”

²⁹Megi sora e nina kalak si nterem si tedis i je, “Sora lenggur kap e.” Tapi deba nina, “Labo! Malekat nge ngerana man baNa!”

³⁰Tapi nina Jesus man kalak si nterem si megi sora e, “Labo man gunangKu maka reh sora e, tapi man gunandu.

³¹Genduari me paksana doni enda iadili. Genduari italuken me si Penguasa doni enda.

³²Kenca Aku ipeganjangken i doni nari, Kurintak me kerina manusia man bangKu.” (

³³Alu kataNa enda me iturikenNa kerna kematen si nandangi inanamiNa.)

³⁴Jenari ngaloi kalak si nterem, “Rikutken Undang-undang kami, Mesias si ipadanken Dibata e nggeluh me rasa lalap. Engkai maka ikatakenNdu si reh i bas Dibata nari e ipeganjangken i doni nari? Ise kin Anak Manusia si reh i bas Dibata nari e?” [48†]

³⁵Erjabap Jesus, “Kentisik nari ngenca terang e ringan i tengah-tengahndu. Teruskenlah perdalanenndu asum terang e lit denga i tengah-tengahndu, gelah ola kam ikuasai si gelap; sabap kalak si erdalan i bas gelap, la ietehna ku ja ia lawes.

³⁶Dage teklah kam man terang e, asum terang e ras kam denga, gelah kam jadi kalak si nggeluh i bas terang.” Kenca ikataken Jesus si e, lawes IA cebuni gelah la idah kalak si nterem.

³⁷Aminna gia enggo melala tanda sengget ibahan Jesus i lebe-lebe kalak si nterem e, labo ia tek man Jesus.

³⁸Alu bage enggo seh nubuat Nabi Jesaya nina, “O Tuhan ise nge tek nandangi berita si ipeseh kami? Janah man ise kin enggo tangkas kuasa Tuhan?” [49†]

³⁹Kalak ndai la ngasup tek sabap enggo pe ikataken Nabi Jesaya,

⁴⁰“Enggo pentang ibahan Dibata matana, bage pe enggo ipemersik Dibata ukurna; gelah matana la erpengidah, janah ukurna la erpengangka. Gelah ola ia mulihken man bangKu janah gelah ola Kualemi dosa-dosana nina Dibata.” [50†]

⁴¹Si enda nai ikataken Nabi Jesaya erkiteken enggo idahna kemulian Jesus si mbelin janah erkiteken si e maka ia ernubuat kerna Jesus.

⁴²Amin bage gia nterem nge kalak Jahudi si erkuasa tek man Jesus. Tapi erkiteken mbiar ia ipedarat kalak Parisi i bas Rumah Pertoton nari la ia terang-terangen encakapken kinitekenna.

⁴³Ngenan atena pujin i bas manusia nari asangken pujin i bas Dibata nari.

⁴⁴Jenari nina Jesus alu sora megang, “Ise tek man bangKu, labo man bangKu saja ia tek tapi man si nuruh Aku.

⁴⁵Ise ngidah Aku, idahna pe si nuruh Aku.

⁴⁶Aku reh ku doni enda bali ras terang, gelah kalak si tek man bangKu la tading i bas gelap.

⁴⁷Kalak si megi pengajarenKu tapi la ikutkenna, labo Aku ngukumsa. Aku reh labo guna ngukum doni enda, tapi guna mulahisa i bas ukumen nari.

⁴⁸Kalak si nulak Aku dingen la ngaloken pengajarenKu lit nge pagi si ngukum ia. Kata si enggo Kupeseh e pagi ngukum ia i bas wari pendungi!

⁴⁹Aku ngerana labo bagi ate-ateKu saja, tapi Bapa nge si nuruh Aku, janah IA ngaturken kai arus Kukataken ras Kuturiken.

⁵⁰Janah Kueteh maka perentahna e mereken kegeluhen si tuhu-tuhu si la erkeri-kerin. E maka Kupeseh kai si iajarken Bapa man Bangku.”