Read Batak Karo JOHANES 15 Bible Online

JOHANES 15 - Batak Karo bible

JOHANES 15

¹“Aku kap batang anggur si tuhu-tuhu, janah BapangKu kap perkebun anggur e.

²Dahan-dahan si la erbuah itektekNa, janah dahan-dahan si erbuah ibersihkenNa alu mutiki tunas-tunas si la erguna gelah reh buena buahna.

³Kam enggo ibersihken alu kata si Kukataken man bandu.

⁴Tetaplah min kam i bas Aku, janah Aku pe tetap i bas kam. Dahan labo ngasup erbuah adi la kin ersada dahan e ras batangna. Bage me pe kam, adi la kin kam ersada ras Aku labo kam erbuah.

⁵Aku kap batang anggur janah kam me dahan-dahanna. Kalak si tetap i bas Aku dingen Aku i bas ia melala me buahna; sabap adi la kin ras Aku labo kam ngasup erbahan kai pe.

⁶Kalak si la tetap i bas Aku itektek me bagi dahan. Jenari kerah me ia. Ipepulung me dahan e jenari iambekken ku bas api.

⁷Adi kam tetap i bas Aku janah KatangKu tetap nggeluh i bas kam, banci ipindondu kai pe atendu, janah ialokenndu me kai si ipindondu e.

⁸Adi melala buahndu, kam me ajar-ajarKu, janah i bas si e ermulia me BapangKu.

⁹Kam Kukelengi bali ras Bapa engkelengi Aku; tetap min kam i bas kekelengenKu e.

¹⁰Adi ikutkenndu pedah-pedahKu, tetap nge kam Kukelengi, bali ras Aku ngikutken pedah-pedah BapangKu, janah tetap Aku ikelengiNa.”

¹¹“Si enda Kukataken man bandu gelah inanamindu keriahenKu janah gelah tuhu-tuhu kal meriah ukurndu.

¹²Enda me pedahKu: Sikeleng-kelengen min kam bagi Aku engkelengi kam. [57†]

¹³Labo lit keleng ate si belinen asangken keleng ate kalak si nggit ngasamken kesahna guna teman-temanna.

¹⁴Kam teman-temanKu adi idalankenndu kai si Kupedahken man bandu.

¹⁵Lanai bo kam Kugelari juak-juak, sabap sekalak juak-juak labo ietehna kai si ibahan tuanna. Tapi Kugelari kam teman-temanKu sabap man bandu enggo Kupeseh kerina si enggo Kubegi i bas BapangKu nari.

¹⁶Labo kam si milih Aku. Tapi Aku nge milih kam janah nuruh kam lawes gelah erbuah meramis, e me buah si tahan rasa lalap. Adi bage, kai pe ipindondu i bas gelarKu ibereken Bapa e nge man bandu.

¹⁷Dage pedahKu man bandu: Sikeleng-kelengenlah kam.”

¹⁸“Adi nembeh ate doni enda man bandu, ingetlah maka enggo leben nembeh atena man bangKu.

¹⁹Adi nggit kam jadi sikerajangen doni, ikelengi doni enda nge kam bagi anak-anakna. Tapi kam enggo Kupilih i bas doni enda nari, e maka genduari lanai kam sikerajangen doni. Perbahan si enda me maka nembeh ate doni enda man bandu.

²⁰Ingetlah kai si enggo Kukataken man bandu, ‘La lit juak-juak belinen asangken tuanna.’ Adi ibahan kalak Aku ngenanami kiniseran, kam pe ibahan kalak me ngenanami kiniseran. Adi ikutkenna katangKu, katandu pe ikutkenna me. [58†]

²¹Kerina pagi si enda ibahanna man bandu erkiteken kam sikerajangenKu; bage pe erkiteken la itandaina si Nuruh Aku.

²²Bicara la Aku reh, janah la Aku pernah ngerana man bana, labo min ndai ia banci isalahken. Tapi genduari lanai lit perdalihenna kerna dosana e.

²³Kalak si nembeh atena man bangKu, nembeh pe atena man BapangKu.

²⁴Bicara la Kubahan tanda-tanda sengget si mbelin i lebe-lebena, labo min ndai ia ndabuh ku bas dosa; tapi genduari enggo idahna perbahanenKu, si langa pernah ibahan kalak, janah elem-elem ia man bangKu ras man BapangKu.

²⁵Alu bage enggo seh kai si tersurat i bas kitap Undang-undangna, ‘Elem-elem ia man bangKu la lit dalanna.’ [59†]

²⁶Kusuruh pagi Penampat si reh i bas Bapa nari ndahi kam. IA kap Kesah si ncidahken kebenaren Dibata. Adi enggo pagi IA reh, IA kap si ersaksi kerna Aku.

²⁷Kam pe arus ngerana kerna Aku, sabap tangtangna nari kam ras Aku.”