Read Batak Karo JOHANES 19 Bible Online

JOHANES 19 - Batak Karo bible

JOHANES 19

¹Kenca bage isuruh Pilatus perajurit-perajuritna ngeligas Jesus.

²Ibahan perajurit-perajurit tengkuluk duri jenari itamakenna ku takal Jesus. Kenca bage ipakekenna man Jesus jubah si megara tua.

³Ideherina Jesus jenari nina, “Tabi, o Raja kalak Jahudi!” Kenca bage iparapna Jesus.

⁴Ndarat ka Pilatus sekali nari, jenari nina man kalak si nterem e, “Nehenlah, kubaba me IA ndarat ku lebe-lebendu gelah idahndu maka la lit kudat salahNa guna ngukum IA.”

⁵E maka ndarat me Jesus si enggo make tengkuluk duri ras jubah si megara tua e. Nina Pilatus man kalak si nterem e, “Nehenlah! Enda me IA!”

⁶Ngidah Jesus enggo ndarat nina imam-imam si mbelin ras pengawal-pengawal alu sora megang, “Pakukenlah IA ku kayu persilang! Pakukenlah IA ku kayu persilang!” Nina Pilatus man kalak e, “Babalah IA, janah kamlah makuken IA ku kayu persilang. Aku, la lit kudat salahna guna ngukum IA.”

⁷Ngaloi kalak Jahudi e, “Rikutken Undang-undang agama kami IA arus iukum mate, sabap iakukenNa maka IA Anak Dibata.”

⁸Megi kata e reh biarna Pilatus.

⁹Mulihken Pilatus ku bas istana jenari nungkun ia man Jesus nina, “I ja nari kin Kam?” Tapi la ngaloi Jesus.

¹⁰E maka nina Pilatus man baNa, “La kam nggit ngaloi aku? Ingetlah! Lit kap kuasangku mulahi Kam janah lit pe kuasangku makuken Kam ku kayu persilang!”

¹¹Ngaloi Jesus, “Labo lit kuasandu nandangi Aku adi la kin ibereken Dibata man bandu. E maka belinen nge dosa kalak si ngendesken Aku man bandu asangken dosandu!”

¹²Megi kata Jesus e, idarami Pilatus dalan guna mulahi Jesus. Tapi ngerana kalak Jahudi alu sora si megang nina, “Adi ipulahindu IA, e tandana kam la erteman ras pemerentah Roma! Kalak si ngakuken dirina raja, musuh pemerentah kap.”

¹³Megi kata enda, ibaba Pilatus me Jesus ndarat, jenari kundul IA i bas kursi pengadilen i bas ingan si igelari Kesain Batu (I bas cakap Heber igelari: Gabbata.)

¹⁴Matawari nandangi ciger. Karaben i bas wari si e ibenaken me Wari Raya Paskah. Nina Pilatus man kalak Jahudi e, “Enda me Rajandu!”

¹⁵Ngaloi kalak si nterem alu sora si megang, “Bunuhlah IA! Bunuhlah IA! Pakukenlah IA ku kayu persilang!” Nungkun Pilatus, “Atendu kin gelah kupakuken Rajandu enda ku kayu persilang?” Erjabap imam-imam si mbelin, “Raja Roma ngenca raja kami.”

¹⁶Kenca bage iendesken Pilatus me Jesus man kalak e guna ipakuken ku kayu persilang. E maka ibaba kalak ndai me Jesus.

¹⁷Ndarat Jesus, ipersanNa kayu persilang inganNa ipakuken. Erdalan IA ku ingan si igelari Ingan Takal-takal. (I bas cakap Heber igelari Golgota.)

¹⁸I je me Jesus ipakuken kalak ndai ku kayu persilang. Ipakukenna pe dua kalak penjahat, sekalak arah kawes Jesus, sekalak nari arah kemuhenNa.

¹⁹Isuratken Pilatus sada keterangen kerna salah Jesus e me, “Jesus kalak Nasaret, Raja kalak Jahudi”, jenari ileketkenna i kayu persilang arah babo takal Jesus.

²⁰Nterem kalak Jahudi ngogesa, sabap ingan Jesus ipakuken e la ndauh i kuta nari. Keterangen ndai isuratken i bas cakap Heber, Latin bage pe i bas cakap Junani.

²¹Nina Imam si Mbelin kalak Jahudi man Pilatus, “Ola suratken: Raja kalak Jahudi, tapi suratkenlah, ‘Nina kalak enda: Aku kap Raja kalak Jahudi.’ ”

²²Tapi ngaloi Pilatus, “Kai si enggo kusuratken e, lanai banci isambari!”

²³Kenca Jesus ipakuken perajurit-perajurit e, ibuatna uis Jesus jenari ibagi empatkenna, tersada bagin ia sekalak. Ibuatna pe jubah Jesus, jubah e i datas nari seh ku teruh la lit penjarumenna.

²⁴Nina perajurit e sapih-sapih ia, “Jubah enda ola sicaingken. Sitikam tandukken sajalah guna nentuken man ise jubah enda.” Si enda jadi gelah seh si tersurat i bas Pustaka Si Badia, “Ibagi-bagikenna uisKu, janah itikam tandukkenna jubahKu.” Enda me si ibahan perajurit-perajurit e. [64†]

²⁵Deherken kayu persilang Jesus, tedis nandeNa, senina nandeNa, Maria ndehara Kleopas ras Maria Magdalena.

²⁶Idah Jesus nandeNa tedis i je ras ajar-ajar si ikelengiNa, e maka Nina man nandeNa, “O nande, ena me anakndu.”

²⁷Jenari nina Jesus man ajar-ajar si ikelengiNa e, “Ena me nandendu.” E maka mulai paksa si ndai ibaba ajar-ajar e nande Jesus ringan i bas rumahna.

²⁸Kenca bage ieteh Jesus maka enggo dung kerina dahinNa. Janah gelah seh bagi si tersurat i bas Pustaka Si Badia nina Jesus, “Muas Aku.” [65†]

²⁹I bas ingan ndai lit sada tambe dem anggur si macem. Icelupken kalak ndai bunga karang ku bas anggur e, jenari icucukkenna ku batang isop, kenca bage idudurkenna ku biber Jesus.

³⁰Icepcep Jesus anggur e, jenari nina, “Enggo dung!” Jenari mungkuk takalNa, mate IA.

³¹Asum Jesus ipakuken e, e me wari Jumat, wari persikapen guna wari Sabat kalak Jahudi. Kalak Jahudi ersura-sura gelah mait kalak si ipakuken e olanai min gantung i kayu persilang, sabap wari Sabat si pepagina, e me wari Sabat si Mbelin. E maka ipindoken kalak Jahudi man Pilatus gelah banci min ipenggelkenna nahe kalak si ipakuken e dingen ipesusurna maitna e i kayu persilang nari.

³²E maka ipenggelken perajurit-perajurit nahe kalak si pemena ras si peduaken si ipakuken raduken Jesus e.

³³Tapi kenca ia seh ku Jesus nahe Jesus la ipenggelkenna sabap Jesus enggo mate.

³⁴E maka sekalak perajurit nebak awak Jesus alu lembingna; ndarat dareh ras lau i bas nari. (

³⁵Kalak si ngidah kejadin enda jine nge meritaken kejadin enda, gelah kam pe tek. Kai si iberitakenna e tuhu kap, janah ietehna maka kai si ikatakenna e tuhu-tuhu nge jadi.)

³⁶Si enda jadi gelah seh si tersurat i bas Pustaka Si Badia, e me “Sada pe labo ipenggelken tulanNa.” [66†]

³⁷Lit pe tersurat i bas Pustaka Si Badia, “Ipernehen kalak si nebak e me Kalak si enggo itebakna.” [67†]

³⁸Kenca bage ipindoken Jusup kalak Arimatea man Pilatus gelah banci min ibuatna mait Jesus. (Si Jusup, e me kalak si enggo tek man Jesus, tapi la terang-terangen sabap mbiar ia kalak Jahudi si erkuasa.) Pemindon Jusup enda ibere Pilatus, e maka lawes Jusup ngelegi mait Jesus.

³⁹Nikodemus si gelgel e pernah reh ndahi Jesus berngi-berngi, ikut pe ngelegi mait Jesus e. Ibabana kira-kira telu puluh kilo minak mur si isinggur ras minak gaharu. [68†]

⁴⁰Duana kalak enda muat mait Jesus, jenari ibalutina alu kain putih janah itamakenna pe rempah-rempah rikutken adat penguburen kalak Jahudi.

⁴¹Deherken ingan Jesus ipakuken e, lit sada peken. I bas peken e lit sada kuburen si mbaru, si langa pernah itamaken ku bas kalak mate.

⁴²Erkiteken wari si ndai e me wari persikapen guna wari Sabat kalak Jahudi, janah kuburen e pe ndeher ka, e maka i je me ikuburken kalak ndai Jesus.