Read Batak Karo JOHANES 2 Bible Online

JOHANES 2 - Batak Karo bible

JOHANES 2

¹Dua wari kenca si e lit kerja erdemu-bayu i kuta Kana i daerah Galilea. Nande Jesus ikut i bas kerja e.

²Jesus pe ras ajar-ajarNa iundang ku kerja e.

³Asum enggo keri lau anggur nina nande Jesus man Jesus, “Enggo keri lau anggur kalak si erkerja enda.”

⁴Ngaloi Jesus, “O nande, labo man aturenkenndu kai si man bahanenKu. PaksangKu langa seh.”

⁵Tapi nina nande Jesus man serayan e, “Ikutken kai si ikatakenNa.”

⁶I je lit isikapken enem tambe guna keperlun erburih rikutken adat Jahudi. Isi tep-tep tambe lit kira-kira 100 liter.

⁷Nina Jesus man serayan e, “Isi tambe e alu lau seh dem.” E maka idemi kalak ndai tambe e.

⁸Jenari nina Jesus man kalak e, “Genduari jaruk lau e sitik jenari baba man sukut i bas kerja enda.”

⁹E maka ibaba kalak ndai lau e man sukut kerja e, jenari inanamina lau si enggo salih jadi anggur e. (La ietehna i ja nari rehna; tapi serayan si njaruksa metehsa.) E maka idilo sukut e si empo,

¹⁰jenari nina man bana, “Biasana anggur si mehulina nge lebe ielaken kalak, janah kenca puas temue e minem, ielaken anggur si biasa. Tapi kam seh asa genduari lit i bas kam anggur si mehulina!”

¹¹Enda me tanda sengget si pemena ibahan Jesus i kuta Kana i daerah Galilea. IcidahkenNa kuasaNa si mbelin e maka ajar-ajarNa tek man baNa.

¹²Kenca bage lawes Jesus ras nandeNa, sembuyak-sembuyakNa bage pe ajar-ajarNa ku Kapernaum, janah i je me ia kerina ringan piga-piga wari dekahna. [5†]

¹³Kenca Wari Raya Paskah kalak Jahudi enggo ndeher, lawes Jesus ku Jerusalem. [6†]

¹⁴I bas Rumah Pertoton idapetiNa kalak erbinaga lembu, biri-biri ras nderapati. Lit pe i je kalak kundul si dahinna nukari duit.

¹⁵Jesus erbahan cambuk si idandan i bas nali nari. Alu e iligasiNa gelah ndarat asuh-asuhen e kerina i bas Rumah Peroton nari: subuk lembu, biri-biri. ItunggalingkenNa meja-meja kalak si nukari duit, seh maka merap duitna e kerina.

¹⁶Man kalak si erbinaga nderapati nina Jesus, “Angkat ndarat barang-barangndu e! Ola bahan rumah BapangKu jadi ingan erbinaga!”

¹⁷Perbahan si e inget ajar-ajar maka lit tersurat i bas Pustaka Si Badia, “O Dibata, keleng-ateKu nandangi rumahNdu, ngutkut desken api.” [7†]

¹⁸Jenari kalak Jahudi si erkuasa ngelawan Jesus nina, “Tanda sengget kai banci ibahanNdu guna nuduhken man kami maka lit hakNdu erbahan si enda kerina?”

¹⁹Erjabap Jesus, “Runtuhkenlah rumah Dibata enda, maka i bas telu wari Kupajekken ka mulihi.” [8†]

²⁰Ngaloi kalak e, “IpajekkenNdu ateNdu mulihi i bas telu wari? La mungkin, sabap empat puluh enem tahun nai dekahna majekken Rumah Dibata enda!”

²¹Tapi Rumah Dibata si ikataken Jesus, e me kulaNa.

²²E maka kenca Jesus nggeluh mulihi, iinget ajar-ajar kai si ikatakenNa enda; janah tek ajar-ajar e kai si isuratken i bas Pustaka Si Badia bage pe kai si enggo ikataken Jesus.

²³Paksa Jesus i Jerusalem denga tupung Wari Raya Paskah, nterem kalak tek man baNa erkiteken tanda-tanda sengget si ibahanNa.

²⁴Tapi Jesus la tek nandangi kalak e, sabap kerina manusia tangkas itandai Jesus.

²⁵Labo perlu kalak nuriken kerna manusia man Jesus sabap ieteh Jesus nge kai si lit i bas pusuh manusia.