Read Batak Karo JOHANES 20 Bible Online

JOHANES 20 - Batak Karo bible

JOHANES 20

¹Erpagi-pagi si lampas i bas wari Minggu e asum gelap denga, lawes Maria Magdalena ku kuburen. Kenca seh i kuburen idahna pintu kuburen e enggo talang.

²E maka kiam ia mulihken: ijumpaina Simon Petrus ras sekalak ajar-ajar si deban, ajar-ajar si ikelengi Jesus. Nina Maria Magdalena, “Enggo ibuat kalak Tuhan i bas kubur nari janah la ieteh kami ku ja ibabana!”

³E maka minter berkat Petrus ras temanna e ku kuburen.

⁴Kiam ia duana, tapi pedasen teman Petrus ndai seh ku kuburen.

⁵Itungkirna ku bas kuburen e janah idahna i je ampar gulungen kain putih e, tapi la ia bengket ku bas.

⁶Jenari reh Simon Petrus, terus ia bengket ku bas. Idah Simon Petrus kain putih e,

⁷janah idahna pe ampar uis si ibalutken ku takal Jesus. Uis e igulung serap i bas kain putih e nari.

⁸Jenari bengket pe teman Petrus si leben seh ndai. Kenca idahna tek ia. (

⁹Tapi amin bage gia, langa denga iangka kalak enda si tersurat i bas Pustaka Si Badia maka Jesus la banci lang keke i bas si mate nari.)

¹⁰Kenca bage mulihken ajar-ajar ku rumah.

¹¹Maria Magdalena tedis deherken kuburen e. Janahna tangis itungkirna ku bas.

¹²I bas kubur e idahna dua kalak malekat, uisna mbentar. Malekat e kundul i bas ingan bekas mait Jesus cibal, sekalak arah ingan takalNa, sekalak nari arah ingan naheNa.

¹³Jenari nungkun malekat-malekat e man Maria nina, “O bibi, ngkai maka kam tangis?” Erjabap Maria Magdalena, “Enggo ibuat kalak Tuhanku, janah la kueteh ku ja ibabana!”

¹⁴Kenca ikatakenna si enda, itulihkenna ku pudi, idahna Jesus tedis i je; tapi la ietehna maka Jesus kap si tedis e.

¹⁵Nina Jesus man bana, “O bibi, ngkai maka kam tangis? Ise kin daramenndu?” Maria Magdalena erpengakap maka temanna ngerana e si njagai peken, e maka nina, “O tuan, adi kam kin muat Tuhanku e, katakenlah i ja IA ibahanndu gelah kulegi ku je.”

¹⁶Nina Jesus, “O, Maria!” Ipernehen Maria Magdalena me Jesus, jenari ngaloi ia i bas cakap Heber, “Rabuni!” (Ertina, “Guru!”)

¹⁷Nina Jesus man bana, “Ola cikep Aku, sabap Aku langa ndahi BapangKu. Laweslah, jumpai senina-seninangKu janah kataken man bana, maka ningKu: Aku lawes ndahi BapangKu dingen Bapandu, ndahi DibataKu dingen Dibatandu.”

¹⁸E maka lawes Maria Magdalena njumpai ajar-ajar Jesus. Ikatakenna maka ia enggo jumpa ras Tuhan janah iturikenna pe kai si isuruh Tuhan ndai.

¹⁹Karaben i bas wari Minggu ndai, pulung ajar-ajar Jesus i bas sada ingan. Perbahan mbiar ia kalak Jahudi si erkuasa e maka ierukna pintun. Jenari bengket me Jesus, tedis IA i lebe-lebe ajar-ajar e. Nina Jesus, “Mejuah-juah.”

²⁰Jenari icidahken Jesus tanNa ras awakNa man ajar-ajar e, e maka meriah kal ukur ajar-ajar ngidah Tuhan.

²¹Nina ka Jesus man ajar-ajar, “Tetapkenlah ukurndu. Bagi Aku isuruh Bapa, bage me pe kam Kusuruh.”

²²Kenca bage isempulken Jesus KesahNa man ajar-ajar e, jenari nina, “Alokenlah Kesah Si Badia.

²³Adi ialemindu dosa kalak, dosana enggo ialemi; adi ipelepasndu dosana i bas ia, dosana e enggo tetap i bas ia.” [69†]

²⁴Sekalak i bas ajar-ajar si sepuluh dua e gelarna si Tomas (igelari pe si Kembar). Sanga Jesus encidahken diriNa man ajar-ajarNa, Tomas la ikut i je.

²⁵E maka erberita ajar-ajar e man Tomas nina, “Kami enggo jumpa ras Tuhan!” Ngaloi Tomas, “Adi la kin kuidah bekas paku i bas tanNa, janah adi la kin kutamaken jari-jaringku ku je bage pe adi la kin kutamaken tanku ku awakNa, labo aku tek.”

²⁶Seminggu kenca ajar-ajar e pulung, pulung ka ia i bas inganna pulung e. Tomas pe ikut pulung. Pintu enggo ieruk, tapi bengket Jesus ku bas, tedis IA i lebe-lebe ajar-ajar e, jenari nina, “Mejuah-juah!”

²⁷Jenari nina Jesus man Tomas, “Tamakenlah jari-jarindu ku jenda, janah nehenlah tanKu. Dadaken tanndu, tamaken ku awakKu. Olanai la tek, tapi teklah!”

²⁸Ngaloi Tomas man Jesus, “O, Tuhanku! O, Dibatangku!”

²⁹Nina Jesus man Tomas, “Ma perbahan idahndu Aku nge maka kam tek? Malem tuhu-tuhu ate kalak si tek man bangKu aminna pe la Aku idahna!”

³⁰Tuhu melala denga tanda-tanda sengget ibahan Jesus i lebe-lebe ajar-ajarNa si la isuratken i bas Kitap enda.

³¹Kai si enggo isuratken i bas Kitap enda tujunna e me gelah kam tek maka Jesus kap Anak Dibata; IA kap Mesias si ipadanken Dibata. Bage pe gelah arah kinitekenndu nggeluh kam i bas gelarna!