Read Batak Karo JOHANES 3 Bible Online

JOHANES 3 - Batak Karo bible

JOHANES 3

¹Lit me sekalak peminpin agama kalak Jahudi, gelarna Nikodemus; ia kalak Parisi.

²I bas sada berngi idahina Jesus nina, “O Guru, ieteh kami maka Kam me Guru si isuruh Dibata. Sabap ise pe labo ngasup erbahan tanda-tanda sengget bagi si ibahanNdu e, adi la kin Dibata ras ia.”

³Ngaloi Jesus, “Kukataken man bandu: Ise pe labo nggejap Dibata Rajana adi la kin ia tubuh pedua kaliken.”

⁴Nungkun Nikodemus man Jesus, “Banci kin kalak si enggo mbelin tubuh pedua kaliken? Lanai ia banci bengket ku bas bertin nandena jenari tubuh pedua kaliken!”

⁵Erjabap Jesus, “Kukataken man bandu: Si tuhuna ise pe labo banci bengket ku bas Kinirajan Dibata adi la kin ia tubuh i bas lau dingen Kesah Dibata nari.

⁶Manusia tubuh i bas orang tuana nari secara daging, tapi i bas Kesah Dibata ia tubuh secara pertendin.

⁷E maka ola atendu mamang adi ningku, ‘Kerina kam arus tubuh pedua kaliken.’

⁸Angin rembus ku ja atena, janah ibegindu sorana, tapi la ietehndu i ja nari rehna ntah ku ja perlawesna. Bage me pe kalak si tubuh i bas Kesah Dibata.”

⁹Nungkun Nikodemus, “Banci kin jadi bage?”

¹⁰Erjabap Jesus, “Kam kap guru kalak Israel, la kin ietehndu kerna si enda?

¹¹Kukataken man bandu: Si tuhuna kami ngerana kerna kai si ieteh kami dingen ituriken kami kerna si enggo idah kami, tapi sekalak pe kam la nggit tek.

¹²Kerna barang-barang doni enda pe aku ngerana la kam tek, apai denga ka kerna Surga?

¹³Ise pe labo pernah ku Surga, selain Anak Manusia si nusur i Surga nari.

¹⁴Bagi ipeganjangken Musa nipe tembaga i gurun pasir, bage pe Anak Manusia si isuruh Dibata ipeganjangken, [9†]

¹⁵gelah kerina kalak si tek man baNa ngaloken kegeluhen si tuhu-tuhu si la erkeri-kerin.

¹⁶Sabab bage pengkelengi Dibata doni enda, e maka iberekenNa AnakNa Sitonggal, gelah ola bene isie pe si tek man Bana, tapi gelah dat kegeluhen si tuhu-tuhu si la erkeri-kerin.

¹⁷Sabap Dibata nuruh AnakNa ku doni enda labo jadi Hakim tapi jadi Singkelini manusia.

¹⁸Ise tek man Anak Dibata e la iukum; tapi ise la tek, enggo kena ukumen, sabap la ia tek man Anak Dibata si Tonggal.

¹⁹Ukumen e: Terang enggo reh ku doni enda, tapi ngenan ate manusia si gelap e asa terang, sabap jahat perbahanenna.

²⁰Sabap kalak jahat la atena ngena terang e, dingen la ia nggit ku terang e gelah ola teridah perbahanenna si jahat e.

²¹Tapi kalak si ndalanken si ngena ate Dibata reh ia ku terang e, gelah i je teridah maka kai si ibahanna e sue ras kai si ngena ate Dibata.”

²²Kenca bage lawes Jesus ras ajar-ajarNa ku daerah Judea; ndekah sitik IA i je ras ajar-ajarNa janah mperidiken kalak si tek.

²³Johanes Peridiken pe mperidiken i Ainon, deherken kuta Salim, sabap i je melala lau. Nterem kalak reh ndahi ia gelah iperidiken. (

²⁴Paksa si e Johanes langa ipenjaraken.) [10†]

²⁵Piga-piga kalak ajar-ajar Johanes rubat ras kalak Jahudi kerna aturen pembersihen rikutken agamana.

²⁶E maka idahi kalak enda Johanes jenari nina, “O Guru, ingetndu nge si ras kam mbaru enda i lepar Lau Jordan dingen si iturikenndu man kami kerna IA? Genduari IA pe mperidiken janah nterem kalak reh ndahi IA.”

²⁷Erjabap Johanes, “Kai pe labo idat kalak adi la kin Dibata merekenca man bana.

²⁸Kam jadi saksingku maka pernah nge kukataken, ‘Labo aku Mesias si ipadanken Dibata e, tapi aku isuruh Dibata leben asa IA.’ [11†]

²⁹Penganten si dilaki kap empuna penganten si diberu. Si naruh si dilaki tedis dingen megi-megi; janah meriah ukurna asum ibegina sora si empo e. Bage me aku genduari; tuhu-tuhu meriah kal ukurku.

³⁰IA me arus lebih ipehaga janah aku lebih ipekitik.”

³¹IA si reh i Surga nari belinen asa ise pe. Si reh i doni nari, doni empuna. Ia ngerana kerna si lit i doni. Tapi IA, si reh i Surga nari i babo kerina si nasa lit.

³²IturikenNa kerna kai si enggo idahNa ras kai si enggo ibegiNa tapi ise pe la tek nandangi si ikatakenNa.

³³Ise tek nandangi si ikatakenNa e, iakukenna maka Dibata benar kap.

³⁴Sabap persuruhen Dibata nge si nehken kata Dibata, erkiteken ia dem Kesah Dibata.

³⁵Bapa ngkelengi AnakNa, janah kerina iendesken Bapa i teruh kuasa Anak e. [12†]

³⁶Ise tek man Anak e ialokenna me kegeluhen si tuhu-tuhu si la erkeri-kerin. Tapi si ngelawan Anak e asa ndigan pe la ngaloken kegeluhen si rasa lalap e, janah ia lalap i teruh ukumen Dibata.