Read Batak Karo JOHANES 4 Bible Online

JOHANES 4 - Batak Karo bible

JOHANES 4

¹Kalak Parisi megi berita maka teremen jelma si idat ras iperidiken Jesus asangken iperidiken Johanes. (

²Si tuhuna labo sekalak jelma pe iperidiken Jesus, tapi ajar-ajarNa nge mperidikenca.)

³Kenca ibegi Jesus kai si icakapken kalak, itadingkenNa daerah Judea, mulih IA ku daerah Galilea.

⁴I bas perdalanenNa, la banci la ibentasiNa daerah Samaria.

⁵Seh me Jesus ku sada kuta i daerah Samaria, gelarna Sihar. Kuta e deher ras juma si ibereken Jakup nai man anakna Jusup. [13†]

⁶[6-8] I bas juma e lit sumur si igelari sumur Jakup. Perbahan latih Jesus erdalan, e maka kundul IA i tepi sumur e. Paksa e wari enggo ciger; ajar-ajar Jesus lawes ku kuta nukur nakan. Asum Jesus sisada i je, reh sekalak diberu bangsa Samaria ku sumur e ngelegi lau. Nina Jesus man bana, “Enta sitik lau ena gelah Kuinem.”

⁷

⁸

⁹Ngaloi diberu e, “Kam kalak Jahudi janah aku kalak Samaria; ngkai maka ipindoNdu lau inemen man bangku?” (Biasana kalak Jahudi la nggit make kai pe si enggo ipake kalak Samaria.) [14†]

¹⁰Nina Jesus, “Adi ietehndu kerna pemere Dibata, janah adi itandaindu ise si mindo lau man bandu enda, tentu ipindondu man baNa lau, jenari iberekenNa man bandu lau si mereken kegeluhen.”

¹¹Ngaloi diberu e, “O Tuan, mbages kap sumur enda, janah timbaNdu pe la lit. I ja ibuatNdu lau si mereken kegeluhen e?

¹²Nini kami Jakup nai mereken sumur enda man kami. I jenda nari me lau inemenna, inemen anak-anakna ras asuh-asuhenna. Ma labo kin ikatakenNdu maka belinen Kam asangken nini kami Jakup e?”

¹³Erjabap Jesus, “Kalak si nginem lau enda muas denga.

¹⁴Tapi kalak si nginem lau si Kubereken man bana, lanai ia muas seh rasa lalap. Sabap lau si Kubereken e jadi sumbul si erburak-burak i bas ia dingen mereken kegeluhen si tuhu-tuhu si la erkeri-kerin.”

¹⁵Ngaloi diberu e, “O Tuan, bereken min lau e man bangku gelah olanai aku muas, janah lanai perlu aku ku jenda muat lau.”

¹⁶Nina Jesus, “To legi perbulangenndu, ras kam ku jenda.”

¹⁷Ngaloi diberu e, “La lit perbulangenku.” E maka nina Jesus, “Tuhu bagi si ikatakenndu e, la lit perbulangenndu.

¹⁸Sabap kam enggo lima kali erjabu janah dilaki si ras kam genduari e pe si tuhuna labo perbulangenndu. Payo kal katandu e.”

¹⁹Ngaloi diberu e, “O Tuan, nabi kepeken kam.

²⁰Nini-nini kami i das uruk ah nembah Dibata, tapi nini kalak Jahudi i Jerusalem me inganna ersembah man Dibata.”

²¹Nina Jesus man bana, “O bibi, teklah kam man bangKu. Reh me pagi paksana maka lanai kalak i deleng ah nembah Dibata bage pe lanai i Jerusalem.

²²Kam kalak Samaria si tuhuna la ietehndu ise si isembahndu, tapi kami kalak Jahudi ieteh kami ise si isembah kami, sabap Si Engkelini si ipadanken Dibata e reh arah kalak Jahudi.

²³Tapi reh me paksana, janah si tuhuna enggo seh pe, i ja arah Kesah Si Badia manusia ersembah man Dibata alu payo.

²⁴Dibata Kesah kap, e maka arah Kesah e ngenca maka banci manusia nembah Dibata alu payo.”

²⁵Ngaloi diberu e man Jesus, “Kueteh maka Mesias si ipadanken Dibata, si igelari Kristus, nandangi reh me. Janah adi reh IA, kerinana pagi ipetangkasNa man banta.”

²⁶Nina Jesus man bana, “Aku, si ngerana ras kam enda kap Si Engkelini si ipadanken Dibata e.”

²⁷Paksa si e enggo reh mulihken ajar-ajar Jesus. Mamang kal atena sabap idapetina Jesus ngerana ras sekalak diberu. Tapi sekalak pe ia la nungkun man diberu e, “Kai atendu?”, ntah nungkun man Jesus, “Engkai maka Kam ngerana ras ia?”

²⁸Kenca bage lawes diberu e ku kuta itadingkenna ingan launa ndai, jenari nina man anak kuta,

²⁹“Marilah sinehen kalak si enggo nuriken kerina lagu langkahku. Banci jadi IA me Mesias si ipadanken Dibata e.”

³⁰E maka berkat anak kuta e ndahi Jesus.

³¹Paksa si e ajar-ajar ngiahken Jesus man nina, “O Guru, man kita!”

³²Tapi ngaloi Jesus, “Lit kap panganKu si la ietehndu.”

³³E maka sisungkun-sungkunen ajar-ajar e nina, “Lit kin ndai kalak naruhken nakan man baNa?”

³⁴Jenari nina Jesus, “PanganKu e me kap ngikutken peraten si nuruh Aku, dingen ndungi dahin si iberekenNa man bangKu.

³⁵Ikatakenndu: Empat bulan nari enggo rani. Tapi nehenlah ku juma-juma; page enggo megersing i bas juma e guna iperani!

³⁶Kalak si mperanisa ngaloken upah janah ipepulungna asilna guna kegeluhen si tuhu-tuhu si la erkeri-kerin, gelah si merdang ras si rani ras-ras ermeriah ukur.

³⁷Tuhu me bagi si ikataken i bas kuan-kuan, ‘Lain si merdang, lain si peranisa.’

³⁸Kusuruh kam rani i juma si la kam ndahisa; kalak si deban i je erdahin janah kam si mpepulung ulihna latih.”

³⁹Nterem kalak Samaria i bas kuta e tek man Jesus erkiteken nina diberu e, “IturikenNa man bangku kerina si enggo pernah kubahan.”

⁴⁰E maka kenca jumpa kalak Samaria e ras Jesus, ipindokenna gelah ola lebe Jesus lawes. Perbahan si e dua wari dekahna Jesus i kuta kalak Samaria e.

⁴¹Kenca Jesus ngajar reh teremna pe kalak si tek.

⁴²Jenari nina kalak e man diberu ndai, “Kami enggo tek genduari, labo erkiteken kai si ikatakenndu, tapi erkiteken kami jine enggo megi pengajarenNa, janah ieteh kami maka tuhu-tuhu me IA Si Engkelini doni enda.”

⁴³Kenca dua wari Jesus i bas kuta e berkat IA ku Galilea.

⁴⁴Jesus enggo pernah ngataken, “Sekalak nabi labo meherga i bas kutana.” [15†]

⁴⁵Tapi kenca seh Jesus i Galilea, ialo-alo kalak IA alu meriah ukur, sabap asum Wari Raya Paskah i Jerusalem enggo idah kalak kerina kai si ibahan Jesus. [16†]

⁴⁶Alu bage mulihken Jesus ku kuta Kana i daerah Galilea, kuta si pernah i je ibahanNa lau jadi anggur. I bas kuta e lit sekalak menteri raja, anakna sakit i Kapernaum. [17†]

⁴⁷Kenca ibegina berita maka Jesus enggo reh i Judea nari ku Galilea, e maka ijumpaina Jesus, janah ipindokenna gelah berkat Jesus ku Kapernaum mpepalem anakna si menam mate e.

⁴⁸Tapi nina Jesus man bana, “Adi langa kin idahndu tanda-tanda sengget si mbelin labo kam tek.”

⁴⁹Ngaloi menteri raja e, “O Tuan, berkatlah kita minter ope denga mate anakku.”

⁵⁰Nina Jesus man bana, “To mulih kam, malem nge anakndu e.” Tek menteri e kai si ikataken Jesus, e maka lawes ia.

⁵¹I tengah dalan jumpa ia ras juak-juakna. Nina juak-juakna e man bana, “Anakndu enggo malem.”

⁵²Isungkunna juak-juakna e ntah jam piga anakna e mulai malem. Erjabap juak-juak e, “Nderbih kira-kira jam sada suari enggo malem penakitna.”

⁵³Jenari i inget menteri e maka i bas jam e me nina Jesus man bana, “Malem nge anakndu e.” E maka kerina ia ras keluargana tek man Jesus.

⁵⁴Enda me tanda sengget si peduaken ibahan Jesus i Galilea. Tanda sengget enda ibahanNa kenca IA mulih i Judea nari.