Read Batak Karo JOHANES 6 Bible Online

JOHANES 6 - Batak Karo bible

JOHANES 6

¹Kenca bage mulihken Jesus ku lepar Dano Galilea (igelari pe Dano Tiberias).

²Nterem kalak ngikutken IA sabap enggo idah kalak e tanda-tanda sengget si ibahanNa pepalem kalak penakiten.

³Jenari inangkihi Jesus sada uruk; i je kundul IA ras ajar-ajarNa.

⁴Paksa si ndai lanai ndekah Wari Raya Paskah kalak Jahudi.

⁵Ipernehen Jesus kelewetNa janah idahNa nterem jelma rehen ndahi IA. E maka nina Jesus man Pilipus, “I ja ndia banci situkur pangan guna kalak si nterem enda?” (

⁶Ikataken Jesus bagenda guna nguji Pilipus; si tuhuna ieteh Jesus nge kai si man bahanenNa.)

⁷Ngaloi Pilipus, “Amin tersitik pe kalak si nterem ibere man, dua ratus duit pirak pe la bias man penukur pangan e.”

⁸Ngerana ajar-ajar Jesus si deban, e me Andereas sembuyak Simon Petrus nina,

⁹“I jenda lit sekalak danak-danak; i bas ia lit lima ngkibul roti ras dua ikan. Tapi lit kin gunana man kalak si bagenda teremna?”

¹⁰Jenari nina Jesus man ajar-ajarNa, “Suruhlah kalak si nterem e kundul.” (I bas ingan e mbur dukutna.) E maka kundul kerina kalak si nterem e; dilaki saja teremna lit lima ribu kalak.

¹¹Ibuat Jesus roti e, ertoto IA ngataken bujur man Dibata jenari ielakenNa roti e man kalak si nterem. Ikan e pe bage ka nge ibahan Jesus, janah kerina kalak si nterem e man asa besurna.

¹²Kenca besur ia kerina nina Jesus man ajar-ajarNa, “Pepulung kerina si iba; ola lit sitik pe terbuang.”

¹³E maka ipepulung ajar-ajar kerina si iba e. Lit sepuluh dua sumpit buena iba roti si lima ngkibul ndai.

¹⁴Ngidah tanda-tanda sengget si ibahan Jesus e nina kalak si nterem, “Si tuhuna enda me nabi si enggo ipadanken Dibata reh ku doni enda!”

¹⁵Ieteh Jesus maka ate kalak si nterem e maksa IA jadi raja. E maka lawes Jesus sisada i bas ingan e nari.

¹⁶Kenca ben wari lawes ajar-ajar Jesus ku dano.

¹⁷Idatasina perahu jenari berkat ia ngepari dano e ku Kapernaum. Seh mbages berngi, Jesus langa reh ndapeti ajar-ajar e.

¹⁸Paksa si e angin meter rembus janah lau pe ergalumbang.

¹⁹Kenca kira-kira telu ntah empat kilometer ajar-ajar e engkayuh perahuna, iidahna Jesus erdalan i babo lau ndeheri perahu e. Mbiar kal ajar-ajar e.

²⁰Tapi nina Jesus man bana, “Ola kam mbiar, Aku nge enda!”

²¹E maka alu meriah ukur ialokenna Jesus ku das perahuna. Janah minter seh perahu e ku tepi, ku ingan si itujuna.

²²Pepagina kenca Jesus mere man lima ribu kalak, sada ngenca perahu i tepi dano idah kalak si nterem e. Asum berkat ajar-ajar tare perahu ieteh kalak si nterem maka Jesus la ikut berkat.

²³Paksa e reh piga-piga perahu i Tiberias nari, jenari ngadi deher ingan kalak si nterem man roti kenca Jesus ngataken bujur.

²⁴Tapi kenca idah kalak si nterem maka Jesus la i bas perahu e janah ajar-ajarNa pe lang, e maka idatasina perahu e jenari berkat ia ku Kapernaum ndarami Jesus.

²⁵Kenca jumpa kalak si nterem e ras Jesus i lepar dano, nungkun ia man Jesus, “O Guru, ndiganai Kam ku jenda?”

²⁶Ngaloi Jesus, “Kukataken man bandu: Si tuhuna idaramindu Aku labo perbahan iangkandu tanda-tanda sengget si Kubahan e, tapi perbahan enggo ipanndu roti e seh besur.

²⁷Ola cariken pangan si banci melengas. Tapi daramilah pangan si banci mereken kegeluhen si tuhu-tuhu si la erkeri-kerin. Pangan si enda me pagi si ibereken Anak Manusia si isuruh Dibata e man bandu, sabap Dibata Bapa enggo mereken tanda pengesahen man Anak Manusia e.”

²⁸Jenari nungkun ka kalak ndai, “Kai dage arus ibahan kami guna ndahiken dahin Dibata?”

²⁹Erjabap Jesus, “Si sentudu ras peraten Dibata ibahanndu, e me: Teklah kam man baNa si isuruh Dibata.”

³⁰Nina kalak e, “Tuduhkenlah man kami tanda sengget si mbelin gelah tek kami man baNdu. Bahanlah kai ateNdu.

³¹Nini kami nai ipanna manna i gurun pasir, bagi lit tersurat i bas Pustaka Si Badia, ‘IberekenNa man kalak e roti si reh i Surga nari.’ ” [22†]

³²Ngaloi Jesus, “Kukataken man bandu: Si tuhuna kai si ibereken Musa man bandu, labo roti i Surga nari. BapangKu nge si mereken Roti si tuhu-tuhu si reh i Surga nari.

³³Sabap Roti si ibereken BapangKu, e me IA si reh i Surga nari dingen si mereken kegeluhen man doni enda.”

³⁴Nina kalak ndai, “O Tuan, bereken min lalap roti e man kami.”

³⁵Ngaloi Jesus, “Aku kap Roti si mereken kegeluhen. Ise reh ndahi Aku, lanai ia melihe; ise tek man bangKu lanai ia muas.

³⁶Enggo Kukataken man bandu maka enggo idahndu Aku, tapi la kam tek man bangKu.

³⁷Kerina manusia si iendesken BapangKu man bangKu reh nge pagi ndahi Aku. Janah ise pe si reh ndahi Aku labo Kutulak.

³⁸Sabap Aku enggo reh i Surga nari guna nehken peraten si nuruh Aku, labo guna nehken peratenKu.

³⁹Sura-sura si Nuruh Aku e, e me gelah sada pe la bene si enggo iendeskenNa man bangKu e; tapi gelah i bas wari pendungi pagi Kupekeke ia kerina i bas si mate nari.

⁴⁰Sabap sura-sura BapangKu, e me kap: gelah kerina si ngidah Anak e dingen si tek man baNa ngaloken kegeluhen si tuhu-tuhu si la erkeri-kerin, janah i bas wari pendungi pagi Kupekeke ia i bas si mate nari.”

⁴¹Perbahan ikataken Jesus maka IA me Roti si reh i Surga nari, jungut-jungut kalak Jahudi.

⁴²Nina, “Ma ia kin Jesus anak Jusup? Sitandai kap nandena ras bapana. Engkai ka maka ikatakenna IA reh i Surga nari?”

⁴³Perbahan si e nina Jesus, “Ola kam jungut-jungut.

⁴⁴Labo ise pe ngasup reh ndahi Aku adi la kin itaruhken Bapa si nuruh Aku ia man bangKu; janah i bas wari pendungi pagi Kupekeke ia i bas si mate nari.

⁴⁵I bas kitap nabi-nabi lit tersurat, ‘Kerina pagi manusia e iajari Dibata.’ Kerina si megi dingen ngaloken pengajaren Bapa reh kap ndahi Aku. [23†]

⁴⁶Labo ertina maka enggo lit kalak ngidah Bapa; tapi IA si reh i bas Dibata nari ngenca enggo ngidah Bapa e.

⁴⁷Ingetlah! Kalak si tek ngenca ngaloken kegeluhen si tuhu-tuhu si la erkeri-kerin.

⁴⁸Aku kap Roti si mereken kegeluhen.

⁴⁹Ninindu nai, ipanna manna i gurun pasir, tapi mate ka nge ia.

⁵⁰Tapi Roti si reh i Surga nari la bage. Kalak si man Roti enda la pagi mate.

⁵¹Aku me Roti si mereken kegeluhen si reh i Surga nari. Kalak si man Roti enda nggeluh me rasa lalap. Roti si Kubereken e, e me kap dagingKu, si Kuendesken gelah terkelin doni enda.”

⁵²Megi kata Jesus enda rubat kalak Jahudi sapih-sapih ia. Nina, “Kuga nge ibahanna mereken dagingna gelah si pan?”

⁵³Nina Jesus man kalak e, “Kukataken man bandu: Adi la kin ipanndu daging Anak Manusia si isuruh Dibata e, janah la iinemndu darehNa, labo lit kegeluhen i bas kam.

⁵⁴Ise man dagingKu dingen nginem darehKu, ia me ngaloken kegeluhen si tuhu-tuhu si la erkeri-kerin, janah i bas wari pendungi pagi Kupekeke ia i bas si mate nari.

⁵⁵Sabap dagingKu me pangan si tuhu-tuhu janah darehKu me inemen si tuhu-tuhu.

⁵⁶Ise man dagingKu dingen nginem darehKu, ia nggeluh i bas Aku janah Aku pe nggeluh i bas ia.

⁵⁷Bagi Aku isuruh Bapa si nggeluh janah Aku nggeluh erkiteken IA, bage me pe kalak si ipanna Aku, ia nggeluh erkiteken Aku.

⁵⁸Enda nge Roti si reh i Surga nari, labo bali ras roti si ipan ninindu nai. Ninindu si man roti nai, mate ka nge. Tapi si man Roti enda nggeluh me rasa lalap.”

⁵⁹Kerina enda ikataken Jesus i Kapernaum asum IA ngajar i rumah pertoton.

⁶⁰Megi kata Jesus e, nterem ajar-ajar Jesus ngerana nina, “PengajarenNa enda meserasa. Ise nge ngasup megikenca?”

⁶¹Aminna la gia lit si nurikenca man baNa, ieteh Jesus nge maka nterem kalak jungut-jungut kerna IA. E maka nina man kalak e, “Tondel kin ukurndu megi pengajarenKu enda?

⁶²Kuga ndia adi idahndu Anak Manusia si reh i Surga nari e mulihken nangkih ku inganna ndube?

⁶³Ingetlah! Si pegeluhken manusia e, Kesah Dibata kap. Gegeh manusia labo lit ertina. Kata si enggo Kukataken man bandu e rehna i bas Kesah Dibata nari. Kata e me si mereken kegeluhen man bandu.

⁶⁴Tapi lit piga-piga i bas kam la tek.” (Tangtangna nari pe enggo iteh Jesus ise pagin si la tek man baNa janah ise si ndayaken IA.)

⁶⁵Tole nina Jesus, “Perbahan si e Kukataken man bandu: Ise pe labo banci ndahi Aku adi la kin ipesikap Bapa e dalan man bana guna ndahi Aku.”

⁶⁶Erkiteken pengajarenNa enda, nterem kalak nadingken IA, lanai iikutkenna Jesus.

⁶⁷E maka nina Jesus man ajar-ajarNa si sepuluh dua kalak, “Kam pe itadingkenndu atendu Aku?”

⁶⁸Ngaloi Simon Petrus, “O Tuhan, kempak ise kami lawes? Katandu kap si mereken kegeluhen si tuhu-tuhu si la erkeri-kerin. [24†]

⁶⁹Genduari tuhu-tuhu kami tek maka Kam me si Badia si reh i bas Dibata nari.”

⁷⁰Nina Jesus man ajar-ajarNa e, “Ma kin sepuluh dua kalak kam enggo Kupilih? Tapi sekalak i bas kam Iblis kap.”

⁷¹Maksud Jesus e me si Judas anak Simon Iskariot; sabap aminna gia Judas sekalak i bas ajar-ajar si sepuluh dua, idayakenna atena Jesus.