Read Batak Karo JOHANES 7 Bible Online

JOHANES 7 - Batak Karo bible

JOHANES 7

¹Kenca bage isiari Jesus daerah Galilea. I daerah Judea la IA nggit niar-niar sabap kalak Jahudi si erkuasa i je ersura-sura munuh IA.

²Paksa si e lanai ndekah Wari Raya Sapo-sapo. [25†]

³Perbahan si e nina senina-senina Jesus man baNa, “Tadingken ingan enda, laweslah ku daerah Judea gelah idah ajar-ajarNdu dahin si idahikenNdu.

⁴Labo lit kalak erbuni-buni erdahin adi atena kin mpetandaken bana man doni enda. Kam enggo melala dahin idahikenNdu, bahanlah gelah kerina kalak i belang-belang doni metehsa.” (

⁵Senina-senina Jesus e pe langa bo tek man Jesus.)

⁶E maka nina Jesus man bana, “Langa seh paksangKu. Tapi kam katawari pe lit kesempatenndu.

⁷Kam labo segat ate doni enda, tapi Aku segat atena, sabap Kucidahken perbahanenna si jahat.

⁸To, kam lah ku kerja e. Aku labo reh ku je sabap langa seh paksangKu.”

⁹Bage me nina Jesus man senina-seninaNa, jenari tading IA i Galilea.

¹⁰Kenca lawes senina-senina Jesus ku wari raya e, Jesus pe lawes ku je. La IA terang-terangen lawes, tapi erbuni-buni.

¹¹Kalak Jahudi si erkuasa ndarami Jesus i bas kerja e. Nungkun ia nina, “I ja ndia IA?”

¹²Nterem kalak erkusik-kusik kerna Jesus. Lit si ngatakenca, “IA kalak bujur kap.” Tapi lit ka si ngatakenca, “Lang! Itokohina kap kalak si nterem!”

¹³Tapi sada pe la pang terang-terangen encakapken Jesus sabap mbiar ia kalak Jahudi si erkuasa.

¹⁴Kenca menam setengah acara perayan e erdalan, bengket Jesus ku Rumah Pertoton, jenari ibenakenNa ngajar.

¹⁵Mamang kal ate kalak Jahudi si erkuasa ngidah IA ngajar e. Nina, “I ja nari nge pemetehNa e kerina adi IA labo pernah sekolah?”

¹⁶Ngaloi Jesus, “Kai si Kuajarken e labo i bas Aku nari, tapi i bas Dibata si nuruh Aku nari nge.

¹⁷Kalak si ndalanken peraten Dibata alu ukur meriah, ietehna nge ntah i bas Dibata nari ntah i bas Aku nari rehna pengajarenKu enda.

¹⁸Kalak si ngajar rikutken pemetehna, iusahakenna nge gelah ia terpuji. Tapi kalak si ersura-sura gelah si nuruh ia terpuji, bujur kap, la lit si palsu i bas ia.

¹⁹Ma ibereken Musa Undang-undang man bandu? Tapi sada pe kam la ngikutken Undang-undang e. Engkai maka ibunuhndu atendu Aku?”

²⁰Ngaloi kalak si nterem, “Setanen Kam! Ise kin atena munuh Kam?”

²¹Nina Jesus man kalak si nterem e, “Sada perbahanen si mbelin enggo Kubahan, kerina kam kemamangen.

²²Perbahan isuruh Musa kam nunatken anakndu, i bas wari Sabat pe isunatkenndu ia. (Situhuna labo i bas Musa nari Undang-undang sunat e, tapi i bas nini-ninindu nari nge.) [26†]

²³Adi guna nehken Undang-undang si ibereken Musa banci kalak isunatkenndu i bas wari Sabat, ngkai maka kam merawa adi Kupepalem kalak si penakiten i bas wari Sabat? [27†]

²⁴Ola kin salahindu kalak arah si teridah saja, tapi bahanlah pertimbangen si bujur.”

²⁵Piga-piga anak kota Jerusalem ngerana kerna Jesus nina, “Ma IA kin si enggo isura-suraken peminpin-peminpinta ibunuh?

²⁶Nehenlah! Erate-ate IA ngerana i lebe-lebe jelma si nterem janah ise pe la ngelawan IA. Enggo kin tuhu-tuhu ieteh si erkuasa maka IA me Mesias si ipadanken Dibata?

²⁷Aturna adi Mesias si ipadanken Dibata e reh, la sekalak pe meteh i ja nari rehna. Tapi IA, kerina kita meteh i ja nari rehna.”

²⁸Asum Jesus ngajar i bas Rumah Pertoton e, nungkun IA alu sora si megang nina, “Tuhu-tuhu kin itandaindu Aku? Ietehndu kin i ja nari Aku? Labo erkiteken peratenKu Aku reh. Si nuruh Aku e bujur kap; janah la IA itandaindu.

²⁹Tapi Aku, Kutandai IA, sabap IA me si nuruh Aku, janah Aku reh i bas IA nari.”

³⁰Perbahan si e ersura-sura kalak Jahudi si erkuasa nangkap Jesus, tapi sada pe la pang sabap langa seh paksana.

³¹Tapi i bas kalak si nterem e lit piga-piga kalak tek man Jesus. Nina, “Adi reh Mesias si ipadanken Dibata e, ngasup kin IA erbahan tanda-tanda sengget buen asa si ibahan Jesus enda?”

³²Kalak si nterem erkusik-kusik kerna Jesus. Si enda ibegi kalak Parisi, e maka arih-arih ia ras imam-imam si mbelin; jenari isuruhna piga-piga kalak si njaga Rumah Pertoton e nangkap Jesus.

³³Tapi nina Jesus, “Kentisik nari ngenca Aku ras kam. Kenca bage mulih Aku ndahi si nuruh Aku.

³⁴Idaramindu pagi Aku, tapi la idatndu, sabap labo kam banci ku ingan si Kudahi e.”

³⁵E maka sisungkun-sungkunen kalak Jahudi si erkuasa e sapih-sapih ia nina, “Ku ja kin ndia IA pagi lawes maka la IA si dat? Ntah kin ateNa lawes ku kuta-kuta Junani si lit i je ringan kalak Jahudi guna ngajari kalak Junani?

³⁶Kai nge maksudna maka nina, ‘Idaramindu pagi Aku tapi la idatndu. Labo kam banci ku ingan si Kudahi e?’ ”

³⁷Wari pengkeri-kerin kerja e, e me si pentingna. I bas wari e tedis Jesus jenari ngerana IA alu sora megang nina, “Ise muas rehlah ku Aku gelah ia minem. [28†]

³⁸Bagi si tersurat i bas Pustaka Si Badia, ‘Kalak si tek man bangKu, erburak i bas ia nari lau si mereken kegeluhen.’ ” [29†]

³⁹Si ikataken Jesus enda, e me kerna Kesah Si Badia, si nandangi ialoken kalak si tek man baNa. Paksa si e Kesah Si Badia langa reh sabap Jesus langa iangkat ku kemulian.

⁴⁰Megi kata Jesus, ngerana piga-piga i bas kalak si nterem e nina, “Tuhu-tuhu me IA nabi si ipadanken Dibata e!”

⁴¹Deba nina, “IA me Mesias si ipadanken Dibata.” Tapi nina ka deba, “Labo! Mesias si ipadanken Dibata labo i Galilea nari rehna.

⁴²Sabap i bas Pustaka Si Badia lit tersurat maka Mesias si ipadanken Dibata e, reh i bas kesusuren Daud nari, tubuh i kuta Betlehem; Kuta Daud nai.” [30†]

⁴³E maka turah perubaten i tengah-tengah kalak si nterem kerna Jesus.

⁴⁴Piga-piga kalak ersura-sura nangkap Jesus, tapi sada pe la pang ngkuit Jesus.

⁴⁵E maka mulihken kalak si njaga Rumah Pertoton ndai ndahi imam-imam si mbelin ras kalak Parisi. Nungkun imam-imam si mbelin ras kalak Parisi e nina, “Engkai maka IA la ibabandu?”

⁴⁶Erjabap kalak e, “Ise pe langa pernah bagi IA e ngerana!”

⁴⁷Nina kalak Parisi e man bana, “Kam pe enggo ka kin ibabaiNa papak?

⁴⁸Nehenlah! Lit kin idahndu sekalaklah gia peminpin-peminpinta ntah kalak Parisi tek man baNa?

⁴⁹Kalak si nterem enda la meteh Undang-undang Musa, e maka iukum Dibata me ia!”

⁵⁰Sekalak i bas kalak Parisi ndai, e me Nikodemus, si pernah njumpai Jesus. Nina Nikodemus, [31†]

⁵¹“Rikutken Undang-undangta la banci kalak siukum ope denga sibegiken ia ngerana janah ope denga sieteh kai si enggo ibahanna.”

⁵²Ngaloi kalak ndai, “Ntah kam pe i Galilea nari nge! Pepayolah i bas Pustaka Si Badia. I je ietehndu me maka labo pernah lit nabi i Galilea nari.”