Read Batak Karo JOHANES 8 Bible Online

JOHANES 8 - Batak Karo bible

JOHANES 8

¹[ [1] Kenca bage mulih jelma si nterem e ku rumahna sekalak-sekalak, tapi Jesus lawes ku Uruk Seton.

²Pepagina mulihken Jesus ku Rumah Pertoton. Kalak si nterem pe reh ka ndahi IA. Kundul Jesus jenari ibenakenNa ngajar.

³Paksa IA ngajar e reh guru-guru Undang-undang ras kalak Parisi. Ibabana sekalak diberu si itangkapna asum diberu e erlua-lua. Isuruhna diberu e tedis i lebe-lebe jelma si nterem e.

⁴Jenari nina man Jesus, “Diberu enda itangkap kami asum ia erlua-lua.

⁵I bas Undang-undangta isuruh Musa maka diberu si bagenda arus ibenteri alu batu seh mate. Tapi kam, kuga nindu?” [32†]

⁶Kalak enda nungkun guna ncubai Jesus; atena gelah lit dalan ngaduken Jesus. Tapi mungkuk Jesus, isuratiNa taneh alu jari-jariNa.

⁷Lalap igegehi kalak ndai nungkun. Perbahan si e jurgak Jesus, jenari nina, “Apai kam si langa pernah erdosa, ialah lebe mentersa.”

⁸Kenca bage mungkuk ka Jesus, isuratiNa ka taneh.

⁹Megi jabap Jesus enda lawesen kalak ndai sekalak-kalak, mulai i bas si metuana nari, seh maka Jesus nari ngenca i je ras diberu ndai.

¹⁰Jurgak Jesus jenari nina man diberu e, “I ja kalak ndai kerina o bibi? La kin lit sekalak pe ngukum kam?”

¹¹Erjabap diberu e, “Sekalak pe lang, Tuan!” Nina Jesus man bana, “Adi bage, Aku pe la kam Kuukum. Mulihlah olanai bahan si la ngena ate Dibata.”]

¹²Ngerana ka Jesus man kalak si nterem e nina, “Aku kap terang doni. Ise ngikutken Aku, ialokenna me terang si mereken kegeluhen, janah lanai ia erdalan i bas gelap.” [33†]

¹³Ngaloi kalak Parisi man Jesus, “Kam ngerana kerna diriNdu jine, e maka labo tuhu kesaksinNdu e.” [34†]

¹⁴Ngaloi Jesus, “Aminna gia kerna diringKu Aku ngerana, tuhu nge si Kukataken enda, sabap Kueteh nge i ja nari Aku janah ku ja Aku lawes. Tapi kam la ietehndu i ja nari Aku janah ku ja Aku lawes.

¹⁵Isalahindu kalak rikutken pengakap manusia; tapi Aku la ise pe Kusalahken.

¹⁶Bicara Kuadili pe kalak, bujur nge keputusenKu e. Sabap i bas si e labo Aku sisada; Bapa si nuruh Aku ras Aku kap.

¹⁷I bas Undang-undangndu lit kap tersurat maka adi lit dua kalak seri katana, tuhu me si ikatakenna e.

¹⁸Bage me Aku ngerana kerna diringKu janah Bapa si nuruh Aku pe ngerana kerna Aku.”

¹⁹Nungkun kalak ndai, “I ja kin BapaNdu?” Erjabap Jesus, “Labo itandaindu Aku, janah BapangKu e pe labo itandaindu. Adi itandaindu Aku, BapangKu e pe itandaindu nge.”

²⁰Kerina si enda ikataken Jesus asum IA ngajar denga i bas Rumah Pertoton deherken peti ingan nusun persembahen. Tapi labo ise pe nangkap IA sabap paksana langa seh.

²¹Tole nina Jesus man kalak ndai, “Aku lawes me; idaramindu pagi Aku, tapi mate me kam i bas dosandu. Kam labo banci lawes ku inganKu e.”

²²E maka sisungkun-sungkunen kalak Jahudi si erkuasa nina, “Munuh baNa nge ateNa, maka nina, ‘Kam labo banci lawes ku inganKu e?’ ”

²³Nina Jesus, “Kam asalndu i jenda, i teruh enda; tapi Aku reh i datas nari. Kam reh i doni enda nari; tapi Aku labo i doni enda nari.

²⁴Perbahan si e Kukataken man bandu maka mate me kam i bas dosa-dosandu. Tuhu mate me kam i bas dosa-dosandu adi la kin kam tek maka ‘Aku me Aku.’ ”

²⁵Jenari nungkun kalak e, “Ise kin Kam?” Erjabap IA, “Kai kin si enggo Kukataken man bandu tangtangna nari!

²⁶Melala si arus Kukataken kerna kam janah melala pe si arus Kuadili. Ingetlah! Si nuruh Aku e Dibata si tuhu-tuhu kap janah si Kukataken man doni enda, e me si Kubegi i bas IA nari.”

²⁷La iangka kalak e maka Jesus ngerana kerna Bapa.

²⁸E maka nina Jesus, “Kenca ipeganjangkenndu Anak Manusia persuruhen Dibata e, ietehndu me maka, ‘Aku me Aku.’ Alu bage maka enggo iangkandu maka kerina si kukataken e labo sada pe Kubahan bagi ate-ateKu, tapi kai si iajarken Bapa man bangKu, e me si Kukataken.

²⁹Si nuruh Aku ras Aku kap. Labo itadingkenNa Aku sisada sabap tetap nge Kudalanken si ngena AteNa.”

³⁰Asum Jesus ngerana kerna si enda nterem kalak tek man baNa.

³¹Jenari ngerana Jesus man kalak Jahudi si enggo tek man baNa e nina, “Adi tetap atendu tutus ngikutken si enggo Kuajarken, tuhu-tuhu me kam ajar-ajarKu.

³²Itandaindu me Dibata si tuhu-tuhu, janah IA jine si mbebasken kam.”

³³Nina kalak ndai, “Kami kesusuren Abraham kap. Langa pernah kami jadi budak kalak. Kuga maka nindu, ‘Bebas me kam?’ ” [35†]

³⁴Ngaloi Jesus, “Kukataken man bandu: Ise erbahan si la ngena ate Dibata, ia enggo jadi budak dosa.

³⁵Sekalak budak labo lalap jadi anggota keluarga, tapi sekalak anak tetap kap jadi anggota keluarga.

³⁶Adi Anak e mbebasken kam maka tuhu-tuhu me kam enggo bebas.

³⁷Kueteh nge kam kesusuren Abraham. Amin bage gia kerina kam ersura-sura munuh Aku, sabap la ialokenndu kai si Kuajarken.

³⁸Aku ngerana rikutken kai si ikataken BapangKu man bangKu. Tapi kam, ibahanndu kai si ikataken bapandu.”

³⁹Ngaloi kalak ndai, “Bapa kami Abraham kap.” Nina Jesus, “Adi tuhu-tuhu kin kam anak Abraham bali nge perbahanenndu ras Abraham nai.

⁴⁰Kerina si enggo pernah Kubahan e me mpetangkas man bandu kebenaren si Kualoken i bas Dibata nari. Amin bage gia ibunuhndu ka nge atendu Aku. Si Abraham nai labo bage perbahanenna!

⁴¹Kam, perbahanen bapandu nge iusih-usihndu.” Ngaloi kalak ndai, “Sada ngenca Bapa kami, e me Dibata. Janah kami me anakNa si tuhu-tuhu.”

⁴²Nina Jesus, “Adi tuhu-tuhu kin Dibata Bapandu, tentu keleng atendu Aku, sabap Aku reh i bas Dibata nari janah genduari Aku ringan i jenda. Aku reh labo erkiteken kuasangKu, tapi IA nge si nuruh Aku.

⁴³Engkai maka la iangkandu si Kukataken e? E me erkiteken la kam ngasup ngaloken katangKu.

⁴⁴Bapandu si Iblis nge janah tuhu-tuhu kam anakna. Sura-sura si Iblis e nge si ikutkenndu. Nai nari Iblis pemunuh kap. La pernah ikapitina si benar, sabap la lit si benar i bas ia. Adi erbual ia biakna nge, sabap ia perguak dingen bapa kerina kalak si perguak.

⁴⁵Tapi perbahan Kukataken man bandu si tuhuna kerna Dibata, la kam tek man bangKu.

⁴⁶Apai kin kam ngasup mereken keterangen maka Aku erdosa? Dage adi kebenaren kerna Dibata nge Kukataken man bandu ngkai maka la kam tek man bangKu?

⁴⁷Kalak si reh i bas Dibata nari ibegikenna kap kata Dibata. Tapi kam labo i bas Dibata nari, e maka la kam nggit megikenca.”

⁴⁸Jenari ngaloi kalak Jahudi e man Jesus nina, “Ma tuhu dage si ikataken kami e? Kam kap kalak Samaria si setanen.”

⁴⁹Nina Jesus, “Aku labo setanen. Aku mpehaga BapangKu, tapi igombangindu Aku.

⁵⁰Aku labo ndarami dalan gelah Aku ipehaga. Tapi lit kap sada si mpehaga Aku, dingen si ngataken maka Aku benar.

⁵¹Kukataken man bandu: Ise si ngikutken katangKu ndigan pe la ia mate.”

⁵²Nina kalak Jahudi e man Jesus, “Genduari enggo ieteh kami maka tuhu-tuhu Kam setanen! Abraham bage pe kerina nabi-nabi enggo mate. Tapi nindu, ‘Ise si ngikutken katangKu asa ndigan pe la ia mate.’

⁵³Bapa kami Abraham enggo mate. Ma labo ikatakenndu maka belinen Kam asangken Abraham? Bage pe kerina nabi-nabi enggo mate. Ise kin iakapndu baNdu?”

⁵⁴Erjabap Jesus, “Labo lit gunana adi Kupujiken bangKu. Si mujiken Aku e me BapangKu, si ikatakenndu Dibatandu.

⁵⁵Tapi si tuhuna labo IA itandaindu. Aku, Kutandai kap IA. Adi Kukataken maka la IA Kutandai, perguak me Aku bagi kam. Tapi Kutandai kap IA janah Kuikutken kataNa.

⁵⁶Bapandu, Abraham, ermeriah ukur nimai waringKu; wari e enggo idahna, e maka meriah iakapna.”

⁵⁷Nina kalak Jahudi e man Jesus, “UmurNdu pe langa lit lima puluh tahun enggo ka idahNdu Abraham?”

⁵⁸Erjabap Jesus, “Kukataken man bandu: Situhuna ope denga Abraham tubuh, Aku enggo lit.”

⁵⁹Ibuat kalak Jahudi e batu, atena menteri Jesus; tapi cebuni Jesus, jenari lawes IA nadingken Rumah Pertoton e.