Read Batak Karo PERBAHANEN RASUL-RASUL 11 Bible Online

PERBAHANEN RASUL-RASUL 11 - Batak Karo bible

PERBAHANEN RASUL-RASUL 11

¹Rasul-rasul ras kalak si enggo tek i belang-belang Judea megi maka si labo kalak Jahudi pe enggo ngaloken Kata Dibata.

²Kenca mulih Petrus ku Jerusalem, kalak Jahudi si enggo tek mandang ia nina,

³“Kam enggo kesilang i rumah kalak si labo kalak Jahudi dingen langa isunatken, janah enggo pe kam man ras ia.”

⁴E maka ituriken Petrus kerina si enggo jadi, i bas pemenana nari nina,

⁵“Asum ertoto aku i kuta Jope sanga aku lolah rempet kualoken sada pengenehenen. Kuidah lit nusur bagi selambar uis mbelang, irakut i bas empatna sukina, janah ngadi i lebe-lebengku.

⁶Kupepayo isina janah kuidah i bas rubia-rubia si empat nahe, rubia-rubia si meliar, si njoler ras perik-perik si meliar.

⁷Jenari kubegi sora erkata man bangku nina, ‘O Petrus kekeken, geleh jenari pan rubia-rubia enda!’

⁸Tapi ningku, ‘Lang Tuhan, lang. La pernah kupan pantangen ntah pangan si la bersih rikutken aturen agama.’

⁹Ngerana sora e i langit nari nina, ‘Kai si enggo ikataken Dibata bersih, ola ikatakenndu meluat!’

¹⁰Si enda jadi seh telu kali, kenca bage mulihken bungkusen ndai irintak ku langit.

¹¹Paksa e pe telu kalak si isuruh ndahi aku i Kesarea nari enggo seh i rumah inganku kesilang.

¹²Jenari nina Kesah Si Badia man bangku, ‘Berkatlah ras kalak e. Ola kam sangsi!’ Seninanta si enem enda pe ikut ras aku ku Kesarea, janah radu kami ku rumah Kornelius si ndilo aku.

¹³Ituriken Kornelius man kami, maka enggo idahna malekat tedis i bas rumahna, janah nina malekat e man bana, ‘Suruh kalak ku Jope ngelegi Simon si igelari Petrus.

¹⁴IA pagi nehken Berita man bandu, gelah arah Berita e terkelin kam ras isi jabundu.’

¹⁵Janah kenca kubenaken ngerana, nusur Kesah Si Badia man kerina kalak si pulung i rumah Kornelius bagi nai tangtangna Kesah Si Badia nusur man banta.

¹⁶Jenari kuinget kai si enggo ikataken Tuhan, ‘Johanes mperidiken alu lau, tapi kam pagi iperidiken alu Kesah Si Badia.’ [66†]

¹⁷Enggo tangkas maka Dibata mereken pemereNa man si labo kalak Jahudi la lit kurangna ras si iberekenNa man banta asum tangtangna nai kita tek man Tuhan Jesus Kristus. Dage, banci kin kuambati Dibata?”

¹⁸Kenca ibegi kalak e siikataken Petrus, sinik ia. Jenari ipujina Dibata nina, “Man si labo kalak Jahudi pe enggo ibereken Dibata dalan jera gelah dat kegeluhen.”

¹⁹Kalak si enggo tek man Jesus merap erkiteken peniksan si jadi kenca Istepanus ibunuh. Piga-piga kalak seh ku Penike, Kiperus ras Antiokia. I je iberitakenna Berita kerna Jesus man kalak Jahudi saja. [67†]

²⁰Tapi piga-piga kalak si seh ku Antiokia e, e me kalak Kiperus ras kalak Kireni meritaken Berita Si Meriah kerna Tuhan Jesus man si labo kalak Jahudi pe.

²¹Tuhan nampati kalak e i bas dahinna. E maka nterem kal kalak tek dingen ngendesken dirina man Tuhan.

²²Perpulungen si i Jerusalem megi berita kerna kai si enggo jadi i Antiokia, e maka isuruhna Barnabas ku jah.

²³Kenca seh Barnabas i Antiokia, meriah kal ukurna ngidah lias ate Dibata si enggo seh man kalak e. IAjukna perpulungen e gelah tetap erkiniteken man Tuhan.

²⁴Perbahan merandal kal Barnabas bage pe ia dem alu Kesah Si Badia dingen nteguh kinitekenna, e maka nterem kalak tek man Tuhan.

²⁵Jenari berkat Barnabas ku Tarsus ndarami Saul. Kenca jumpa, radu ia ku Antiokia.

²⁶Sada tahun dekahna ia ras perpulungen e, janah i bas sada tahun e nterem kalak iajarina. I Antiokia me tangtangna ajar-ajar e igelari Kristen.

²⁷Paksa si e reh piga-piga kalak nabi i Jerusalem nari ku Antiokia.

²⁸Sekalak i bas si reh e tedis, gelarna Agabus. Alu kuasa Kesah Si Badia ernubuat ia maka lanai ndekahsa jadi me kelihen si mesangat i belang-belang doni. (Kelihen e jadi asum Klaudius jadi Kaisar Roma.) [68†]

²⁹E maka ersada arih ajar-ajar guna pepulung penampat rikutken kengasupenna sekalak-sekalak guna nampati senina-senina si ringan i Judea.

³⁰Kenca ipepulungna, ikirimkenna duit e man pertua-pertua arah Barnabas ras Saul.