Read Batak Karo PERBAHANEN RASUL-RASUL 12 Bible Online

PERBAHANEN RASUL-RASUL 12 - Batak Karo bible

PERBAHANEN RASUL-RASUL 12

¹Asum Herodes jadi raja, ngawan perpulungen ngenanami kiniseran.

²Isuruh Herodes gelah Jakup, senina Johanes, ibunuh alu pedang.

³Kenca ieteh maka kai si ibahanna e ngena ate kalak Jahudi, e maka isuruhna ka kalak nangkap Petrus. (Si enda jadi asum Wari Raya Roti si la erragi.)

⁴Kenca Petrus itangkap, itamaken ia ku bas penjara. Ia ijagai empat terpuk perajurit; tep-tep terpuk empat kalak. Sura-sura Herodes iadili Petrus i lebe-lebe jelma si nterem kenca lepas wari Paskah. [69†]

⁵Tapi asum Petrus i bas penjara, perpulungen alu tutus ate lalap ertoto man Dibata kerna ia.

⁶Berngina, ope Petrus ibaba Herodes ku lebe-lebe jelma si nterem, tunduh Petrus i kelang-kelang dua kalak perajurit. Ia iiket alu dua rante besi janah i lebe-lebe pintun lit perajurit erjaga.

⁷Jenari rempet tedis malekat Tuhan deherken Petrus, janah terang ersinalsal i bas penjara e. Itamaken malekat e tanna ku babo bara Petrus, ingetina ia nina, “Kekekenlah!” Minter mosar rante si ngiket tan Petrus.

⁸Jenari nina malekat man bana, “Genditkenlah genditndu janah pake sepatundu!” Ikutken Petrus kata malekat e jenari nina ka malekat, “Pake jubahndu jenari ikutken aku!”

⁹Ikutken Petrus malekat ndarat i bas penjara nari. Amin bage gia labo ia sedar maka kai si ibahan malekat nandangi ia, e me kejadin si tuhu-tuhu. IAkapna maka ia ngaloken sada pengenehenen.

¹⁰Ibentasina penjagan si pemena, si peduaken janah seh pe ia ku gerbang besi dalan ndarat. Talang jine gerbang besi e asum ia mentas. Kenca seh i darat erdalan ia duana arah sada gang, jenari rempet itadingken malekat e Petrus.

¹¹Kenca sedar Petrus nina, “Genduari enggo kueteh maka tuhu-tuhu aku enggo ipulahi Dibata. Isuruh Tuhan malekatNa mulahi aku i bas kuasa Herodes nari bage pe i bas sura-sura kalak Jahudi nari.”

¹²Kenca tuhu-tuhu kal ia sedar, lawes ia ku rumah Maria nande Johanes Markus. I bas rumah e nterem kalak pulung ertoto.

¹³Asum erlebuh Petrus i pintu gerbang nari, reh sekalak juak-juak diberu, gelarna si Rode. Ipepayona ise si erlebuh e.

¹⁴Itandai Rode maka sora e, sora Petrus. Perbahan riahna ukurna kiam ia mulihken ku rumah, lanai ingetna pe nalangi pintu gerbang e. Ikatakenna man kalak si pulung maka Petrus tedis i lebe-lebe pintu gerbang.

¹⁵Tapi ngaloi kalak e man bana nina, “Adon kam.” Tapi igegehi Rode ngatakenca maka tuhu Petrus i darat. Nina kalak e, “Malekatna nge.”

¹⁶Tapi perbahan la erngadi-ngadi Petrus nuktuki, e maka dungna italangi kalak ndai. Kenca idahna Petrus mamang kal atena.

¹⁷Ibahan Petrus tanda alu tanna gelah ola gejek. Jenari iturikenna man si pulung e kuga Tuhan enggo mulahi ia i bas penjara nari. Tole nina, “Beritakenlah si enda man Jakup ras man kerina senina-seninanta.” Kenca bage ndarat ia dingen lawes ku ingan si deban.

¹⁸Pepagina kenca terang wari, gejek kerina perajurit-perajurit dingen mbiar ia. Nina sapih-sapih ia, “Kai nge si enggo jadi nandangi Petrus?”

¹⁹E maka isuruh Herodes perajurit-perajurit ndarami Petrus, tapi la idatna. E maka iperiksa Herodes perajurit-perajurit si erjaga jenari iperentahkenna munuh perajurit-perajurit e. Kenca si e lawes Herodes i Judea nari, pindah ia ku Kesarea.

²⁰Nembeh kal ate Herodes gelgel nari nandangi kalak Tirus ras kalak Sidon. E maka ersada arihna ndahi Herodes, sabap biasana ia ndatken pangan i bas negeri Raja Herodes e nari. Perlebe itami-tamina Blastus; Blastus e me sekalak kepala pegawai istana raja. Jenari ngadap ia man Raja Herodes mindo perdamen.

²¹I bas sada wari si enggo itetapken Herodes, ipake Herodes paken kerajanna janah kundul ia i kursi kinirajanna. Jenari ngerana ia man kalak e.

²²Kalak si nterem ersurak-surak nina, “Labo manusia si ngerana enda, tapi sekalak dibata kap.”

²³Minter iparap malekat Tuhan si Herodes, sabap iperajangna kemulian si arusna ibereken man Dibata. Berngan ia, jenari mate.

²⁴Tapi Kata Dibata reh mbarna dingen reh teremna kalak si megisa.

²⁵Barnabas ras Saul mulih i Jerusalem nari kenca idungina dahinna i je. Ikut pe ras ia Johanes Markus.