Read Batak Karo PERBAHANEN RASUL-RASUL 14 Bible Online

PERBAHANEN RASUL-RASUL 14 - Batak Karo bible

PERBAHANEN RASUL-RASUL 14

¹I Ikoni pe bengket rasul si dua kalak e ku bas rumah pertoton kalak Jahudi. Bage ulina carana ngajar i je seh maka nterem kal kalak Jahudi ras si labo Jahudi tek man Jesus.

²Tapi kalak Jahudi si tetap la tek man Jesus ngajuk-ngajuk kalak si la nandai Dibata gelah ngelawan kalak si enggo tek e.

³Paulus ras Barnabas ndekah ringan i Ikoni. Ngajar ia alu terang-terangen sabap tek ia maka Tuhan si nampati ia. Ipegegehi Tuhan Berita kerna lias ateNa alu mereken kuasa man rasul-rasul guna erbahan tanda-tanda sengget si mbelin.

⁴Anak kuta e erbelah jadi dua golongan, deba engkapiti kalak Jahudi, janah deba ka engkapiti rasul-rasul.

⁵Jenari ersada ukur kalak si labo Jahudi ras kalak Jahudi, bage pe peminpin-peminpin guna erbahan sada geraken ngelawan rasul-rasul. Isiksana atena rasul-rasul e janah ibenterina atena alu batu.

⁶Kenca ieteh rasul-rasul sura-sura kalak e, lawes ia ku kuta-kuta i Likaoni, e me Listera, Derbe ras daerah sekitarna.

⁷I je pe iberitaken Berita Si Meriah.

⁸I Listera lit sekalak dilaki si la megegeh nahena. Tangtang tubuh nari kin ia bage, janah langa pernah ia erdalan.

⁹Asum Paulus ngerana, kundul ia i je megikenca. Paulus mperdiateken ia janah idahna maka ia enggo tek janah banci ipepalem.

¹⁰E maka nina Paulus alu sora megang, “Tedisken, pepinter nahendu!” Lompat ia jenari erdalan.

¹¹Kenca idah kalak si nterem kai si enggo ibahan Paulus, ersurak ia i bas cakap Likaoni nina, “Dewa-dewa enggo nusur ku tengah-tengahta bagi rupa manusia!”

¹²Ikatakenna Barnabas dewa Zeus janah Paulus ikatakenna Hermes, sabap ia me si ngerana e.

¹³E maka reh imam dewa Zeus i rumah pertotonna nari i darat kuta, ibabana lembu jenggina ras bunga ku pintu gerbang kuta. Atena erbahan persembahen ras kalak si nterem man rasul-rasul e.

¹⁴Kenca ibegi rasul Barnabas ras Paulus kai ate kalak enda ibahanna, icaingkenna uisna jenari kiam ia ku tengah-tengah jelma si nterem e janahna serko nina,

¹⁵“O teman-teman, ngkai maka bagenda perbahanenndu? Kami pe manusia kap bali ras kam. Kami reh ku jenda meritaken Berita Si Meriah man bandu, gelah tek kam man Dibata si nggeluh si njadiken langit, doni, lawit ras kerina isina; gelah olanai ilakokenndu perbahanen si sia-sia enda. [87†]

¹⁶I bas paksa-paksa si enggo lewat ipelepas Dibata kerina manusia erbahan bagi ate-atena.

¹⁷Tapi IA tetap encidahken DiriNa arah perbahanenNa si mehuli. IpesusurNa udan i langit nari janah iberekenNa paksa mbuah page. IberekenNa man bandu pangan janah meriah ukurndu ibahanNa.”

¹⁸Aminna gia bagenda ikataken rasul-rasul, menam-menam la ia ngasup ngambati kalak si nterem e erbahan persembahen man bana.

¹⁹Piga-piga kalak Jahudi reh i Antiokia, i daerah Pisidi nari, ras Ikoni. IAjuk-ajukna kalak si nterem gelah ngikutken katana. Jenari ibenterina Paulus alu batu janah isarenna ku darat kuta. IAkapna Paulus enggo mate.

²⁰Tapi asum kalak si enggo tek e tedis engkeleweti ia, keke ia jenari mulihken ia ku bas kuta. Pepagina lawes ia ras Barnabas ku Derbe.

²¹I Derbe pe iberitaken Paulus ras Barnabas Berita Si Meriah janah nterem ibahanna kalak tek man Jesus. Kenca bage mulihken ia ku Listera, jenari ku Ikoni, janah i Ikoni nari mulihken ia ku Antiokia i Pisidi.

²²I bas tep-tep kuta ipegegehina ukur ajar-ajar janah iajarina gelah tetap ia tek man Tuhan. Nina ngajar, “La banci lang sibentasi lebe erbage-bage kiniseran i bas mengketi Kinirajan Dibata.”

²³I bas tep-tep perpulungen itentuken rasul-rasul e pertua-pertuana. Kenca ertoto man Dibata dingen erpuasa, iendeskenna pertua-pertua e man Tuhan si itekina.

²⁴Kenca ibentasi rasul si dua kalak e daerah Pisidi, lawes ia ku Propinsi Pampilia.

²⁵Iberitakenna Kata Dibata i Perge, jenari lawes ia ngincuah ku Atalia.

²⁶I Atalia nari erlayar ia mulih ku Antiokia; i Antiokia me nai duana ia enggo iendesken ku bas lias ate Dibata guna ndahiken dahin si enggo idungina enda.

²⁷Kenca seh i Antiokia ipepulungna kalak si enggo tek man Jesus. Iturikenna man perpulungen e kai si enggo ibahan Dibata arah ia. Iturikenna pe kuga enggo icidahken Dibata maka man si labo kalak Jahudi pe pintun kiniteken enggo talang tuhu-tuhu.

²⁸Paulus ras Barnabas ndekah ringan i je ras perpulungen.