Read Batak Karo PERBAHANEN RASUL-RASUL 15 Bible Online

PERBAHANEN RASUL-RASUL 15 - Batak Karo bible

PERBAHANEN RASUL-RASUL 15

¹Lit piga-piga kalak reh i Judea nari ku Antiokia janah iajarina kalak si enggo tek man Jesus nina, “Labo kam terkelin ibahan Dibata adi la kin kam isunatken bagi iaturken Undang-undang Musa.” [88†]

²Pengajaren kalak enda ilawan Paulus ras Barnabas tuhu-tuhu seh jadi perjengilen si mesangat. E maka dungna ersada arih perpulungen gelah Paulus ras Barnabas bage pe piga-piga kalak anggota perpulungen berkat ku Jerusalem ndahi rasul-rasul ras pertua-pertua guna ncakapken persoalen enda.

³Itaruhken perpulungen ia seh ku darat kuta. Jenari erdalan ia arah Penike ras Samaria. I bas kuta-kuta si ibentasina, iturikenna man kalak si enggo tek maka si la kalak Jahudi pe enggo robah. Meriah ukur perpulungen megi berita enda.

⁴Kenca seh i Jerusalem, ngalo-ngalo perpulungen, rasul-rasul ras pertua-pertua. Iturikenna man kalak e kai si enggo ibahan Dibata arah ia.

⁵Tapi tedis piga-piga kalak i bas kalak Parisi si enggo tek jenari nina, “Si labo kalak Jahudi e arus isunatken lebe, jenari ikutkenna Undang-undang Musa.”

⁶E maka ersidang rasul-rasul ras pertua-pertua guna ncakapken persoalen e.

⁷Kenca ndekah ngerana, janah percakapen e lalap la erkedungen, tedis Petrus, jenari nina, “O senina-senina, ietehndu maka nai nari aku enggo ipilih Dibata i tengah-tengahndu nari guna meritaken Berita Si Meriah man si labo kalak Jahudi gelah ibegina dingen tek ia. [89†]

⁸Janah Dibata, si nandai perukuren manusia, enggo encidahken maka si labo kalak Jahudi pe iakuiNa nge. IcidahkenNa e alu mereken Kesah Si Badia man kalak e bali ras iberekenNa man banta. [90†]

⁹Labo erndobah idahNa kita ras si labo kalak Jahudi. IbersihkenNa ukur kalak e perbahan ia tek.

¹⁰Dage ngkai maka genduari icubaindu Dibata alu namaken baban si mberat man ajar-ajar e? Nininta nai bage pe kita jine labo ngasup mersansa.

¹¹Tapi sebalikna, tek kita, maka erkiteken lias ate Tuhan Jesus kita terkelin bali ras si labo kalak Jahudi.”

¹²Sinik kerina kalak si pulung e. Jenari ibegikenna Paulus ras Barnabas nuriken kerina tanda-tanda sengget si mbelin si enggo ibahan Dibata arah ia i tengah-tengah si labo kalak Jahudi.

¹³Kenca dung ngerana Paulus ras Barnabas, ngerana ka Jakup, nina, “O senina-senina, begikenlah katangku enda!

¹⁴Enggo ituriken Simon kuga nai tangtangna Dibata ndahi kalak si la nandai Dibata janah ipilihNa sada bangsa i bas kalak e nari jadi si kerajangenNa.

¹⁵Si enda sue ras si ikataken nabi-nabi bagi tersurat i bas Pustaka Si Badia,

¹⁶‘Nina Tuhan: Kenca si enda mulihken Aku pagi; janah Kupajekken mulihi rumah Daud si enggo runtuh. Runtuh-runtuhna e Kubahan jadi mbaru janah Kubangun rumah e mulihi. [91†]

¹⁷Gelah kerina kalak si deban ndarami Tuhan, kerina si labo kalak Jahudi si enggo Kudilo jadi si kerajangenKu.

¹⁸Enda me si enggo ikataken Tuhan, si erbahanca nai ieteh kalak kerna si enda.’ ”

¹⁹Iterusken Jakup ngerana nina, “Adi kuakap, ola sisusahi si labo kalak Jahudi si enggo erpengendes man Dibata e.

²⁰Tapi sibahanlah surat man bana gelah ola ipanna pangan si la bersih si enggo ipersembahken man dibata-dibata palsu; gelah ola ia erlagu la mehuli; gelah ola ipanna dareh ntah asuh-asuhen si mate la perbahan igeleh. [92†]

²¹Sabap nai nari Undang-undang Musa iberitaken i tep-tep kuta, janah seh asa genduari iogeken i bas rumah pertoton tep-tep wari Sabat kalak Jahudi.”

²²Jenari ersada arih rasul-rasul, pertua-pertua ras kerina ngawan perpulungen guna netapken utusen si berkat ras Paulus bage pe Barnabas ku Antiokia. Itetapkenna Silas ras Judas si igelari Barsabas. Kalak enda duana ihamati i bas perpulungen.

²³Arah ia isehken surat man si labo kalak Jahudi; isina bagenda, “Kami, rasul-rasul ras pertua-pertua, e me senina-seninandu, nehken berita mejuah-juah man bandu senina-senina kami si labo kalak Jahudi si ringan i kuta Antiokia, i Propinsi Siria ras Propinsi Kiliki.

²⁴Enggo ibegi kami berita, maka lit piga-piga i bas kami nari, si labo isuruh kami, nuhsahi ukurndu janah si erbahanca gulut akapndu alu pengajarenna.

²⁵Perbahan si e enggo ersada arih kami guna netapken piga-piga kalak si erberita man bandu. Ia berkat ras Barnabas bage pe Paulus, si ikelengi kami,

²⁶si enggo nggit berkorban guna gelar Tuhanta Jesus Kristus.

²⁷Dage isuruh kami Judas ras Silas gelah ikatakenna langsung man bandu isi surat kami enda.

²⁸Enggo itetapken Kesah Si Badia bage pe enggo itetapken kami maka olanai itambahi aturen-aturen si deban man bandu, selain aturen-aturen si perlu enda;

²⁹ola pan pangan si enggo ipersembahken man dibata-dibata palsu; ola pan dareh; ola pan asuh-asuhen si mate la igeleh; janah ola erlagu la mehuli. Adi ipatuhindu enda maka kam enggo erbahan si mehuli. Sibar em. Mejuah-juah.”

³⁰E maka ipeberkat me rombongen e ku Antiokia. Kenca seh ia i Antiokia, isuruhna kerina kalak si tek man Jesus pulung, jenari iberekenna surat e man bana.

³¹Meriah ukur perpulungen kenca iogena surat e, perbahan isi surat e netapken ukurna.

³²Judas ras Silas duana ia nabi; gedang ia ngerana man perpulungen e. Ipegegehina dingen ipetetapna ukur perpulungen e.

³³Kenca piga-piga wari dekahna ia i je, ipeberkat perpulungen e ia alu meriah ukur. Mulihken ia ndahi perpulungen si ngutus ia. [

³⁴Tapi mehuli iakap Silas maka ia tading i je.]

³⁵Paulus ras Barnabas ndekah ringan i Antiokia. Duana ia ras nterem kalak si deban ngajar dingen meritaken Kata Tuhan.

³⁶Piga-piga wari kenca si e nina Paulus man Barnabas, “Ota sidahi mulihi senina-seninanta ku kuta-kuta si enggo siberitaken i je Kata Tuhan. Gelah si idah dingen sieteh kuga perkembangenna.”

³⁷Ate Barnabas ikut min Johanes Markus.

³⁸Tapi Paulus erpengakap maka Johanes Markus la mehuli ibaba, sabap Johanes Markus nadingken ia mbaru enda i Pampilia dingen lanai ia ikut ras-ras ndungi dahin e. [93†]

³⁹Perbahan si e turah perubaten i bas ia duana si erbahanca ia sirang. Barnabas ras Markus erlayar ku Kiprus.

⁴⁰Tapi Paulus, ipilihna Silas. Kenca perpulungen ngendesken ia ku bas lias ate Tuhan berkat ia.

⁴¹Isiarina daerah Siria ras Kiliki janah ipegegehina kiniteken perpulungen si i je.