Read Batak Karo PERBAHANEN RASUL-RASUL 16 Bible Online

PERBAHANEN RASUL-RASUL 16 - Batak Karo bible

PERBAHANEN RASUL-RASUL 16

¹Seh pe Paulus ku Derbe ras ku Listera. I Listera lit sekalak ajar-ajar gelarna Timotius. Nandena kalak Jahudi si enggo tek man Jesus tapi bapana kalak Junani.

²Kerina kalak si tek man Jesus si ringan i Listera bage pe i Ikoni ngataken maka Timotius kalak si mehuli.

³Ate Paulus maba Timotius jadi temanna, e maka isunatkenna ia. Isunatken Paulus ia perbahan kerina kalak Jahudi i daerah e meteh maka bapa Timotius kalak Junani.

⁴Jenari berkat kalak e niari kuta-kuta. Ipesehna kai si enggo itetapken rasul-rasul ras pertua-pertua i Jerusalem gelah ipatuhi perpulungen-perpulungen.

⁵Alu bage erteguhna kiniteken perpulungen. Janah tep-tep wari reh teremna anggota perpulungen e.

⁶Perbahan Kesah Si Badia ngambati Paulus ras teman-temanna meritaken Berita Si Meriah i Propinsi Asia e maka lawes ia arah Perigia ras arah Galati.

⁷Kenca seh ia i perbalengen Misia, lawes atena ku Propinsi Bitinia. Tapi Kesah Jesus ngambati ia.

⁸E maka lawes ia ku Troas arah Misia.

⁹I bas berngi e Paulus ngaloken sada pengenehenen. I bas pengenehenen e idahna sekalak kalak Makedoni tedis janah erdilo man bana nina, “Marilah ku Makedoni, sampati kami!”

¹⁰Kenca Paulus ngaloken pengenehenen e, minter kami ersikap guna berkat ku Makedoni. Sabap tek kami maka Dibata nuruh kami meritaken Berita Si Meriah man kalak si ringan i Makedoni.

¹¹Jenari erlayar kami i Troas nari ku Pulau Samotrake. Pepagina terus kami ku Neapolis.

¹²I Neapolis nari erdalan kami ku Pilipi e me kuta i daerah si pemena i Makedoni. Penduduk kuta e, e me warga negara Roma. I bas kuta e me kami ringan piga-piga wari dekahna.

¹³Asum wari Sabat kalak Jahudi, lawes kami ku darat kuta, ku tepi lau, sabap iakap kami maka lit i je ingan ertoto kalak Jahudi. Kenca kami kundul, ngerana kami man diberu-diberu si pulung i je.

¹⁴Sekalak i bas diberu e gelarna Lidia. Ia i Tiatira nari janah dahinna erbinaga uis si meherga, ungu rupana. Ia kalak Junani si ersembah man Dibata. Italangi Tuhan ukurna, e maka tutus kal atena megiken kai si ikataken Paulus.

¹⁵IA iperidiken ras kerina isi jabuna. Jenari iundangna kami ku rumahna nina, “Adi iakapndu maka aku tuhu-tuhu enggo tek man Tuhan, marilah kesilang ku rumahku.” Ipindokenna kal gelah kami kesilang ku rumahna.

¹⁶I bas sada wari, asum kami lawes ku ingan ertoto, jumpa kami ras sekalak budak diberu. Ia erjinujung, e maka ngasup ia nuriken kejadin si langa reh. Melala untung tuanna arah ia.

¹⁷Ikut-ikutna Paulus ras kami, janah alu sora si megang nina, “Kalak enda kerina e me persuruhen Dibata si Meganjang. Iturikenna man bandu dalan keselamaten.”

¹⁸Piga-piga wari ibahanna bage seh dungna lanai sabar Paulus. E maka erkusur Paulus, isergangina setan e nina, “I bas gelar Jesus Kristus kusuruh kam ndarat i bas diberu enda nari.” I bas paksa e pe minter ndarat setan e.

¹⁹Kenca idah tuanna maka lanai ia banci dat duit arah diberu e nari, itangkapna Paulus ras Silas, jenari isarenna ku bale i tiga.

²⁰Ibabana ia ku lebe-lebe Pemerentah Roma janah nina, “Kalak enda kalak Jahudi; janah iguntarina kutanta enda.

²¹IAjarkenna adat si la banci sibahan rikutken undang-undangta kalak Roma.”

²²Kalak si nterem pe ikut ngelawan Paulus ras Silas. Icaingken pengulu-pengulu bale e uis Paulus ras uis Silas jenari isuruhna perajurit ngeligasisa.

²³Kenca mesangat Paulus ras Silas iligasina, itamakenna ia ku bas penjara. Iperentahken pengulu-pengulu e man kepala penjara gelah ijagai kal rasul-rasul e.

²⁴Sue ras perentah e, itamaken kepala penjara e ia duana ku bas kamar si arah tengahna kal. Nahena i pasungna i bas beloti si galang.

²⁵Tapi kira-kira tengah berngi Paulus ras Silas ertoto dingen rende muji Dibata, janah kalak tahanen si deban megiken ia.

²⁶Rempet jadi linur mehantu, si erbahanca mugur-ugur palas penjara e. Talang kerina pintun rumah penjara; bage pe rante-rante si ngiket tan kalak tahanen e nangtangen.

²⁷Medak kepala penjara, janah kenca idahna enggo talang pintun penjara, iakapna kerina kalak tahanen e enggo kiam. E maka idekdekna pedangna, ibunuhna atena bana.

²⁸Tapi alu sora si megang nina Paulus, “Ola sakiti bandu, sabap i jenda denga nge kami kerina!”

²⁹Isuruh kepala penjara sekalak juak-juak maba lampu jenari kiam ia ku bas. Nggirgir kal ia, isembahna Paulus ras Silas.

³⁰Jenari ibabana Paulus ras Silas ndarat, janah nina, “O tuan, kai arus kubahan gelah aku terkelin?”

³¹Ngaloi rasul-rasul nina, “Teklah man Tuhan Jesus gelah kam terkelin, e me kam ras isi jabundu.”

³²Jenari iberitaken rasul-rasul e Kata Tuhan man bana ras man kerina isi jabuna.

³³I bas jam berngi si ndai pe ibaba kepala penjara e rasul-rasul ndai ku bas sada ruangen jenari itambarina luka-lukana. Kenca bage iperidiken rasul-rasul kepala penjara ras isi jabuna.

³⁴Ibaba kepala penjara e rasul-rasul ndai ku rumahna jenari isuruhna man. Meriah kal ukur kepala penjara ras isi jabuna perbahan enggo tek ia man Dibata.

³⁵Kenca terang wari isuruh pengulu-pengulu piga-piga kalak perajurit ndahi kepala penjara guna ngataken, “Pulahi si dua kalak e!”

³⁶Kata enda ikataken kepala penjara ka man Paulus nina, “Pengulu-pengulu kuta enda nuruh aku mulahi kam ras Silas. E maka enggo banci kam ndarat; lawes lah alu mejuah-juah.”

³⁷Tapi nina Paulus man perajurit e, “Kami warga negara Roma kap. Langa pe idatna kesalahen kami, enggo iligasina kami i lebe-lebe jelma si nterem. Jenari itamakenna kami ku bas penjara. Janah genduari atena mulahi kami bage-bage saja? Lang, la kami nggit! Suruh pengulu-pengulu kuta enda ku jenda mulahi kami.”

³⁸Ipeseh perajurit e kata enda man pemerentah. Mbiar ia kenca ibegina maka Paulus ras Silas warga negara Roma.

³⁹E maka berkat ia mindo maap man Paulus ras Silas. Kenca bage ibabana rasul-rasul e ndarat i bas penjara e nari janah ipindokenna gelah lawes rasul-rasul nadingken kuta e.

⁴⁰Itadingken Paulus ras Silas penjara e jenari lawes ia ku rumah Lidia. Kenca jumpa ia ras senina-senina si sada kiniteken janah kenca ipetetapna ukur senina-senina e, berkat ia nadingken kuta e.