Read Batak Karo PERBAHANEN RASUL-RASUL 18 Bible Online

PERBAHANEN RASUL-RASUL 18 - Batak Karo bible

PERBAHANEN RASUL-RASUL 18

¹Kenca bage itadingken Paulus kuta Aten janah lawes ia ku Korinti.

²I Korinti jumpa ia ras sekalak Jahudi gelarna si Akuila, asalna i Propinsi Pontus nari. Langa ndekahsa ia reh i Italia nari ras ndeharana Persila. Pindah ia ku Korinti i Italia nari sabap kerina kalak Jahudi ipelawes Klaudius, Kaisar Roma, i Roma nari. Idahi Paulus kalak enda ndai.

³Janah perbahan seri pendahinna, e me erbahan tenda, e maka i rumahna Paulus kesilang.

⁴Tep-tep wari sabat kalak Jahudi, ngerana Paulus i bas rumah pertoton. IAjarina kalak Jahudi ras kalak Junani gelah tek man Jesus.

⁵Kenca reh Silas ras Timotius i Makedoni nari, meritaken Berita Si Meriah nari ngenca dahin Paulus. Iturikenna man kalak Jahudi maka Jesus e me Raja si ipadanken Dibata.

⁶Tapi asum ia ijabapi dingen icekuraki kalak enda ikipaskenna abu si leket i bas uisna, janah nina man kalak e, “Adi bene kam i bas Dibata nari, kam jine nge nggengkenca. Aku lanai ersalah i bas si e. Mulai genduari nari kudahi me si labo kalak Jahudi.”

⁷Jenari itadingken Paulus kalak ndai, lawes ia ku rumah Titus Justus. Ia labo kalak Jahudi tapi isembahna Dibata. Rumahna e i samping rumah pertoton.

⁸Pengulu rumah pertoton e gelarna Krispus. Ia ras kerina isi jabuna tek man Tuhan. Kenca megi pengajaren Paulus, nterem pe kalak Korinti tek dingen iperidiken.

⁹I bas sada berngi Paulus ngaloken sada pengenehenen. I bas pengenehenen e nina Tuhan man bana, “Ola mbiar, tapi teruslah beritaken, ola kam surut,

¹⁰sabap Aku tetap ras kam. Labo ise pe pang pesega-sega kam sabap nterem kalak si enggo Kupilih i bas kuta enda.”

¹¹E maka sada setengah tahun dekahna Paulus i bas kuta e, iajarkenna Kata Dibata man anak kuta e.

¹²Tapi kenca Galio jadi Gubernur i Propinsi Akaya ersada arih kalak Jahudi guna ngelawan Paulus. Ibabana Paulus ras-ras ku lebe-lebe Gubernur gelah iadili.

¹³Nina kalak Jahudi e, “Ibabaina kalak si nterem nembah man Dibata alu cara si bertentangen ras Undang-undang.”

¹⁴Asum ngerana ate Paulus, leben Galio ngerana man kalak Jahudi e nina, “O kalak Jahudi, bicara kin min si iadukenndu enda kerna kesalahen ntah kejahaten banci kualoken pengadunndu e.

¹⁵Tapi perbahan si enda perubaten kerna kata-kata, gelar-gelar ras Undang-undangndu jine, kam sajalah ndungisa. I bas persoalen si bagenda labo aku nggit jadi hakimndu.”

¹⁶Jenari ipelawes Galio kalak ndai kerina i bas ruangen e nari.

¹⁷Tapi kerina kalak e nangkap Sostenes, pengulu rumah pertoton. Ipekpekina ia i lebe-lebe gedung pengadilen. Tapi la diate Galio pe.

¹⁸Kenca si e ndekah denga Paulus tading i Korinti. Jenari itadingkenna senina-senina si sada kiniteken e, lawes ia erlayar radu Persila ras Akuila ku Siria. Ope denga erlayar iguntingna bukna i Kenkerea rikutken padanna man Dibata. [95†]

¹⁹[19-21] Kenca seh i Epesus lawes Paulus ku rumah pertoton janah ercakap-cakap ia ras kalak Jahudi. Ipindoken kalak Jahudi e gelah ola min lebe lawes Paulus i kuta e nari, tapi pemindonna enda itulak Paulus. Muatna berkat nina man kalak Jahudi e, “Reh nge pagi aku mulihken ndahi kam, adi bage ate Dibata.” Jenari erlayar Paulus i Epesus nari, tapi Persila ras Akuila tading i kuta e.

²²Kenca seh Paulus i Kesarea, terus ia nangkeng ku Jerusalem. Kenca ia ngerana ras perpulungen Jerusalem lawes ia ku Antiokia.

²³Kenca piga-piga wari dekahna ia i Antiokia berkat ka ia. Isiarina taneh Galati ras Perigia guna mpegegehi kiniteken perpulungen.

²⁴Sanga si e lit me sekalak kalak Jahudi reh ku Epesus. Gelarna Apolos; kutana i Aleksandria. Ia sekalak si beluh ngerana janah melala pemetehna kerna Pustaka Si Badia.

²⁵Enggo ipelajarina kerna Dalan Kegeluhen si ituduhken Tuhan. Alu ukur ergiah-giah iajarkenna kerna Jesus alu payo, tapi peridin Johanes ngenca ietehna.

²⁶Pang kal ia ngajar i rumah pertoton. Tapi kenca ibegi Persila ras Akuila pengajaren Apolos, ibabana Apolos ku rumahna jenari alu lebih tepat ipejelasna man Apolos kerna Dalan Kegeluhen si ituduhken Dibata.

²⁷Kenca bage iputusken Apolos maka lawes ia ngepar ku Propinsi Akaya. E maka ibahan perpulungen e surat man perpulungen si lit i Akaya gelah ialo-alona Apolos alu mehuli. I Akaya mbelin kal penampat Apolos man kalak si enggo tek man Jesus arah lias ate Dibata.

²⁸Alu la biar-biaren ijabapina kalak Jahudi i lebe-lebe kalak si nterem. Alu ngogeken ayat-ayat Pustaka Si Badia ibuktikenna maka Jesus e kap si Engkelini si ipadanken Dibata.