Read Batak Karo PERBAHANEN RASUL-RASUL 2 Bible Online

PERBAHANEN RASUL-RASUL 2 - Batak Karo bible

PERBAHANEN RASUL-RASUL 2

¹Asum wari raya Pentakosta, pulung kerina kalak si tek man Tuhan Jesus i bas sada ingan. [10†]

²Paksa si e rempet lit sora terbegi reh i langit nari bagi sora angin rembus erdeso. Sora ndai ndemi rumah inganna pulung e.

³Kenca bage lit idah kalak ndai tempa-tempa bagi dilah api merap kujah-kuje encinepi ia sada-sadai.

⁴Kerina si pulung e dem alu Kesah Si Badia janah ngerana ia i bas cakap si deban, bagi ibere Kesah e ia ngerana.

⁵I Jerusalem nterem ringan kalak Jahudi si tutus nembah man Dibata, si enggo reh i belang-belang doni enda nari.

⁶Asum ibegina sora e, rehen ia. Mamang kal atena sabap i bas cakapna jine rasul-rasul e ngerana.

⁷Mamang kal atena, e maka nina, “Ma kin kerina si ngerana enda kalak Galilea?

⁸Engkai ndia maka sibegi ia ngerana i bas cakapta sekalak-sekalak?

⁹Kita i Partia, Media ras Elam nari, i Mesopotami, Judea ras Kapadokia nari; i Pontus ras i Asia nari,

¹⁰i Perigia ras i Pampilia nari, i Mesir ras taneh Libia deher Kirene nari. Piga-piga kalak i bas kita i Rum nari.

¹¹Kalak Jahudi ras kalak si deban si enggo i Jahudiken; janah piga-piga kalak i bas kita i Kreta nari ras i Arab nari -- amin bage gia kerina kita megi ia ngerana i bas cakapta sekalak-sekalak kerna perbahanen si mbelin si enggo ilakoken Dibata.”

¹²Kerina ia jengang dingen mamang atena janah nungkun ia sapih-sapih ia nina, “Kai ertina kerina enda?”

¹³Tapi lit ka si nawaisa nina, “Mabuk kap ia e.”

¹⁴E maka tedis Petrus ras rasul-rasul si sepuluh sada kalak e, janah alu megang sorana nina, “O kam kalak Jahudi, bage pe kam kerina si ringan i Jerusalem, begiken! Kuturiken man bandu kai kin ertina kejadin enda.

¹⁵Kalak enda labo mabuk bagi pengakapndu, sabap genduari pe jam siwah denga erpagi-pagi.

¹⁶Kejadin enda me si ikataken nabi Joel nina,

¹⁷‘Enda me pagi si kubahan i bas wari-wari pendungi nina Dibata, Kucurcurken pagi KesahKu man kerina manusia. Anakndu si dilaki ras si diberu ernubuat; anak perana si lit i tengah-tengahndu ngidah pengenehenen janah; kalak si enggo metua si lit i tengah-tengahndu ngaloken nipi. [11†]

¹⁸Man serayan-serayanKu si dilaki ras si diberu Kucurcurken pagi KesahKu i bas wari e, janah ia pe ernubuat.

¹⁹Kubahan pagi tanda-tanda sengget i langit ras i doni. E me dareh, api ras cimber si erdipul;

²⁰matawari jadi gelap, janah bulan megara bagi dareh, ope denga seh wari kerehen Tuhan, wari si mbelin dingen mulia.

²¹Janah ise pe si ernalem man kuasa Tuhan terkelin me!’

²²Begiken kata enda o kalak Israel! Jesus kalak Nasaret e, tuhu-tuhu si isuruh Dibata sabap i bas IA enggo icidahken Dibata kuasaNa, alu ncidahken kejadin-kejadin si mejin i tengah-tengahndu.

²³Sue ras sura-sura Dibata, iendeskenNa Jesus man bandu. Ibunuhndu IA alu nuruh bangsa si deban makukenca ku kayu persilang. [12†]

²⁴Tapi IA enggo ipekeke Dibata i bas si mate nari; ipulahiNa IA i bas kuasa kematen nari, sabap la mungkin IA tetap i bas kuasa kematen e. [13†]

²⁵Bagi enggo ikataken Daud kerna Jesus, ‘Katawari pe kuidah Tuhan i lebe-lebengku; IA ras aku, e maka tetap ukurku. [14†]

²⁶Perbahan si e meriah ukurku janah babahku ersurak dem keriahen; Tambah si e, aminna gia aku manusia si ermasap-masap tetap nge aku i bas pengarapen,

²⁷sabap labo itadingkenNdu aku i bas ingan kalak si mate; labo ipelepasndu daging suruh-suruhenNdu si tutus melengas i bas kuburen.

²⁸Enggo icidahkenNdu man bangku dalan ku kegeluhen, janah perbahan Kam ras aku tuhu-tuhu meriah kal kuakap.’

²⁹Senina-senina, terus terang kukataken man bandu kerna nininta Raja Daud. Ia enggo mate dingen ikuburken. Kuburenna e si idah denga genduari.

³⁰IA sekalak nabi, janah ietehna padan Dibata man bana. Dibata erpadan ngangkat sekalak kesusuren Daud jadi raja bali ras ia. [15†]

³¹Janah perbahan enggo ieteh Daud kai si nandangi ibahan Dibata, e maka ernubuat ia kerna kekeken Raja si ipadanken Dibata e, asum nina, ‘IA labo itadingken i bas ingan kalak mate; dagingNa labo melengas i bas kuburen.’

³²Jesus me si enggo ipekeke Dibata i bas si mate nari e, janah kami saksina kerna si e.

³³IA enggo iangkat ku kemuhen Dibata. IA enggo ngaloken Kesah Si Badia i bas Dibata nari bagi enggo ipadanken BapaNa e. Janah kai si idah dingen si ibegindu genduari, e me Kesah Si Badia si ialokenNa i bas BapaNa nari e si iberekenNa man kami.

³⁴Sabap labo Daud si nangkih ku Surga; ia pe ngataken: ‘Nina TUHAN man Tuhanku, [16†]

³⁵Kundulken arah kemuhenKu seh Kutamaken musuh-musuhNdu i teruh tapak-tapak naheNdu.’

³⁶Dage, kerina min kalak Israel metehsa maka Jesus si ipakuken ku kayu persilang e, IA itetapken Dibata jadi Tuhan dingen Raja si engkelini bangsaNa.”

³⁷Kenca ibegi kalak si nterem kai si ikataken Petrus, ceda atena. E maka isungkunna Petrus ras rasul-rasul si deban nina, “O senina-senina kai dage si arus ibahan kami?”

³⁸Erjabap Petrus man bana, “Jeralah janah alokenlah peridin i bas gelar Jesus Kristus, gelah dosa-dosandu ialemi Dibata, janah ialokenndu pe pemereNa e me Kesah Si Badia.

³⁹Sabap enggo ipadanken Dibata man bandu ras anak-anakndu, bage pe man kerina kalak si ndauh i bas Dibata nari, e me kerina kalak si idilo Tuhan Dibatanta ku IA.”

⁴⁰Melala denga kata si deban ituriken Petrus i bas ia ngajari kalak si nterem e nina, “Pulahilah bandu i bas ukumen si reh ku bangsa si jahat enda!”

⁴¹Nterem kalak si megi kata Petrus e tek dingen mindo gelah iperidiken. I bas wari e lit kira-kira telu ribu kalak tambah ku bas perpulungen e.

⁴²Perpulungen e tutus megiken pengajaren i bas rasul-rasul nari. Nggeluh ia sikeleng-kelengen bagi si ersenina. Ras-ras ia ncepik-ncepik roti dingen ras-ras pe ia ertoto man Dibata.

⁴³Melala tanda-tanda sengget ras kejadin-kejadin si mejin ibahan rasul-rasul. Perbahan si e kerina kalak e erkemalangen man Dibata.

⁴⁴Kerina kalak si enggo tek man Jesus e tetap pulung ras-ras janah kai si lit i bas ia ipakena ras-ras. [17†]

⁴⁵Idayakenna taneh ras erta-ertana janah duitna ibagi-bagikenna sue ras keperlun sekalak-sekalak.

⁴⁶Alu ersada ukur tep-tep wari ia pulung i bas Rumah Pertoton. Ras-ras ia kerina man i bas rumahna alu meriah dingen ukur meteruk.

⁴⁷Ipujina Dibata, janah kerina kalak erngena ate man perpulungen e. Tep-tep wari itambahi Tuhan ku perpulungen e kalak si iselamatkenNa.