Read Batak Karo PERBAHANEN RASUL-RASUL 20 Bible Online

PERBAHANEN RASUL-RASUL 20 - Batak Karo bible

PERBAHANEN RASUL-RASUL 20

¹Piga-piga wari kenca guntar ndai ipepulung Paulus ajar-ajar jenari pegegehina ukur ajar-ajar e. Janah kenca sisalam-salamen, berkat ia ku Makedoni.

²Isiari Paulus taneh e, iajari dingen ipegegehina ukur kalak si enggo tek man Jesus jenari seh ia i Junani, Propinsi Akaya.

³Kenca telu bulan dekahna i je erlayar atena ku Siria. Tapi perbahan ibegina berita maka kalak Jahudi ersura-sura munuh ia, e maka mulihken ia arah Makedoni.

⁴IA itemani Sopater anak Pirus si i Berea nari, Aristarkus ras Sekondus duana i Tesalonika nari, Gayus i Derbe nari, Timotius ras dua kalak i Asia nari e me Tikikus ras Tropimus.

⁵Kalak enda kerina leben berkat janah itimaina kami i Troas.

⁶Kenca lepas Wari Raya Roti si la erragi erlayar kami i Pilipi nari janah kenca lima wari maka kami seh i Troas dingen jumpa ras teman-teman kami. I Troas pitu wari kami dekahna.

⁷I bas wari Sabtu berngi pulung kami ras-ras guna man ras-ras. Asum si e ngerana Paulus man perpulungen seh mbages berngi, sabap berkat atena pepagina.

⁸Melala lampu ipasang i bas ruangen i datas loteng ingan kami pulung e.

⁹Sekalak anak perana gelarna Etikus kundul i jendela. Perbahan dekahna Paulus ngerana, munduk-unduk kal anak perana e. Dungna tunduh ia, jenari ndabuh ia ku teruh i datas tingkat telu nari. Asum iangkat kalak e ia, tapi enggo mate.

¹⁰Nusur Paulus ku teruh jenari tungkuk ia, idakepna anak perana e janah nina man kalak si pulung, “Ola aru atendu, ia nggeluh denga nge.”

¹¹Kenca bage mulihken Paulus ku datas loteng, icepik-cepikna roti. Jenari man ia ras kalak si enggo tek man Jesus e. Kenca dung man ndekah denga ia ngerana ras perpulungen e, seh terang wari, jenari berkat ia.

¹²Anak perana e itaruhken perpulungen ku rumahna. Meriah kal ukur perpulungen sabab nggeluh denga ia.

¹³Jenari leben kami berkat ku kapal janah erlayar ku Asos. Ate kami ninggahi Paulus i Asos bagi enggo isuruhna, perbahan ia erdalan arah daraten ku jah.

¹⁴Kenca jumpa kami i Asos, ibaba kami ia ku kapal jenari terus erlayar ku Mitilena.

¹⁵I Mitilena nari terus kami erlayar janah pepagina ka maka kami seh i bas sada ingan si petala-tala ras Kios. Sada wari nari ka kenca si e seh kami i Samos janah pepagina ka i Miletus.

¹⁶Enggo itetapken Paulus maka la ia singgah arah Epesus gelah ola ndekah i Propinsi Asia. Merudu Paulus sabap adi banci seh min atena i Jerusalem asum wari Pentakosta.

¹⁷E maka isuruh Paulus sekalak i Miletus nari ku Epesus ngelegi pertua-pertua Epesus.

¹⁸Kenca reh pertua-pertua e nina Paulus man bana, “Ietehndu kuga aku nggeluh dingen erdahin tep-tep wari i tengah-tengahndu mulai kin tangtangna seh aku i daerah Asia.

¹⁹Alu meteruk ukur kudahi dahin Tuhan. I bas dahin e melala iluhku mambur janah melala percuban man bangku i bas kalak Jahudi nari, si ersura-sura munuh aku.

²⁰Amin bage gia la pernah aku surut nehken si mehuli man bandu. Kuberitaken dingen kuajarken man bandu berita kerna Tuhan Jesus, subuk i lebe-lebe kalak si nterem, bage pe i rumahndu.

²¹Kuusahaken pe gelah kalak Jahudi bage pe kalak si labo Jahudi jera kempak Dibata, janah gelah tek ia man Tuhanta Jesus Kristus.

²²Janah genduari arah penjemba Kesah Si Badia, lawes me aku ku Jerusalem. Labo kueteh kai pagi si jadi man bangku i jah.

²³Saja ngenca i bas tep-tep kuta si kudahi ipersingeti Kesah Si Badia man bangku maka penjara ras melala kiniseran enggo nimai aku.

²⁴Tapi labo persoalen man bangku kerna diringku, gelah min banci aku seh ku ujung perlumban dingen kudungi dahin si ibereken Tuhan Jesus man bangku, e me meritaken Berita Si Meriah kerna lias ate Dibata. [97†]

²⁵Enggo kudahi kam kerina guna meritaken Kinirajan Dibata. Janah genduari kueteh maka lanai pagi kita jumpa.

²⁶Perbahan si e, sendah kukataken man bandu: adi lit pagi kam bene i bas Dibata nari, la aku si salah.

²⁷Sabap man bandu enggo kupeseh kerina sura-sura Dibata.

²⁸E maka jagailah dirindu dingen jagai pe kerina kalak si enggo itetapken Kesah Si Badia man kepkepenndu. Permakanilah perpulungen Tuhan si enggo itebusiNa alu engkorbanken diriNa seh mate.

²⁹Kueteh pe maka kenca aku lawes, reh me serigala si merawa ku tengah-tengahndu si la alang-alangen ncedaken perpulungen e.

³⁰Bage pe i tengah-tengahndu nari keke me kalak si ngajar alu pengajaren si la tuhu. Atena narik kalak si enggo tek man Jesus jadi pengikutna.

³¹Perbahan si e erjaga-jagalah dingen inget maka telu tahun dekahna kuajari kam sekalak-sekalak suari ras berngi alu iluh mambur.

³²Janah genduari kuendesken kam ku bas pengepkepen Dibata dingen ku bas Kata lias ateNa, si Ngasup mpegegehi kam dingen mereken pasu-pasu man bandu, e me pasu-pasu si nandangi iberekenNa man kalak si enggo ipilihNa.

³³La pernah aku ersura-sura gelah ibereken man bangku pirak ntah emas ntah uis.

³⁴Kam pe ietehndu nge maka tanku enda nge erdahin guna keperlunku ras teman-temanku.

³⁵I bas si enda kerina, enggo kucidahken si man usihenndu. Kita arus mejingkat erdahin guna nampati kalak musil. Ingetlah kata si ikataken Tuhan Jesus nina, ‘Malemen kap ate ibas mere asangken ibas ngalo.’ ”

³⁶Kenca dung Paulus ngerana erjimpuh ia ras kalak e kerina dingen ertoto man Dibata.

³⁷Tangis kalak e kerina, idakepina dingen iemaina Paulus.

³⁸Ceda kal atena perbahan ikataken Paulus maka lanai pagi ia jumpa. Jenari itaruhken kalak e Paulus ku kapal.