Read Batak Karo PERBAHANEN RASUL-RASUL 21 Bible Online

PERBAHANEN RASUL-RASUL 21 - Batak Karo bible

PERBAHANEN RASUL-RASUL 21

¹Kenca kami sirang ras kalak ndai, terus kami erlayar ku pulau Kos. Pepagina seh kami i pulau Rodus, janah i Rodus nari lawes kami ku Patara.

²I Patara lit sada kapal muatna berkat ku Penike. Inangkihi kami kapal e, jenari berkat kami erlayar.

³Kenca teridah pulau Kiprus arah kawes iterusken kami erlayar ku Siria. Singgah kami arah Tirus sabap muaten kapal e ibongkar i je.

⁴Nusur kami i datas kapal nari, jenari idahi kami kalak si enggo tek man Jesus. Sada minggu dekahna kami ras kalak si enggo tek e. Bekas pengajari Kesah Si Badia alu mesek-sek nina kalak si enggo tek e man Paulus, “Ola kam lawes nangkeng ku Jerusalem.”

⁵Tapi kenca seh paksana kami berkat, iterusken kami perdalanen kami. Kerina kalak e ras ndeharana bage pe anak-anakna ikut naruhken kami ku darat kuta. I tepi lawit ras-ras kami erjimpuh ertoto man Dibata.

⁶Jenari kenca kami sisalam-salamen, nangkih kami ku kapal janah kalak e mulihken ku rumah.

⁷I Tirus nari erlayar kami ku Ptolomais. I Ptolomais idahi kami senina-senina si sada kiniteken janah i je kami sada wari.

⁸Pepagina berkat ka kami, janah seh kami i Kesarea. I Kesarea bengket kami ku rumah Pilipus. Dahin Pilipus meritaken Berita Si Meriah. Ia me salah sada i bas si pitu kalak si enggo ipilih i Jerusalem. I rumahna e me kami kesilang. [98†]

⁹Lit empat kalak anak Pilipus si nguda-nguda si enggo biasa ernubuat.

¹⁰Kenca piga-piga wari kami i kuta e, reh sekalak nabi i Judea nari gelarna Agabus. [99†]

¹¹Idahina kami, jenari ibuatna benting Paulus. Iiketkenna ku nahena ras ku tanna jine jenari nina, “Nina Kesah Si Badia: empu benting enda iiket kalak Jahudi pagi bagenda i Jerusalem janah iendeskenna pe ia man si labo kalak Jahudi.”

¹²Megi kata enda ipindoken kami alu mesangat ras perpulungen gelah ola min lawes Paulus nangkeng ku Jerusalem.

¹³Tapi ngaloi Paulus nina, “Engkai maka kam tangis? Engkai maka ilemahkenndu semangatku arah pertangisndu e. Aku enggo sikap labo saja iiket i Jerusalem, tapi pe ersedia aku ibunuh i je erkite-kiteken Tuhan Jesus.”

¹⁴La kami ngasup ngendik-ngendik Paulus gelah ola ia lawes ku Jerusalem, e maka ningkami, “Peraten Tuhanlah jadi.”

¹⁵Kenca piga-piga wari dekahna kami ringan i Kesarea, ersikap kami jenari berkat ku Jerusalem.

¹⁶Ikut pe ras kami piga-piga kalak anggota perpulungen Kesarea. Ia me si naruhken kami ku rumah Menason. I je me kami kesilang. Menason enda asalna i Kiprus nari. Ndekah me ia tek man Jesus.

¹⁷Kenca seh kami i Jerusalem, ialo-alo perpulungen kami alu meriah ukur.

¹⁸Pepagina Paulus ras kami lawes ndahi Jakup. Pertua-pertua i bas perpulungen Jerusalem e pe reh ku je.

¹⁹Paulus ngataken mejuah-juah man kalak si pulung e. Jenari iturikenna sada-sadai kerina si enggo ibahan Dibata arah pendahinna i tengah-tengah kalak si labo kalak Jahudi.

²⁰Kenca ibegi kalak ndai kai si ituriken Paulus, ipujina Dibata. Jenari nina man Paulus, “O senina, nehenlah maka enggo meribu-ribu kalak Jahudi i Jerusalem enda tek man Jesus janah kerina ia patuh man Undang-undang Musa.

²¹Enggo ibegina kerna kam maka iajarindu kerina kalak Jahudi si ringan i negeri si deban gelah nadingken Undang-undang Musa. Enggo ibegina maka ikatakenndu man kalak e gelah ola isunatken anak-anakna ntah pe gelah ola ngikutken adat kalak Jahudi.

²²Dage genduari, kai nge arus sibahan? Kugapa pe enggo ietehna maka kam enggo seh i jenda.

²³E maka ola simbakndu kai si ikataken kami man bandu. I jenda lit empat kalak si gedang bukna perbahan lit padanna man Dibata. [100†]

²⁴Ras kalak e kam ngikuti cara pembersihen rikutken aturen agama janah galari biaya persembahen kalak e gelah banci igunting bukna. Alu bage la tek kalak Jerusalem enda nandangi berita si enggo ibegina kerna kam, sabap kam jine ngikuti Undang-undang Musa.

²⁵Tapi nandangi si labo kalak Jahudi, si enggo tek man Jesus, enggo kap mbarenda sibahan surat man bana gelah ola ipanna pangan si enggo ipersembahken man berhala-berhala, bage pe gelah ola ipanna dareh tah asuh-asuhen si mate la igeleh, janah gelah ola ia erlagu la mehuli.” [101†]

²⁶E maka pepagina lawes Paulus ras si empat kalak e janah ras ia ngikuti acara pembersihen dirina rikut acara agama Jahudi. Jenari lawes ia ku Rumah Pertoton guna pebetehken ndigan warina idungi pembersihen e dingen ndigan ipersembahken persembahenna sekalak-sekalak.

²⁷Tapi asum jangka si pitu wari e nandangi dung, piga-piga kalak Jahudi si reh i Propinsi Asia nari ngidah Paulus i bas Rumah Pertoton. IAjuk-ajukna kalak si nterem e, jenari itangkapna Paulus.

²⁸Alu sora si megang nina, “O kalak Israel! Mari sampati kami! Enda me jelmana si ngajari kalak si nterem i japa pe guna ngelawan bangsanta ras ngelawan Undang-undang Musa bage pe ngelawan Rumah Pertoton enda! Janah genduari enggo ibabana pe kalak perbegu ku bas Rumah Pertoton enda! Keliamen ibahanna ingan si Badia enda!” (

²⁹Si enda ikataken sabap enggo idahna Paulus gawah-gawah i kuta e ras Tropimus kalak Epesus. IAkapna maka enggo ibaba Paulus ia ku Rumah Pertoton e.) [102†]

³⁰E maka guntar kuta e; kiamen anak kuta e reh. Itangkapna Paulus dingen isarenna ndarat i bas Rumah Pertoton e nari, janah minter ikuncina pintun Rumah Pertoton.

³¹Asum irencanakenna munuh Paulus, lit piga-piga kalak nehken berita man puanglima Roma. Iberitakenna maka lit kegujuhen i bas kuta e.

³²E maka minter ibuatna sada rombongen perajurit ras piga-piga kalak perwira, jenari alu pedas kiam ia ku tengah jelma si nterem e. Asum idah kalak si nterem puanglima ras perajurit-perajurit e, ngadi ia mekpeki Paulus.

³³Ideheri puanglima e Paulus, itangkapna janah isuruhna perajurit-perajurit ngiket Paulus alu dua rante. Jenari nungkun puanglima e nina, “Ise kin enda, janah kai kin enggo ibahanna?”

³⁴Kerina kalak si nterem e ngaloi alu sora si megang, lit si ngataken bagenda lit si ngataken bagah. Perbahan gejekna jelma si nterem e lalap la ieteh puanglima e kai si tuhuna si enggo jadi. E maka isuruhna prajuritna maba Paulus ku bas markas.

³⁵Kenca seh i tangga terpaksa iangkat perajurit-perajurit e Paulus perbahan enggo ngganas kal kalak si nterem e.

³⁶Kerina kalak si nterem e ngayakisa janah serko ia kerina alu sora si megang, “Bunuhlah ia!”

³⁷Asum Paulus nandangi ibaba perajurit e bengket ku markas, ngerana ia man puanglima e nina, “Banci aku ngerana man bandu?” Ngaloi puanglima e nina, “Ietehndu cakap Junani?

³⁸Jadi la dage kam kalak Mesir si mbaru enda erbahan pemberontaken dingen si kiam ras empat ribu kalak penghianat si ersenjata ku taneh si melungun?”

³⁹Ngaloi Paulus nina, “Aku kalak Jahudi, kutangku i Tarsus, e me kuta si terberita i Kiliki. Mindo aku man bandu gelah banci min aku ngerana man kalak si nterem enda.”

⁴⁰Ibere puanglima e Paulus ngerana. E maka tedis ia i tangga. Ibahanna tanda alu tanna gelah ola gejek kalak si nterem. Kenca teneng kalak si nterem e, ngerana Paulus i bas cakap Jahudi nina,