Read Batak Karo PERBAHANEN RASUL-RASUL 22 Bible Online

PERBAHANEN RASUL-RASUL 22 - Batak Karo bible

PERBAHANEN RASUL-RASUL 22

¹“O senina-senina ras bapa kerina; begikenlah aku ngerana i bas aku mbela diringku!”

²Asum ibegi kalak Paulus ngerana i bas cakap Jahudi reh tenengna ia kerina. Iterusken Paulus ngerana nina,

³“Aku kalak Jahudi, tubuh i Tarsus i Propinsi Kiliki tapi ipebelin-belin i kuta enda. Aku bekas murid Gamaliel. IAjarina aku kuga arusna ngikutken Undang-undang seh maka aku jadi kalak si tutus erdahin i bas Dibata bali ras kam i paksa enda. [103†]

⁴Janah enggo kusiksa seh mate kalak si ngikutken Dalan Kegeluhen si ituduhken Tuhan e. Subuk dilaki bage pe diberu kutangkap janah kutamaken ku bas penjara. [104†]

⁵Kerna si enda banci isungkunndu Imam si Mbelin ras kerina anggota-anggota sidang. Iberekenna pe man bangku surat keterangen guna ipeseh man senina-senina kalak Jahudi i Damaskus. E maka lawes aku ku jah, guna nangkapi kalak si ngikutken ajaren e, janah guna maba ia ku Jerusalem gelah iukum.”

⁶“Asum aku i bas perdalanen nandangi seh i Damaskus, kira-kira tengah wari, rempet terang i langit nari ersinalsal engkeleweti aku.

⁷Ndabuh aku ku taneh janah kubegi sora erlebuh man bangku, nina, ‘O Saul, Saul, ngkai maka iayak-ayakndu Aku?’

⁸Ngaloi aku, ‘Ise kin kam Tuhan?’ Erjabap Tuhan, ‘Aku kap Jesus, kalak Nasaret si iayak-ayakndu.’

⁹Temanku sada dalanen ngidah terang e tapi la ibegina sora si ngerana man bangku e.

¹⁰Nungkun aku man Tuhan, ‘O Tuhan, kai arus kubahan?’ Ngaloi Tuhan, ‘Kekeken janah teruskenlah ku Damaskus. I jah kari ituriken man bandu kai si enggo itetapken guna ibahanndu.’

¹¹Janah perbahan aku enggo pentang erkiteken sinalsal si sehkal silona e, e maka itegu temanku aku ku Damaskus.

¹²I Damaskus lit sekalak si tutus ngikuti Undang-undangta, gelarna Ananias. Kerina kalak Jahudi si ringan i Damaskus mehamat man bana.

¹³Idahina aku jenari nina, ‘O seninangku Saul, erpengidahlah mulihi.’ Paksa e pe minter aku erpengidah mulihi janah kunehen ia.

¹⁴Jenari nina, ‘Dibata si isembah nini-nininta enggo milih kam guna meteh sura-suraNa. Gelah idahndu PersuruhenNa si Bujur dingen gelah ibegindu langsung soraNa.

¹⁵Sabap kam me jadi saksiNa guna nuriken kai si enggo idahndu ras si ibegindu man kerina manusia.

¹⁶Janah genduari, olanai timai terdekahen. Kekekenlah, iperidikenlah kam dingen bersihkenlah dirindu i bas dosa-dosandu nari alu erlebuh man gelarNa.’ ”

¹⁷“Jenari kenca aku mulihken ku Jerusalem, i bas sada wari asum aku ertoto i bas Rumah Pertoton ah, kualoken sada pengenehenen.

¹⁸I bas pengenehenen e kuidah IA. Nina man bangku, ‘Pedasken, berkatlah i Jerusalem nari sabap kalak Jerusalem enda labo megiken kai si iturikenndu kerna Aku.’

¹⁹Ngaloi aku, ‘O Tuhan ieteh kalak kap maka aku si bengket ku bas rumah pertoton nangkapi dingen mekpeki kalak si tek man baNdu.

²⁰Janah asum saksindu si Istepanus ibunuh, aku pe i je kap. Setuju pe aku maka ia ibunuh janah aku me si njagai uis kalak si munuh ia.’ [105†]

²¹Tapi nina man bangku, ‘To, berkatlah, sabap kam me Kusuruh ndahi kalak si labo kalak Jahudi si ndauh i jenda nari.’ ”

²²Seh ngayak si enda ngenca ibegiken kalak si nterem e Paulus ngerana. Jenari mulai ia gejek kerina. Alu sora megang nina, “Bunuh ia! Kalak si bagenda la patut nggeluh!”

²³Reh gejekna ia kerina, iawat-awatkenna uisna dingen icaburkenna abu ku datas.

²⁴Perbahan si e isuruh puanglima ndai perajuritna maba Paulus ku bas markas. Isuruhna pe perajurit e ngeligasi Paulus guna meteh ngkai maka merawa kalak Jahudi e man Paulus.

²⁵Tapi kenca dung Paulus iiketna dingen ipeterdangna guna iligasi nina Paulus man perwira si tedis i je, “Rikutken undang-undang banci kin iligasindu sekalak warga negara Roma, terlebih-lebih langa ia iadili?”

²⁶Megi kata enda minter ilaporken perwira e man puanglima nina, “Kuga nge atendu ibahanndu ia? IA warga negara Roma kap.”

²⁷E maka idahi puanglima e Paulus, jenari nina, “Tuhu kin kam warga negara Roma? Katakenlah man bangku!” Erjabap Paulus nina, “Tuhu.”

²⁸Jenari nina puanglima e, “Aku enggo jadi warga negara Roma alu nggalar melala man pemerentah Roma.” Ngaloi Paulus, “Tapi aku, tubuhku nari kin pe warga negara Roma nge.”

²⁹E maka minter surut kalak si aturna mereksa dingen ngeligasi Paulus ndai. Puanglima e pe enggo mbiar kenca ietehna maka Paulus si isuruhna iiket e warga negara Roma.

³⁰Perlu iakap puanglima e meteh kai sabapna maka iaduken kalak Jahudi Paulus. E maka pepagina isuruhna perajurit-perajurit nangtangi rante si ngiket Paulus. Isuruhna pe pulung imam-imam si mbelin ras anggota-anggota Pengadilen Agama. Jenari ibabana Paulus ku lebe-lebe sidang e.