Read Batak Karo PERBAHANEN RASUL-RASUL 25 Bible Online

PERBAHANEN RASUL-RASUL 25 - Batak Karo bible

PERBAHANEN RASUL-RASUL 25

¹Telu wari kenca Pestus seh i propinsi e, nangkeng ia i Kesarea nari ku Jerusalem.

²I Jerusalem reh imam-imam si mbelin ras peminpin-peminpin kalak Jahudi ngadap man Pestus ngaduken Paulus.

³Erkiteken enggo irencanaken kalak Jahudi munuh Paulus i tengah dalan, e maka ipindokenna man Pestus gelah Paulus ibaba ku Jerusalem.

⁴Ngaloi Pestus nina, “Paulus tetap ipenjaraken i Kesarea, janah aku ras minter nge mulihken ku jah.

⁵E maka ku jah lah peminpin-peminpinndu ras aku guna ngaduken ia adi lit kin salahna.”

⁶Kenca waluh tah sepuluh wari nari Pestus i Jerusalem mulih ia ku Kesarea. Kenca seh ia i Kesarea, pepagina ibukana sidang pengadilen janah isuruhna perajurit-perajurit maba Paulus ku bas ruangen sidang e.

⁷Kenca seh Paulus ku bas ruangen e, minter ia ikeleweti kalak Jahudi si reh i Jerusalem nari. Jenari iturikenna kesalahen-kesalahen Paulus si mbelin, tapi sada pe la terbuktikenca.

⁸Tapi ibela Paulus dirina nina, “Sitik pe labo lit salahku subuk nandangi Undang-undang kalak Jahudi, nandangi Rumah Pertoton ntah pe nandangi Kaisar.”

⁹Perbahan Pestus ersura-sura muat ukur kalak Jahudi, e maka nina man Paulus, “Nggit kam ku Jerusalem gelah i jah kudungi perkarandu enda?”

¹⁰Tapi ngaloi Paulus nina, “Genduari aku tedis i lebe-lebe pengadilen Pemerentah Roma; e maka perkarangku enda arus idungi i bas pengadilen Kaisar Roma. Ietehndu jine maka labo lit salahku man kalak Jahudi.

¹¹Adi tuhu-tuhu kin aku ersalah janah salahku e sue ras ukumen mate, rela nge aku mate. Tapi adi labo tuhu pengadunna e, ise pe labo erkuasa ngendesken aku man kalak Jahudi e. E maka kutuntut hakku gelah Kaisar mutusken perkarangku.”

¹²Arih-arih Pestus ras penasehatna jenari nina man Paulus, “Perbahan ipindokenndu gelah Kepala Pemerentah Roma mutusken perkarandu e maka man Pemerentah si Roma lah kam ngadap.”

¹³La ndekah kenca si e reh Raja Agripa ras Bernike ku Kesarea ndahi Pestus guna ngataken mejuah-juah man bana perbahan Pestus enggo jadi gubernur.

¹⁴Kenca piga-piga wari ia i Kesarea ituriken Pestus man bana persoalen Paulus e nina, “I bas penjara lit sekalak kalak tahanen si itadingken Pelik.

¹⁵Asum ku Jerusalem aku, imam-imam si mbelin ras pertua-pertua kalak Jahudi ngaduken ia man bangku. Kalak Jahudi e nuntut gelah kuukum ia.

¹⁶Tapi kukataken man bana maka kalak Roma labo biasa erbahan ukumen man sekalak si iaduken adi langa kin ia ipejumpaken ras si ngaduken ia guna mereken kesempaten man bana mbela dirina.

¹⁷Janah asum kalak e ikut reh ku jenda, pepagina minter kubuka sidang. Kusuruh perajurit-perajurit maba kalak si iadukenna e ku lebe-lebe sidang.

¹⁸Tedis kalak e ngaduken ia, tapi pengadunna e sada pe la lit kerna kejahaten bagi si kuarapken kin.

¹⁹Pengadunna e, persoalen kerna agamana saja nge janah kerna sekalak si gelarna Jesus, si enggo mate, tapi ikataken Paulus maka IA nggeluh.

²⁰Perbahan mesera kuakap mpepayo perkara e, e maka kusungkun ntah nggit ia ku Jerusalem gelah i jah kudungi perkarana e.

²¹Tapi ipindoken Paulus gelah Kaisar mutusken perkarana e. Janah ipindokenna gelah ia ikawali ngayak iputusken Kaisar perkarana e. E maka kusuruh perajurit-perajurit njagai ia seh warina ia kukirim man Kaisar i Roma.”

²²Jenari nina Agripa man Pestus, “Aku pe merincuh megi ia ngerana.” Ngaloi Pestus, “Pagi banci ibegindu.”

²³Pepagina reh Agripa ras Bernike alu upacara si mehaga iarakken puanglima-puanglima bage pe pembesar-pembesar kota. Bengket ia ku ruang sidang. Kenca iperentahken Pestus, ibaba perajurit me Paulus ku lebe-lebe sidang.

²⁴Kenca bage, ngerana Pestus nina, “O Raja Agripa bage pe kerina kam si pulung i jenda. Enda me jelmana si iaduken kalak Jahudi si ringan i Jerusalem bage pe kalak Jahudi i bas kota enda. Reh kalak Jahudi e ngadap man bangku janah alu sora si megang ikatakenna man bangku maka si iadukenna enda lanai patut nggeluh.

²⁵Tapi la lit kudat salahna si sue ras ukumen mate. Janah perbahan ipindokenna gelah Kaisar si mutusken perkarana e, e maka kutetapken ngirim ia man Kaisar.

²⁶Tapi langa lit i bas aku pengadun si tepat kerna ia guna kusuratken man Kaisar. E me sabapna maka kubaba ia ku lebe-lebendu kerina terlebih-lebih man bandu Raja Agripa, gelah kenca sibahan pemeriksan ras-ras i jenda, enggo lit dalanku erbahan surat man Kaisar.

²⁷Sabap la kuakap mehuli engkirimken sekalak tahanen adi la ituriken tuduhen si tangkas kerna kesalahen-kesalahen si ibahanna.”