Read Batak Karo PERBAHANEN RASUL-RASUL 26 Bible Online

PERBAHANEN RASUL-RASUL 26 - Batak Karo bible

PERBAHANEN RASUL-RASUL 26

¹Nina Agripa man Paulus, “Genduari banci kam ngerana guna mbela dirindu.” Kenca Paulus ngangkat tanna guna mereken penghormaten man anggota sidang, ibenakenna ngerana nina,

²“O Raja Agripa, megah kal kuakap sabap sendah banci aku ngerana i lebe-lebendu mbela diringku nandangi kerina pengadun kalak Jahudi.

³Terlebih-lebih megah kuakap sabap ietehndu kal alu payo adat istiadat kalak Jahudi ras persoalen-persoalenna. E maka kupindoken gelah megenggeng kam megiken aku.

⁴Kerina kalak Jahudi meteh kerna kegeluhenku mulai kitik-kitikku nari. Ietehna kerina lagu langkahku ras perbahanenku subuk asum aku i kutangku bage pe asum aku i Jerusalem.

⁵Ndekah me ietehna maka aku masuk golongen si tutusna kal ersembah man Dibata i bas agama Jahudi, e me golongen Parisi. Janah adi bage atena banci pe iturikenna kerna aku. [112†]

⁶Janah genduari iadili aku i jenda perbahan erpengarapen aku nandangi padan si ibahan Dibata man nininta nai.

⁷E me padan si iarapken bangsa si sepuluh dua suku. Em sabapna maka isembahna Dibata suari ras berngi. Janah perbahan pengarapen enda me, o raja, maka aku iaduken kalak Jahudi.

⁸O kam kerina si pulung i jenda, ngkai kin iakapndu maka la mungkin ipegeluh Dibata mulihi kalak si enggo mate?

⁹Aku jine nai erpengakap maka tugasku kal kuakap ngelawan pengaruh gelar Jesus kalak Nasaret e. [113†]

¹⁰Janah enggo pe kudalanken i Jerusalem alu kuasa si ibereken imam-imam si mbelin man bangku. Nterem kalak si enggo tek man Jesus kutangkap janah kutamaken ku bas penjara. Janah asum kalak e iukum mate, aku me sekalak si setuju i bas pembunuhen e.

¹¹Megati kalak si enggo tek man Jesus e kusiksa i bas rumah-rumah pertoton. Kupaksaken gelah ipersokenna kinitekenna man Jesus. Janah perbahan segatna ateku ngenehen kalak si enggo tek man Jesus e, kuayaki pe ia seh ku kuta-kuta i darat taneh Jahudi guna niksaisa.”

¹²“Guna si e kap maka lawes nai aku ku Damaskus alu kuasa ras perentah imam-imam si mbelin.

¹³Tapi o Raja Agripa, sanga ciger wari aku i tengah dalan, rempet kuidah sinalsal nusur i langit nari terangen asa matawari. Isalsalina aku ras teman-temanku si sada dalanen.

¹⁴Kerina kami ndabuh ku taneh janah kubegi sora erlebuh man bangku i bas cakap Jahudi, ‘O Saul, Saul ngkai maka Aku isiksandu? Isiksandu kap dirindu bagi nukuli pergalah si entelap.’

¹⁵Jenari ngaloi aku, ‘Ise kin Kam Tuhan?’ Erjabap Tuhan, ‘Aku kap Jesus, si isiksandu.

¹⁶Tapi kekeken janah tediskenlah! Kucidahken diringKu man bandu guna milih kam jadi si erdahinKu ras saksingKu. Gelah iturikenndu man kalak si deban kai si enggo idahndu sendah, e me kerna Aku, bage pe gelah iturikenndu kai si Kucidahken pagin man bandu.

¹⁷Kupulahi kam pagi i bas tan bangsa Israel nari ras i bas kalak si deban si labo kalak Jahudi si Kusuruh idahindu.

¹⁸Pemedakken matana gelah itadingkenna si gelap guna bengket ku bas si terang. Bage pe gelah itadingkenna kuasa Iblis jenari reh ku Dibata. Gelah erkiteken tek ia man bangKu, Kualemi dosa-dosana. Bage pe gelah ialokenna ingan, e me ingan si patut ialoken kalak si ipilih Dibata.’ ”

¹⁹“Janah bage me, o Raja Agripa, kupatuhi pengenehenen si kualoken i bas Dibata nari e.

²⁰Mula-mula kuajari kalak Jahudi si i Damaskus jenari si i Jerusalem ras si i belang-belang taneh Judea, bage pe kalak si labo kalak Jahudi gelah kerina jera dingen reh ku Dibata. Kuajari pe ia gelah icidahkenna arah perbahanen si mehuli maka ia enggo jera. [114†]

²¹Perbahan si enda me maka itangkap kalak Jahudi aku asum aku i Rumah Pertoton, janah ibunuhna pe atena aku.

²²Tapi seh i bas wari enda aku tetap isampati Dibata. Erkiteken si e tedis aku i jenda nuriken kerna Jesus man kerina manusia subuk man kalak si mbelin bage pe man kalak si meteruk. Kai si kuturiken e bali nge ras si enggo leben ituriken nabi-nabi ras Musa.

²³E me: Mesias e arus ngenanami kiniseran seh mate, janah IA me si tangtangna ipegeluh Dibata i bas si mate nari, gelah arah kekekenNa e banci icidahkenNa terang keterkelinen subuk man kalak Jahudi bage pe man kalak si deban si labo Jahudi.” [115†]

²⁴Asum Paulus ngerana denga nina Pestus man bana alu sora si megang, “Enggo mehado kam e Paulus! Pemetehndu si melala e erbahanca kam enggo mehado!”

²⁵Tapi ngaloi Paulus nina, “O Pestus si mehamat, aku labo mehado. Kai si kukataken enda tuhu-tuhu nge, janah jore-jore nge ukurku ngerana enda.

²⁶O Raja Agripa, tentu ietehndu kerina persoalen enda, e maka pang aku ngerana man bandu. Tek aku maka labo lit sada pe i bas e langa ibegindu, sabap kerina enda labo terjadi i tengah kerangen si terbuni.

²⁷O Raja Agripa, tek nge kam man kai si ikataken nabi-nabi? Kueteh nge maka tek kam.”

²⁸Ngaloi Raja Agripa man Paulus nina, “IAkapndu kin maka i bas paksa si kentisik enda banci aku ibahanndu jadi kalak Kristen?”

²⁹Ngaloi Paulus nina, “Pertotonku man Dibata gelah i bas paksa si kentisik tah ndekah denga gia, kam ras kerina si megiken aku sendah banci jadi bali ras aku, seakatan rante enda.”

³⁰Jenari tedis raja, gubernur bage pe Bernike ras kerina kalak si kundul ras ia i je.

³¹Muatna ndarat ngerana ia sapih-sapih ia nina, “Labo lit perbahanenna si salah si sue ras ukumen mate ntah ukumen penjara.”

³²Jenari nina Agripa man Pestus, “Si tuhuna enggo banci ia ibebasken adi la min ndai ituntutna hakna maka Kaisar mutusken perkarana.”