Read Batak Karo PERBAHANEN RASUL-RASUL 28 Bible Online

PERBAHANEN RASUL-RASUL 28 - Batak Karo bible

PERBAHANEN RASUL-RASUL 28

¹Kenca kerina kami seh ku daraten, ieteh kami arah kalak si ngiani pulau maka gelar pulau e, e me pulau Malta.

²Mehuli kal kerina anak dusun si ngiani pulau e man kami. IAlo-alona kami alu mehuli, janah perbahan wari mulai udan dingen seh kal bergehna e maka ipegarana api.

³Ipepulung Paulus ranting sada mberkis janah asum itamakenna ku bas api, ndarat sada nipe upar i bas ranting e nari sabap melas iakapna jenari itagutna tan Paulus.

⁴Ngidah nipe si molah-olah i bas tan Paulus nina si ngiani pulau e sapih-sapih ia, “Kalak si itagut nipe e ugapa pe kalak pemunuh. Sabap enggo pe ia selamat i bas lawit nari la ka bo ia ipelepas Dewi Keadilen nggeluh.”

⁵Tapi ikupisken Paulus nipe e ku bas api, janah la ia sitik pe suin.

⁶Rikutken pengakap kalak e ugapa pe besar nge kerina daging Paulus ntah pe minter mate. Tapi kenca ndekah itimaina janah idahna maka Paulus la kaden pe e maka dungna erkusur ukurna, nina, “IA sekalak dewa kap.”

⁷La ndauhsa i bas ingan e nari lit sada juma, pengulu pulau e empuna. Gelarna Publius. IAlo-alona kami alu mehuli janah telu wari dekahna kami iberena man i bas rumahna e.

⁸Paksa si e bapa Publius ampar i bas ingan medem, sabap panas dingen mesui beltekna. E maka idahi Paulus ia ku bas kamarna. Ertoto Paulus man Dibata janah itamakenna tanna ku babo si sakit e. E maka malem iakapna.

⁹Kenca si enda rehen kerina kalak si sakit i bas pulau e ndahi Paulus. Kerina ipepalem Paulus.

¹⁰Melala iberekenna pemerena man kami. Janah asum kami berkat erlayar icukupina kerina keperlun kami i tengah perdalanen.

¹¹Telu bulan dekahna kami i pulau Malta. Jenari berkat kami tare kapal si erlabuh i bas pulau e kedekah musim angin topan. Kapal e i Aleksandria nari. Kapal e make lambang dewa kembar Kastor ras Poluks.

¹²Singgah kami i Sirakusa janah telu wari dekahna kami i je.

¹³I Sirakusa nari terus kami erlayar ku Regium. Pepagina mulai rembus angin i Selatan nari, janah pepagina ka seh kami i Puteoli.

¹⁴I Puteoli jumpa kami ras piga-piga kalak si enggo tek man Jesus. Sada minggu dekahna kami i bas kuta e perbahan ipindoken ngawan perpulungen. Jenari erdalan kami ku Roma.

¹⁵Senina-senina si sada kiniteken si lit i Roma megi berita kerna kami. Reh ia ku tiga Apius ras ku Pasanggerahan Telu ngalo-ngalo kami. Ngidah kalak enda, ikataken Paulus bujur man Dibata, janah enggo ertetapna ukurna.

¹⁶Kenca seh kami i Roma, Paulus ibere pemerentah Roma ringan i bas sada rumah ras sekalak perajurit si ngawasi ia.

¹⁷Kenca telu wari Paulus i Roma idilona pulung pengulu-pengulu rumah pertoton kalak Jahudi si lit i Roma. Kenca pulung nina Paulus man bana, “O senina-senina! Si tuhuna labo lit salahku sitik pe nandangi bangsanta ntah nandangi adat si ialoken kita i bas nini-nininta nari. Tapi aku itangkap bangsanta i Jerusalem jenari iendeskenna man kalak Roma.

¹⁸Ipulahi kalak Roma atena aku kenca iperiksana perkarangku sabap labo lit idatsa salahku sue ras ukumen mate.

¹⁹Tapi kalak Jahudi tetap ertahan. E maka terpaksa kupindoken gelah Kaisar enda mutusken perkarangku. Enda kubahan labo erkiteken lit pengadunku kerna bangsangku jine. [116†]

²⁰Perbahan si e maka kudilo kam kerina ku jenda, gelah banci kita jumpa dingen ngerana. Sabap si tuhuna kal aku enda irante erkiteken IA, si iarap-arapken kalak Israel.”

²¹Ngaloi kalak Jahudi e man Paulus nina, “Labo lit ialoken kami surat i Judea nari kerna kam. Bage pe labo lit senina-seninanta i jah nari maba berita tah pe cakap-cakap si la mehuli kerna kam.

²²Tapi merincuh nge kami megi pendapatndu sabap ieteh kami maka i japa pe ilawan kalak sekte si i ikutkenndu e.”

²³E maka ras-ras ia netapken warina. I bas wari si enggo itetapken nterem kalak reh ku rumah si iingani Paulus. Erpagi-pagi nari seh berngi iberitaken dingen ijelasken Paulus man kalak e kerna Kinirajan Dibata. Erpalasken ayat-ayat si lit i bas Undang-undang Musa dingen kitap nabi-nabi iusahakenna gelah tek kalak e man Jesus.

²⁴Lit piga-piga kalak si tek janah lit ka si tetap la tek.

²⁵Alu ukur si la ersada mulih ia kerina kenca ikataken Paulus kata enda, “Payo kal si ikataken Kesah Si Badia arah nabi Jesaya man ninindu nai.

²⁶Sabap nina Kesah e, ‘To dahi bangsa e, bage nindu: Ibegindu alu cupingndu tapi la iangkandu, inehenndu alu matandu tapi la idahndu. [117†]

²⁷Sabap enggo batu-batun ukur kalak enda, cupingna lanai mehuli pemegina matana enggo ipitpitkenna. Sabap adi la bage, tentu iidahna alu matana ibegina alu cupingna, iangkana alu ukurna, janah robah dingen Kupepalem ka ia, nina Dibata.’ ”

²⁸Jenari idungi Paulus rananna nina, “Dage arus ietehndu maka keterkelinen si rehna i bas Dibata nari enggo ipeseh man si labo kalak Jahudi janah ibegikenna nge!” [

²⁹Kenca ikataken Paulus kata enda, lawes kalak Jahudi e janahna ersoal sigaran ayo sapih-sapih ia.]

³⁰Dua tahun dekahna Paulus ringan i bas rumah sewana e. I bas si dua tahun e ialo-alona kerina kalak si reh ndahi ia.

³¹Iberitakenna kerna Kinirajan Dibata janah i ajarkenna kerna Tuhan Jesus Kristus. La ia mbiar-mbiar dingen la lit pe si ngolang-ngolangi ia.