Read Batak Karo PERBAHANEN RASUL-RASUL 3 Bible Online

PERBAHANEN RASUL-RASUL 3 - Batak Karo bible

PERBAHANEN RASUL-RASUL 3

¹I bas sada wari tupung jam ertoto, e me jam telu karaben, berkat Petrus ras Johanes ku Rumah Pertoton.

²I bas gerbang Rumah Pertoton si igelari Gerbang si Mejile, lit sekalak dilaki pangpangen mulai kin tubuhna nari. Tep-tep wari ia ilanja ku gerbang e guna mindo-mindo man kalak si bengket ku bas Rumah Pertoton e.

³Asum idahna bengket ate Petrus ras Johanes ku Rumah Pertoton e, ipindona perkuah ate kalak e duana.

⁴Itatap Petrus ras Johanes ia, jenari nina Petrus man bana, “Nehenlah kami.”

⁵E maka inehenna kalak e duana alu pengarapen ngaloken perkuah atena.

⁶Tapi nina Petrus man bana, “La lit duit i bas aku, tapi kai si lit i bas aku kubereken man bandu: I bas gelar Jesus Kristus, kalak Nasaret, kukataken man bandu, dalankenlah!”

⁷Kenca bage ijemak Petrus tan kemuhen si pangpangen e jenari isampatina tedis. Minter megegeh nahena ras mata-mata nahena.

⁸Lompat ia janah erdalan kujah-kujenda. Jenari bengket ia ku Rumah Pertoton ras kalak ndai; erdalan ia janahna lompat-lompat ipujina Dibata.

⁹Kerina kalak si nterem ngidah ia erdalan dingen muji Dibata.

¹⁰Jengang ia kerina kenca itandaina maka ia kap si biasa mindo-mindo i Gerbang si Mejile i Rumah Pertoton e. Mamang atena ngidah kai si enggo jadi man kalak si mindo-mindo e ndai.

¹¹Ngidah kalak si enggo ipepalem ndai ngikutken Petrus ras Johanes, mamang ate kalak si nterem. E maka rehen kalak si nterem e ndahisa ku serambi si igelari “Serambi Salomo”.

¹²Ngidah jelma si nterem e, ngerana Petrus nina, “O kalak Israel, ngkai maka mamang atendu dingen ipernehenndu kal kami? IAkapndu kin maka ibahan kami ia erdalan alu kuasa kami ntah pe erkiteken kami kalak si tutus nandangi Dibata?

¹³Dibata si isembah Abraham, Isak ras Jakup, Dibata si isembah nini-nininta enggo mpehagaken Jesus, PersuruhenNa, si enggo iendeskenndu man peminpin-peminpin kalak Jahudi janah itulakndu IA i lebe-lebe Pilatus aminna gia ipulahi Pilatus atena Jesus. [18†]

¹⁴IA kalak bujur dingen rembak ras Dibata. Tapi itulakndu IA janah ipindokenndu man Pilatus gelah pemunuh ipulahi man bandu. [19†]

¹⁵Ibunuhndu IA si mabai manusia ku kegeluhen si tuhu-tuhu. Tapi IA enggo ipekeke Dibata i bas si mate nari janah kerna si enda tuhu-tuhu enggo idah kami.

¹⁶Kuasa Jesus nge si erbahanca erdalan kalak si itandaindu enda. Kai si enggo idahndu enda ibahan erkiteken kiniteken i bas gelarNa; kiniteken i bas Jesus me si erbahanca ia malem bagi kerina kam ngidahsa.

¹⁷O Senina-senina, kueteh maka labo ietehndu ertina kai si enggo ibahanndu ras peminpin-peminpinndu nandangi Jesus.

¹⁸Tapi alu bage maka enggo isehken Dibata kai si enggo ikatakenNa nai arah nabi-nabi. E me kerna Raja si ipadanken Dibata e arus ngenanami kiniseran.

¹⁹E maka erkadiola dingen jeralah kam gelah dosandu ialemi Dibata.

²⁰Gelah ibereken Tuhan man bandu paksa kemalemen ate dingen isuruhNa Jesus, e me Si Engkelini si ipadanken Dibata si enggo itetapkenNa man gunandu.

²¹IA ringan i Surga seh warina ibahan Dibata kerina jadi mbaru, bagi enggo ikataken Dibata nai arah nabi-nabiNa si badia.

²²Bagi ikataken Musa, ‘IAngkat Tuhan Dibatandu pagi sekalak nabi man gunandu, i tengah-tengahndu nari, bali ras aku enggo iangkatNa. Begikenlah kai si ikatakenna man bandu. [20†]

²³Ise si la megiken kata nabi e ipeserap pagi i bas bangsa Dibata nari janah iukum.’ [21†]

²⁴Janah kerina nabi-nabi si isuruh Dibata ngerana, termasuk Samuel ras nabi-nabi si arah pudina, enggo ernubuat kerna kai si terjadi i bas paksa enda.

²⁵Padan si enggo ibereken Dibata nai arah nabi-nabi man nini-nininta, man bandu kap. Bagi ikatakenNa man Abraham, ‘Arah kesusurenndu pagi kerina bangsa i doni enda Kupasu-pasu.’ [22†]

²⁶E maka man bandu lebe isuruh Dibata Persuruhen si iangkatNa, guna nehken pasu-pasuNa alu ngajari kam sekalak-sekalak gelah kam jera i bas si jahat nari.”