Read Batak Karo PERBAHANEN RASUL-RASUL 4 Bible Online

PERBAHANEN RASUL-RASUL 4 - Batak Karo bible

PERBAHANEN RASUL-RASUL 4

¹Sanga Petrus ras Johanes ngerana denga, reh piga-piga imam ras kepala pengawal Rumah Pertoton ras piga-piga kalak Saduki.

²Nembeh ate kalak e sabap iajarken rasul-rasul si dua e man kalak si nterem maka Jesus enggo keke i bas si mate nari, si nuduhkenca maka lit kekeken i bas si mate nari.

³E maka itangkapna Petrus ras Johanes, jenari itamakenna ku bas penjara seh pagina, sabap paksa e wari enggo ben.

⁴Tapi nterem kalak si megi pengajaren e tek; teremna dilaki si enggo tek e tambah jadi kira-kira lima ribu kalak.

⁵Pepagina pulung peminpin-peminpin kalak Jahudi ras pertua-pertua bage pe guru-guru Undang-undang i Jerusalem.

⁶Ikut pe pulung Imam si Mbelin Annas ras Kayapas, bage pe Johanes ras Aleksander ras kalak si deban i bas kesusuren Imam si Mbelin nari.

⁷Kenca bage isuruhna Petrus ras Johanes tedis i lebe-lebe sidang. Jenari isungkunina nina, “Kuga ibahanndu maka kalak si pangpangen e enggo banci erdalan? Kuasa kai lit i bas kam ntah pe gelar ise ipakendu asum kam mpepalem ia?”

⁸Petrus si dem alu Kesah Si Badia erjabap man sidang e nina, “O kam peminpin-peminpin ras pertua-pertua.

⁹Kami iadilindu kerna perbahanen kami si mehuli nandangi kalak si pangpangen e. Isungkunindu kami kerna kuga kami pepalem ia.

¹⁰Dage arus ietehndu kerina bage pe arus ieteh kerina kalak Israel maka ia si tedis i lebe-lebendu enda enggo banci erdalan erkite-kiteken kuasa gelar Jesus Kristus kalak Nasaret. IA me Jesus si enggo ipakukenndu ku kayu persilang dingen si enggo ipekeke Dibata i bas si mate nari.

¹¹Jesus si ikataken i bas Pustaka Si Badia, ‘Batu si iambekken tukang enggo jadi batu palas.’ Janah kam me tukang e. [23†]

¹²Arah Jesus ngenca kita banci terkelin; sabap i belang-belang doni enda la lit itetapken Dibata gelar si deban si erbahanca kita terkelin.”

¹³Ngidah Petrus ras Johanes pang kal ngerana alu terus terang, dingen perbahan ietehna maka si dua kalak e rakyat biasa si la erpendidiken, e maka mamang ate anggota sidang e. Jenari ietehna maka kalak e duana ajar-ajar Jesus.

¹⁴Tapi lanai ieteh anggota sidang e ngaloisa sabap kalak pangpangen si enggo banci erdalan e tedis i je ras rasul si dua kalak ndai.

¹⁵E maka isuruhna rasul-rasul e ndarat jenari arih-arih ia kerina.

¹⁶Nina sapih-sapih ia, “Kai tindakenta genduari man bana? Kerina kalak si ringan i Jerusalem enggo meteh tanda sengget si ibahanna enda.

¹⁷Tapi gelah ola reh mbarna berita e i tengah-tengah jelma si nterem, siolangilah dingen siajarken ia gelah olanai ngerana man ise pe i bas gelar Jesus.”

¹⁸E maka isuruhna rasul-rasul e ku bas mulihi. Ilarangna gelah olanai ngerana ntah pe ngajar i bas gelar Jesus.

¹⁹Tapi ngaloi Petrus ras Johanes nina, “Kamlah kerina ertimbang si apai kin mehuli iakap Dibata: patuh kami man bandu ntah man Dibata.

²⁰Sabap la terngadiken kami ngerana kerna kai si enggo idah dingen ibegi kami.”

²¹Isergang-sergangi anggota sidang tole rasul-rasul e, jenari ipulahina. La idatna alasen guna ngukum rasul-rasul e sabap kalak si nterem kerina muji Dibata erkiteken kai si enggo jadi e.

²²Kalak si enggo ipepalem alu tanda sengget e umurna lebih empat puluh tahun.

²³Kenca Petrus ras Johanes ibebasken, minter ia lawes ndahi teman-temanna. Iturikenna man teman-temanna e kai si enggo ikataken imam-imam si mbelin ras pertua-pertua.

²⁴Kenca teman-temanna megi si e, ertoto ia kerina ras-ras man Dibata nina, “O Tuhan, Kam kap si njadiken langit, doni, ras lawit bage pe kerina isina. [24†]

²⁵I bas Kesah Si Badia enggo ngerana Kam arah nini kami Daud persuruhenNdu, asum nina, ‘Engkai maka merawa ate bangsa-bangsa si deban; ngkai maka ia erbahan rencana si sia-sia? [25†]

²⁶Raja-raja doni enggo ersikap janah kalak si erkuasa enggo pulung guna ngelawan Tuhan Dibata ras Si Engkelini si enggo ipilihNa.’

²⁷Tuhu enggo pulung i bas kuta enda Herodes, Pontius Pilatus ras bangsa-bangsa si deban bage pe bangsa Israel guna ngelawan Jesus, PersuruhenNdu si Badia, si enggo itetapkenNdu jadi Raja. [26†]

²⁸Pulung ia guna ndalanken kerina si enggo itetapkenNdu nai nari alu kuasa ras peratenNdu.

²⁹Janah genduari, o Tuhan, perdiatekenlah kuga ancamen nandangi serayanndu, janah berelah kami suruh-suruhenNdu, guna meritaken kataNdu alu la biar-biaren.

³⁰Dudurken tanNdu guna pepalem kalak si penakiten janah bahanlah maka jadi tanda-tanda sengget si mbelin i bas gelar Jesus PersuruhenNdu si Badia e.”

³¹Kenca dung kalak e ertoto, mugur-ugur rumah inganna pulung e. Kerina ia dem alu Kesah Si Badia jenari alu ukur si tetap iberitakenna kata Dibata.

³²Kerina kalak si enggo erkiniteken e ersada ukurna dingen ersada pe penggejapenna. La lit sekalak pe si ngatakenca maka erta-erta si lit i bas ia, si kerajangenna sisada; tapi kerina iraskenna. [27†]

³³Alu kuasa si mbelin isaksiken rasul-rasul e maka Tuhan Jesus enggo keke i bas si mate nari. Janah Dibata mereken pasu-pasuNa si mbelin man perpulungen e.

³⁴La lit sekalak pe si kekurangen, sabap kalak si lit taneh ntah rumahna, idayakenna.

³⁵Janah duitna iberekenna man rasul-rasul. Jenari ibagiken rasul-rasul man perpulungen rikutken keperlunna sekalak-sekalak.

³⁶Bage me Jusup si igelari rasul-rasul e Barnabas (ertina anak si nggit nampati), ia kalak Lewi tubuh i pulau Kiprus.

³⁷Idayakenna tanehna, jenari iberekenna duitna e man rasul-rasul.