Read Batak Karo PERBAHANEN RASUL-RASUL 5 Bible Online

PERBAHANEN RASUL-RASUL 5 - Batak Karo bible

PERBAHANEN RASUL-RASUL 5

¹ [1-2] Tapi lit me kalak si deban gelarna Ananias, ndeharana si Sapira. Idayakenna tanehna selambar tapi ibunikenna deba tukur taneh e; sada bagin iberekenna man rasul-rasul. Ndeharana pe meteh kerna si enda.

³Jenari isungkun Petrus ia nina, “O Ananias ngkai maka ipelepasndu Iblis engkuasai ukurndu, seh maka ibualindu Kesah Si Badia alu muniken sada bagin tukur taneh e?

⁴Kam kap empu taneh e ope denga idayaken; janah kenca idayaken, duit e pe ate-atendu empergunakenca. Dage ngkai maka turah ukurndu erbahan si enda? Labo manusia si ibualindu, tapi kam enggo erbual man Dibata!”

⁵Kenca ibegi Ananias kata e minter ia mbulak dingen mate pe. Mbiar kal kerina kalak si megi kejadin e.

⁶Jenari tedis piga-piga anak perana si i je, ibalutina mait e, ibabana ndarat guna ikuburken.

⁷Kira-kira telu jam kenca si e, reh ndehara Ananias ku bas, la ietehna kai si enggo jadi nandangi perbulangenna.

⁸Nina Petrus man bana, “Kataken man bangku, tuhu kin enda ngenca tukur taneh si ialokenndu ras perbulangenndu?” Erjabap ia nina, “Tuhu, ase me ergana.”

⁹E maka nina Petrus man bana, “Engkai maka ersada arihndu ras perbulangenndu encubai Kesah Tuhan? Nehenlah, kalak si enggo engkuburken perbulangenndu tedis i lebe-lebe pintun. Kam pe ibabana me ku darat.”

¹⁰Rempet mbulak Sapira ku nahe Petrus jenari mate. Asum bengket anak perana ndai ku bas idapetina Sapira enggo mate. E maka ilanjana ndarat jenari ikuburkenna deherken perbulangenna.

¹¹Mbiar kal kerina perpulungen e, bage pe kerina kalak si deban si megi kejadin enda.

¹²Melala tanda-tanda sengget si mbelin ibahan rasul-rasul i tengah-tengah jelma si nterem. Megati pulung kerina kalak si enggo tek e, i Serambi Salomo.

¹³Kalak si deban mehangke ndeherisa, amin bage gia ikataken kalak si nterem maka perpulungen e mehuli.

¹⁴Tapi reh dekahna reh teremna kalak si tambah ku perpulungen e, subuk dilaki bage pe diberu si tek man Tuhan.

¹⁵Erkiteken tanda-tanda sengget si enggo ibahan rasul-rasul e, e maka nterem kalak si maba kade-kadena si penakiten ku pasar. Ipepedemna i datas ingan medem ntah amak, gelah adi mentas Petrus, awihna lah gia engkenai kalak si penakiten e.

¹⁶Bage pe nterem kalak si ringan i kuta-kuta sekelewet Jerusalem reh. Ibabana kalak si penakiten ras kalak si iseluki setan; janah kerina ia ipepalem.

¹⁷Imam si Mbelin ras teman-temanna kalak Saduki, mulai erbahan tindaken man rasul-rasul sabap cian kal atena.

¹⁸Itangkapna rasul-rasul e jenari itamakenna ku bas penjara si mbelin.

¹⁹Tapi sanga berngi e reh malekat Tuhan nalangi pintun penjara e. Iteguna rasul-rasul e ndarat, janah nina,

²⁰“Laweslah, beritaken kerna kegeluhen si mbaru enda man kalak si nterem i bas Rumah Pertoton.”

²¹Iikutken rasul-rasul kata malekat e. Kenca terang pepagina bengket ia ku bas Rumah Pertoton, jenari ibenakenna ngajar i je. Paksa si e Imam si Mbelin ras teman-temanna mpepulung kerina pertua-pertua kalak Jahudi guna ersidang. Jenari isuruhna kalak ngelegi rasul-rasul e ku penjara.

²²Tapi kenca seh kalak e i penjara lanai idahna rasul-rasul e i je. E maka mulihken ia jenari iberitakenna.

²³Nina, “Idapeti kami penjara e ikunci janah kerina si erjaga i bas inganna, i lebe-lebe pintun. Tapi kenca italangi kami, la lit sekalak pe idapeti kami i bas.”

²⁴Kenca ibegi pengulu Rumah Pertoton ras imam-imam si mbelin berita e mamang atena janah nungkun ia nina, Kai nge si enggo jadi nandangi rasul-rasul e?

²⁵Jenari reh sekalak maba berita nina, “Begiken! Kerina kalak si itamakenndu ku bas penjara e genduari paksa ngajari kalak si nterem i Rumah Pertoton.”

²⁶E maka berkat pengawal Rumah Pertoton ras juak-juakna ngelegi rasul-rasul e. Tapi labo alu cara paksa ibahanna, sabap mbiar ia ibenteri kalak si nterem.

²⁷Ibabana rasul-rasul e ku bas janah isuruhna tedis i lebe-lebe sidang. Jenari isungkun Imam si Mbelin rasul-rasul e.

²⁸Nina, “Enggo ilarang kami kam ngajar i bas gelar Jesus. Tapi teridah, maka enggo serser kalak Jerusalem enda megi pengajarenndu. Janah ikatakenndu maka kami erbahanca IA mate.” [28†]

²⁹Ngaloi Petrus ras rasul-rasul si deban nina, “Kami arus ngikutken Dibata, labo manusia.

³⁰Dibata si isembah nininta enggo mpekeke Jesus i bas si mate nari, kenca IA enggo ibunuhndu alu makuken IA ku kayu persilang.

³¹Dibata enggo ngangkat IA dingen mereken kuasa man baNa jadi Raja dingen Penebus, gelah kalak Israel jera dingen dosa-dosana ialemi Dibata.

³²Kami me saksi i bas si e kerina, kami ras Kesah Si Badia si ibereken Dibata man kalak si ngikutken IA.”

³³Megi kata e merawa kal ate anggota sidang. Ibunuhna pe atena rasul-rasul e.

³⁴Tapi tedis sekalak anggota sidang e, e me kalak Parisi, gelarna Gamaliel. Ia sekalak guru Undang-undang janah kerina kalak mehamat man bana. Isuruhna gelah ibaba lebe ndarat rasul-rasul e.

³⁵Jenari nina man anggota sidang, “O kam kalak Israel, ukurkenlah manjar-anjar kai si atendu ibahanndu nandangi rasul-rasul enda.

³⁶Sabap nai reh si Tudas, ikatakenna maka ia sekalak si mbelin; janah lit pe si ngikutken ia empat ratus kalak. Tapi kenca ia ibunuh kerina pengikut-pengikutna e merap janah pergerakenna ngadi.

³⁷Kenca si e, sanga ilakoken cacah jiwa reh ka Judas i Galilea nari. Ibabaina kalak si nterem mbrontak. Tapi ia pe ibunuh janah kerina pengikut-pengikutna merap.

³⁸Perbahan si e kukataken man bandu, ola ugapa pe ibahan ia. Pelepas sajalah, sabap adi i bas manusia nari kin ajarenna e, masap nge pagi.

³⁹Tapi adi i bas Dibata nari, labo mungkin kam ngasup ngolangisa. Banci jadi kam nge si ngelawan Dibata.” Kai si ikataken Gamaliel e ikutken anggota sidang.

⁴⁰E maka idilona rasul-rasul e ku bas. Isuruhna pengawal-pengawal ngeligasi rasul-rasul e janah ilarangna ia kerina ngajar i bas gelar Jesus. Kenca bage ipulahina.

⁴¹Itadingken rasul-rasul sidang e alu ukur meriah sabap metunggung iakap Dibata ia ikut ngenanami penggombangi kalak gelar Jesus.

⁴²Janah tep-tep wari iteruskenna ngajar dingen meritaken Berita Si Meriah kerna Jesus Kristus i Rumah Pertoton bage pe i bas rumah kalak.