Read Batak Karo PERBAHANEN RASUL-RASUL 7 Bible Online

PERBAHANEN RASUL-RASUL 7 - Batak Karo bible

PERBAHANEN RASUL-RASUL 7

¹Isungkun Imam si Mbelin si Istepanus nina, “Tuhu kin ikatakenndu bagi si ikataken kalak enda?”

²Ngaloi Istepanus nina, “Kam bapa ras senina-senina, begikenlah! Dibata si Mulia e enggo ncidahken diriNa man nininta Abraham, asum ia nai ringan i Mesopotami, ope denga ia lawes ku Haran. [29†]

³Janah nina Dibata man bana, ‘Tadingkenlah kade-kadendu ras negerindu; berkatlah ku negeri si Kutuduhken man bandu.’

⁴E maka itadingken Abraham taneh Kaldea, pindah ia ku Haran. Janah kenca mate bapana, isuruh Dibata ia miser ku negeri enda, ku inganndu si genduari enda. [30†]

⁵Paksa si e nai la lit taneh enda sentepap pe ibereken Dibata jadi si kerajangen Abraham. Tapi erpadan nge Dibata mereken taneh enda kerina man bana ras man kesusurenna aminna gia paksa e la lit pupusna. [31†]

⁶Paksa si e pe ikataken Dibata man bana, ‘Kesusurenndu pagi ringan i negeri si deban empat ratus tahun dekahna. I je pagi ia iperkawanken dingen inanamina kiniseran. [32†]

⁷Tapi Kuukum pagi bangsa si emperkawanken ia, jenari Kupulahi ia i bas negeri e nari janah isembahna Aku i bas ingan enda.’ [33†]

⁸Si jadi tanda i bas perpadanen enda isuruh Dibata maka Abraham ras kesusurenna isunatken. E maka isunatken Abraham anakna Isak kenca waluh wari umurna. Isunatken Isak anakna Jakup janah isunatken Jakup anakna si sepuluh dua kalak si enggo jadi nini-nininta. [34†]

⁹Nininta e nai ercian ate nandangi seninana Jusup, e maka idayakenna jadi budak i taneh Mesir. [35†]

¹⁰Tapi itemani dingen isampati Dibata ia i bas kerina kiniseranna. Asum ia ngadap man Paro, raja Mesir, ipehaga Dibata ia janah iberekenNa kepentaren man bana. E maka iangkat Paro si Jusup jadi kalak si erkuasa i bas ingan e bage pe nandangi kerina erta-erta raja. [36†]

¹¹Kenca si e jadi me kelihen i belang-belang taneh Mesir bage pe taneh Kanan, si erbahanca turah kiniseran si mbelin. Nininta nai pe lanai ndat pangan. [37†]

¹²Tapi kenca ibegi Jakup maka i Mesir lit gandum, e maka isuruhna anak-anakna, e me nininta nai, ku Mesir. Enda me perdalanenna si pemena.

¹³Asum ia ku jah pedua kaliken, ipetandaken Jusup dirina man senina-seninana e. Perbahan si e, Paro pe enggo meteh kerna keluarga Jusup. [38†]

¹⁴Jenari isuruh Jusup piga-piga kalak ngelegi bapana Jakup ras kerina kade-kadena gelah kerina pindah ku Mesir. Teremna kalak e pitu puluh lima kalak. [39†]

¹⁵E maka berkat Jakup ku taneh Mesir. I je me ia ringan seh mate janah bage ka pe anak-anakna. [40†]

¹⁶Maitna ibaba ku Sihem janah ikuburken i bas kuburen si nai enggo itukur Abraham i bas anak Emor nari. [41†]

¹⁷Kenca enggo ndeher paksana padan Dibata man Abraham nai jadi, bangsanta i taneh Mesir enggo reh teremna. [42†]

¹⁸Paksa e mulai me erkuasa i Mesir sekalak raja si la meteh kerna Jusup.

¹⁹Itipuna nininta alu kejam. Ipaksana ia muangken anak-anak si mbaru tubuh gelah mate. [43†]

²⁰Paksa si e me tubuh Musa, anak dilaki si mejile kal rupana. Telu bulan dekahna ia ibuniken orangtuana i rumah. [44†]

²¹Kenca bage ibuangken orang tuana ia. Tapi idah putri Paro jenari ibuatna janah ijadikenna jadi anakna. [45†]

²²IAjarken guruna man bana kerina kepentaren kalak Mesir. Musa jadi kalak si mbelin. Ia erkuasa i bas kata ras perbahanen.

²³Kenca umur Musa empat puluh tahun turah ukurna ndahi senina-seninana bangsa Israel. [46†]

²⁴Idahna sekalak Israel ipekpeki kalak Mesir. E maka ibelana kalak Israel e; isampatina ia alu munuh kalak Mesir e.

²⁵Ietehna maka ate Dibata make ia mulahi bangsana. Janah iakapna maka bangsana pe meteh kerna si e; tapi la ieteh bangsana.

²⁶Pepagina idahna dua kalak bangsa Israel rubati. Icubakenna ndameken si dua kalak e nina, ‘O teman begikenlah! Kam ersenina; ngkai maka sipekpeken kam duana?’

²⁷Tapi kalak si ersalah i bas perubaten e la megiken kata Musa nina man Musa,

²⁸‘Ise kin ngangkat kam jadi peminpin dingen hakim nandangi kami? Ibunuhndu ka kin atendu aku bagi nderbih enggo ibunuhndu kalak Mesir e.’

²⁹Megi kata e, kiam Musa, itadingkenna taneh Mesir janah ringan ia i taneh Midian. I je ipupusna dua kalak anak dilaki. [47†]

³⁰Kenca empat puluh tahun Musa ringan i Midian icidahken malekat dirina man Musa i bas api si gara i bas rambah duri i gurun pasir deher Deleng Sinai. [48†]

³¹Mamang ate Musa ngidahsa. E maka ideherina rambah duri guna pepayosa. Asum ideherina e ibegina sora Tuhan nina,

³²‘Aku kap Dibata si isembah ninindu, Dibata si Abraham, Isak ras Jakup.’ Erkiteken si e nggirgir Musa perbahan biarna. Lanai ia pang jurgak.

³³Jenari nina ka Tuhan man bana, ‘Tangtangi sepatundu sabap ingan enda taneh Badia kap.

³⁴Tuhu-tuhu enggo Kuidah bangsangKu i Mesir ngenanami melala kiniseran. Enggo Kubegi pernderkuhna e maka reh Aku mulahi ia. Marilah, kam me kusuruh ku taneh Mesir.’

³⁵Musa enda me si itulak bangsa Israel alu ngataken, ‘Ise kin si ngangkat kam jadi peminpin dingen hakim nandangi kami?’ IA si isuruh Dibata erkelang-kelangken malekat si enggo teridah man bana i rambah duri si gara jadi peminpin ras simulahi bangsa Israel. [49†]

³⁶Ibabana bangsa Israel ndarat i taneh Mesir nari alu erbahan tanda-tanda sengget si mbelin i Mesir, i Lawit Merah, ras empat puluh tahun i gurun pasir. [50†]

³⁷Musa enda me si ngataken man bangsa Israel, ‘IAngkat Dibata pagi sekalak nabi man gunandu, i tengah-tengahndu nari, bali ras aku enggo iangkatNa.’ [51†]

³⁸Musa enda me si pulung ras nini-nininta i gurun pasir. Ia me si ngerana ras malekat i Deleng Sinai. IAlokenna kata Dibata si ngaturken kegeluhen guna ipeseh man banta. [52†]

³⁹Tapi nininta nai la megiken katana. Isimbakna Musa, sabap atena mulihken ku taneh Mesir.

⁴⁰E maka nina man Arun, ‘Bahanlah dibata-dibata man kami jadi peminpin kami. Sabap la ieteh kami kai si enggo jadi nandangi Musa si maba kami ndarat i taneh Mesir nari.’ [53†]

⁴¹E maka ibahan kalak enda sada gana-gana, bali ras anak lembu. Jenari ipersembahkenna persembahen tutungen man gana-gana e. Ihamatina kai si enggo ibahanna e alu erbahan sada kerja si meriah. [54†]

⁴²Tapi Dibata nadingken kalak e. Ipelepasna kalak e nembah man bintang-bintang i langit, bagi enggo isuratken i bas kitap nabi-nabi, ‘O bangsa Israel! Empat puluh tahun dekahna asum kam i gurun pasir, igelehndu dingen ipersembahkenndu asuh-asuhenndu. Tapi man bangKu kin ipersembahkenndu asuh-asuhen e? [55†]

⁴³Lang! Tapi ilanjandu kemah dewa Moloh ras gambar bintang dewa Repan man dibatandu; e me patung-patung si ibahanndu man sembahenndu. Perbahan si e Kubuang kam ku ingan si terdauhen asa Babil.’

⁴⁴Asum nini-nininta i gurun pasir, lit kap i tengah-tengahna Kemah Perjumpan. Kemah e isuruh Dibata ibahan Musa rikutken contoh si enggo icidahken Dibata man bana. [56†]

⁴⁵Kemah si ialoken nininta i bas bapana nari seterusna ibabana asum ia lawes ras Josua guna ngerebut taneh enda i bas bangsa si deban nari, e me bangsa si ipelawes Dibata i lebe-lebe nininta nari. Kemah e lit denga asum Daud jadi raja. [57†]

⁴⁶Daud si ngena ate Dibata e, mindo man Dibata, gelah ia iijinken erbahan sada rumah, e me rumah man Dibata si isembah Jakup. [58†]

⁴⁷Tapi Salomo me surungna erbahan Rumah Pertoton man Dibata. [59†]

⁴⁸Tapi Dibata si Mbelin e labo ringan i bas rumah si ibahan manusia; bagi enggo isuratken nabi,

⁴⁹Nina Tuhan, ‘Surga kap inganKu kundul janah doni kap manca-manca nahengKu. Rumah si kuga kin atendu ibahanndu man bangKu? I ja kin inganKu pekesahken? [60†]

⁵⁰Ma kin Aku erbahanca si nasa lit?’

⁵¹O kam si keras kepala! Ukurndu bali ras ukur kalak perbegu, la kam nggit megiken kata. La erngadi-ngadi isimbakNdu Kesah Si Badia. Bali kam ras ninindu nai! [61†]

⁵²Lit kin sekalak lah gia nabi si la isiksa ninindu? Ibunuhna pe nai kalak si enggo leben erberita kerna kerehen Persuruhen Dibata si Bujur janah Persuruhen Dibata si Bujur e enggo ihianati dingen ibunuhndu.

⁵³Enggo ialokenndu Undang-undang si reh i bas Dibata nari, si isehken malekat man bandu tapi la ikutkenndu.”

⁵⁴Megelut anggota sidang megi ranan si Istepanus. Erderik ipenna perban rawana nandangi Istepanus.

⁵⁵Tapi Istepanus si dem alu Kesah Si Badia, natap ku das. Idahna terang si ersinalsal i bas Dibata nari janah idahna pe Jesus tedis arah kemuhen Dibata.

⁵⁶Jenari nina, “Nehenlah! Kuidah langit talang, janah Anak Manusia si isuruh Dibata tedis arah kemuhen Dibata.”

⁵⁷Alu sora megang serko kerina anggota sidang e janah nutupi cupingna alu tanna. Jenari iserbuna Istepanus.

⁵⁸Isarenna ku darat kuta, jenari ibenterina alu batu. Kalak si menterisa e nangtangi bajuna, janah itadingkenna i bas sekalak anak perana; gelarna Saul.

⁵⁹Asum Istepanus ibenteri kalak e, ertoto ia man Tuhan nina, “O Tuhan Jesus, alokenlah tendingku!”

⁶⁰Erjimpuh ia janah nina alu sora megang, “O Tuhan, ola min ikira Kam dosa kalak enda.” Kenca ikatakenna si enda, mate ia.