Read Batak Karo PERBAHANEN RASUL-RASUL 8 Bible Online

PERBAHANEN RASUL-RASUL 8 - Batak Karo bible

PERBAHANEN RASUL-RASUL 8

¹Saul pe erpengakap maka Istepanus patut ibunuh. I bas wari e pe mulai me perpulungen si lit i Jerusalem ngenanami kiniseran, sabap ia isiksa kalak si nterem. Kerina kalak si tek mengongsi ku dusun-dusun i Judea ras Samaria; rasul-rasul ngenca la mengongsi.

²Piga-piga kalak si erkiniteken, engkuburken mait Istepanus, janah tangis kal ia kerina.

³Tapi Saul ersura-sura engkernepken perpulungen e. Ibengketina tep-tep rumah kalak si tek janah ibabana kalak e ku darat subuk dilaki bage pe diberu. Jenari itamakenna ku penjara. [62†]

⁴Kalak si erkiniteken si enggo merap e lawes ku kuta-kuta meritaken Berita Si Meriah.

⁵Pilipus lawes ku sada kuta i Samaria. I je iberitakenna kerna Si Engkelini si ipadanken Dibata man kalak si nterem.

⁶Meriah ukur kalak si nterem megiken pengajaren Pilipus. Ersada kerina ukurna megiken ia. Idahna pe tanda-tanda sengget si mbelin si ibahan Pilipus.

⁷I bas kalak si setanen nari, ndaraten setan-setan janahna serko alu megang. Bage pe nterem kalak si pangpangen ras kalak si cempang ipepalem.

⁸Perbahan si e jadi me keriahen si mbelin i Samaria.

⁹I bas kuta e lit me sekalak dilaki; gelarna Simon. Gelgel nari enggo ieteh kalak maka ia lit kinigurunna. Ikatakenna pe maka ia sekalak si mbelin.

¹⁰Kerina kalak si i bas kuta e, subuk kalak si meganjang ras si meteruk megiken katana. Nina kalak si nterem e, “I bas ia me Kuasa Dibata si igelari Kuasa si Mbelin.”

¹¹Kalak si nterem megiken ia perbahan ndekah me enggo kemamangen kalak ibahanna alu kinigurunna.

¹²Tapi kenca ia tek kerina man Berita Si Meriah si iberitaken Pilipus kerna Kinirajan Dibata ras kerna Jesus Kristus, e maka iperidiken ia kerina, subuk si dilaki bage pe si diberu.

¹³Simon pe tek. Janah kenca ia iperidiken, ras Pilipus ia katawari pe. Mamang kal atena asum idahna tanda-tanda sengget si mbelin ibahan Pilipus.

¹⁴Rasul-rasul si i Jerusalem megi berita maka kalak Samaria enggo ngaloken kata Dibata. E maka isuruhna Petrus ras Johanes ndahi kalak e.

¹⁵Kenca ia seh, ertoto ia gelah kalak si enggo tek e ngaloken Kesah Si Badia.

¹⁶Sabap Kesah Si Badia langa nusur man bana; saja ia enggo iperidiken i bas gelar Tuhan Jesus.

¹⁷Kenca bage itamaken Petrus ras Johanes tanna ku babo kalak Samaria e, jenari ialoken kalak e me Kesah Si Badia.

¹⁸Kenca idah Simon maka kalak si tek e enggo ngaloken Kesah Si Badia asum itamaken rasul-rasul tanna ku babo kalak e, e maka iberekenna duit man Petrus ras Johanes, janah nina,

¹⁹“Berelah maka i bas aku pe lit kuasa e, gelah kalak ngaloken Kesah Si Badia adi kutamaken tanku ku babona.”

²⁰Tapi nina Petrus, “Bene me kam ras duitndu e, sabap iakapndu banci itukur pemere Dibata.

²¹Labo lit baginndu ntah pe hakndu i bas dahin kami, sabap ukurndu la bujur i bas pengidah Dibata.

²²E maka jeralah kam i bas rencanandu si jahat e janah ertotolah man Tuhan gelah ialemiNa kam i bas perukurenndu si la mehuli e.

²³Sabap kuidah maka kam dem cian ate janah kam iperbudak dosandu.”

²⁴Ngaloi Simon man Petrus ras Johanes, “Totokenlah aku man Tuhan gelah ola sada pe jadi i bas aku kai si ikatakenndu ndai.”

²⁵Kenca Petrus ras Johanes ersaksi dingen nuriken kata Tuhan, mulihken ia ku Jerusalem. I bas perdalanenna iberitakenna Berita Si Meriah i kuta-kuta kalak Samaria.

²⁶Sekalak malekat Tuhan, ngerana man Pilipus nina, “Ersikap janah laweslah kam ku Selatan, ku dalan si i Jerusalem nari ku Gasa.” (Dalan enda melungun). E maka ersikap Pilipus, jenari berkat ia.

²⁷Paksa e lit sekalak Etiopia mentas arah dalan e mulihna ersembah i Jerusalem nari. Ia kepala Bendahara Kandake, Ratu Etiopia. Guna si e ia enggo

²⁸ikebiriken. Ia mulih tare geretana. Asum ia i datas geretana alu sora megang iogena kitap Nabi Jesaya.

²⁹Nina Kesah Si Badia man Pilipus, “To deheri gereta e.”

³⁰IAyaki Pilipus gereta e janah ibegina menteri e ngoge kitap Nabi Jesaya. E maka nungkun Pilipus man bana, “IAngkandu nge kai si iogendu e?”

³¹Erjabap menteri e, “I ja ka nge banci kuangka, adi la lit kalak si nerangkenca man bangku?” Jenari ipindoken menteri e gelah Pilipus nangkih ku gereta dingen kundul i datas ras ia.

³²Bagin Pustaka Si Badia si iogena e e me, ‘IA bali ras biri-biri si ibaba guna igeleh. IA bali ras anak biri-biri si la ngelawan asum igunting mbuluna. Kai pe la ibelaskenNa. [63†]

³³IA ihina janah la lit keadilen ibahan man baNa. Ise pe la ngasup nuriken kerna kesusurenNa, Sabap geluhNa enggo ibuat i bas doni enda nari.’

³⁴Kenca bage nina menteri e man Pilipus, “Kusungkun kam: Kerna ise si ikataken nabi enda? Kerna dirina ntah kerna kalak si deban?”

³⁵E maka ibenaken Pilipus ngerana erpalasken kata e. Iturikenna man menteri e Berita Si Meriah kerna Jesus.

³⁶Asum ia ras nerusken perdalanenna, seh ia ku sada ingan si lit i je lau. E maka nina menteri e man Pilipus, “Nehenlah, enda kap lau. Ma banci kin aku iperidiken?” [

³⁷Nina Pilipus man bana, “Kam banci iperidiken adi kam tuhu-tuhu enggo tek man Jesus Kristus.” Ngaloi menteri e, “Aku tek maka Jesus Kristus Anak Dibata kap.”]

³⁸E maka isuruh menteri kusirna pengadi gereta e. Jenari duana ia, si Pilipus ras menteri e, nusur ku lau. I je me ia iperidiken Pilipus.

³⁹Kenca ia ndarat i bas lau nari, rempet Pilipus ibabaken Kesah Tuhan. Menteri e lanai ngidah Pilipus, tapi iteruskenna perdalanenna alu meriah ukur.

⁴⁰Pilipus enggo seh i Asdot. Isiarina kerina kuta-kuta janah iberitakenna Berita Si Meriah ngayak seh ia i Kesarea.