Read Batak Karo ROMA 3 Bible Online

ROMA 3 - Batak Karo bible

ROMA 3

¹Adi bage i bas kai nge lebihen kalak Jahudi e asangken bangsa si deban? Ntah lit kin nge gunana isunatken e?

²Tentu mbue i bas kai pe! Perlebe: sabap man kalak Jahudi me perlebe iendesken Dibata perkatan-perkatanNa.

³Dage adi lit piga-piga kalak Jahudi la setia man Dibata, iakapndu kin maka erkiteken si e Dibata lanai setia man padanNa?

⁴Tentu lang! Tapi bagenda kap. Dibata e tetap nge i bas ketuhu-tuhun aminna gia kerina manusia perguak. Bagi lit tersurat i bas Pustaka Si Badia, “I japa pe Kam ngerana, Kam tetap nge ibenarken. Katawari pe menang nge Kam, adi iaduken kalak Kam.” [11†]

⁵Tapi kuga, adi arah kesalahenta e reh ulina teridah kebujuren Dibata? Kuga ninta? Salah kin perbahanen Dibata e adi iukumna kita? (Aku ngerana i jenda bagi biasana manusia ngerana.)

⁶Tentu lang! Sabap adi la kin adil Dibata e, labo banci iadilina doni enda.

⁷Umpamakenlah lit kalak si atena ersoal, nina, “Adi arah kejahatenku e maka ertangkasna teridah keadilen Dibata seh maka la ipermuliaken, ma patut min aku lanai iukum Dibata bagi kalak perdosa?

⁸Dage ngkai maka la sibahan si jahat, gelah arah kejahaten e reh si mehuli?” Si tuhuna lit nge kalak si encekuraki aku alu ngataken maka si enda me kuajarken. Kalak enda la banci la iukum bagi patutna.

⁹Dage, ulin kin kita kalak Jahudi asangken si labo kalak Jahudi? Sitik pe lang! Ndai enggo kupetangkas i das maka subuk kalak Jahudi bage pe bangsa si deban kerina i teruh kuasa dosa.

¹⁰Bagi lit tersurat i bas piga-piga kitap i bas Pustaka Si Badia, “La lit ise pe bujur i lebe-lebe Dibata, [12†]

¹¹la lit ise pe si pentar, la lit ise pe ndarami Dibata.

¹²Kerina manusia enggo nilah i bas Dibata nari; kerina ia enggo macik; la lit ise pe erbahan si mehuli, sada pe lang.

¹³Kalah-kalahna desken lubang kubur si talang nipu ia alu dilahna, janah i bas biberna nari ndarat kata-kata desken bisa nipe si erbahanca kalak mate. [13†]

¹⁴Babahna dem alu sumpah si pagit. [14†]

¹⁵Nahena pedas ngayak-ngayak dingen munuh kalak. [15†]

¹⁶Gedang-gedang dalan si ibentasina, ibahanna kecedan dingen kesusahen.

¹⁷La pernah idalanina dalan perdamen.

¹⁸Bage pe la diatena erkemalangen man Dibata.” [16†]

¹⁹Sieteh maka kerina si ikataken Undang-undang e, itujuken man kalak si nggeluh i teruh Undang-undang, gelah olanai lit kalak si erdalih janah gelah doni enda lanai lit ampang-ampangna nandangi ukumen Dibata.

²⁰Sabap labo ise pe banci rembak ras Dibata adi arah ndalanken Undang-undang. Undang-undang e gunana e me gelah ierti manusia ia erdosa. [17†]

²¹Tapi genduari cara Dibata ngerembakken manusia kempak diriNa enggo ipetangkas, janah si e la lit sangkut pautna ras Undang-undang. (Si tuhuna Undang-undang Musa ras kitap nabi-nabi mereken kesaksin maka si e tuhu kap.)

²²Dibata ngerembakken manusia kempak diriNa erkiteken kiniteken manusia e man Jesus Kristus. Kerina kalak si tek man Kristus iperembak Dibata ras diriNa sabap bali nge kerina manusia enda. [18†]

²³Kerina manusia enggo erdosa janah enggo ndauh sirang ras sura-sura Dibata si mejile.

²⁴Tapi arah pemere Dibata erpalasken lias ateNa, kerina manusia irembakken Dibata kempak diriNa, arah pertebusen si ibahan Kristus Jesus.

²⁵Dibata enggo netapken IA jadi sada persembahen gelah arah IA engkorbanken diriNa seh mate, kerina dosa-dosa manusia isasapken dingen pernembeh ate Dibata ipepalem, adi tek ia man Jesus Kristus. Arah si enda icidahken Dibata maka IA bujur kap. Nai nari isinikken Dibata saja kerna dosa-dosa manusia,

²⁶janah la IA megelut. Tapi i bas paksa si genduari enggo iukum Dibata dosa-dosa manusia i bas diri Jesus Kristus. Arah si e icidahkenNa maka IA adil, janah radu ras si e irembakkenNa kempak diriNa kerina kalak si tek man Jesus.

²⁷Dage labo lit si man megahenken manusia. Engkai makana bage? Sabap manusia ikelini Dibata labo erkiteken ndalanken Undang-undang, tapi erkiteken tek ia man Jesus Kristus.

²⁸Dage, manusia banci rembak ras Dibata labo erkiteken manusia e ndalanken kai si ituntut Undang-undang, tapi erkiteken tek man Jesus Kristus ngenca.

²⁹Ntah kin Dibata e Dibata kalak Jahudi saja ngenca? Ma kin IA pe Dibata bangsa si deban nge? Tentu.

³⁰Sabap Dibata e sada ngenca. Dibata ngerembakken kalak Jahudi si ersunat e kempak diriNa erkiteken ia tek man Jesus Kristus; bage pe irembakkenNa kalak si deban si la ersunat kempak diriNa erkiteken kalak enda pe tek man Jesus Kristus. [19†]

³¹Adi tek kita man Jesus Kristus, sicedaken kin Undang-undang e? Kutera pe lang! Tapi arah si e sitamaken Undang-undang e i babo palas si lebih enteguh.