Read Batak Karo 1 KORINTI 12 Bible Online

1 KORINTI 12 - Batak Karo bible

1 KORINTI 12

¹O, senina-senina, la ateku la ietehndu kerna pemere-pemere si rehna i bas Kesah Si Badia nari.

²Ietehndu maka asum kam perbegu denga, tah kuga gia deba carana, tapi si e kerina mabai kam gelah papak maka nembah man berhala-berhala si pekak.

³Arus ietehndu maka labo lit ise pe si ngataken, “Kena sumpahlah Jesus,” adi alu penjemba Kesah Dibata. Bage pe labo lit kalak si ngasup ngakuken, “Jesus Tuhan kap,” adi la alu penjemba Kesah Si Badia.

⁴Erbage-bage pemere Kesah, tapi sada nge Kesah si merekenca e. [51†]

⁵Erbage-bage dahin guna mereken penampat, tapi sada nge Tuhan si mada dahin e.

⁶Erbage-bage dahin si man dahin, tapi sada nge Dibata si mada dahin e, e me si mereken kengasupen man kerina kalak guna ndahiken dahinna si khusus.

⁷Guna kerinana nge maka man banta sekalak-sekalak ibereken pemere si ncidahken maka Kesah erdahin kap.

⁸Kesah e mereken man sekalak jelma sada berita si mbages pengertinna, sedangken man kalak si deban Kesah si sada e ka mereken berita si dem alu pemeteh.

⁹Kesah e ka nge si mereken kiniteken man kalak si deban, janah man kalak si deban ka pemere si khusus guna pepalem kalak si penakiten.

¹⁰Man kalak si deban ibereken Kesah e kengasupen guna ngelakoken perbahanen si ngelebihi kuasa manusia; man si debanna ernubuat; janah man si debanna iberekenNa kengasupen guna meteh ntah kin sada-sada pemere i bas Kesah Si Badia nari ntah lang. Man kalak si deban iberekenNa kengasupen ngerana i bas erbage-bage cakap, janah man si debanna ka iberekenNa kengasupen guna nuriken antusen cakap Kesah e.

¹¹Tapi kerina si enda, Kesah si sada e nge ndahikenca kerinana. Man sekalak-sekalak iberekenNa pemere si pelain-lain rikutken sura-sura Kesah e.

¹²Bagi sada kula melala ringringna, bage me Kristus e. Amin gia melala ringring e, tapi sada kula nge. [52†]

¹³Bage me pe kita kerina, subuk kalak Jahudi bage pe kalak Junani, subuk budak bage pe kalak si bebas, enggo iperidiken alu Kesah si sada e ku bas sada kula. Ibahan Dibata maka kerina kita enggo minem Kesah si sada e.

¹⁴Sabap kula e jadina labo i bas sada ringring nari ngenca tapi jadina i bas melala ringring nari.

¹⁵Adi nina nahe, “Erkiteken aku labo tan, e maka aku labo atan i bas kula,” maka labo e erbahanca nahe e la atan i bas kula e.

¹⁶Bage pe adi nina cuping, “Erkiteken aku labo mata, e maka aku labo atan i bas kula,” maka labo si e erbahanca mata e la atan i bas kula e.

¹⁷Bicara kerina kula e jadi mata, kuga nge nina megi? Janah bicara kerina kula e cuping, kuga nge nina nganggeh?

¹⁸Tapi si tuhuna, Dibata namaken ringring e sada-sadai i bas kula e sue ras si mehuli iakap Dibata.

¹⁹Adi kerinana sada erbage saja ngenca, ma la lit kula?

²⁰Tuhu, melala ringring, tapi kula sada nge.

²¹E maka labo banci nina mata man tan, “Aku la perlu kam!” Bage pe labo banci nina takal man nahe, “Aku la perlu kam!”

²²Tapi sebalikna, ringring si tempa-tempa la megegeh e, e nge si la banci langna.

²³Ringring si la meherga siakap i bas kula, si e me si lebih sipehaga; janah ringring si mehangke encidahkenca, si e nge si lebih siuisi alu mehuli.

²⁴Tapi ringring si labo mehangke encidahkenca labo perlu siuisi. Dibata enggo ngaturken kula alu serasi, seh maka ringring si kurang meherga lebih iergaken.

²⁵Gelah kula e la erbelah-belah, tapi sada-sadai ringring e radu seri mperdiateken ringring si deban.

²⁶Adi sada ringring suin, kerina ringring si deban pe ikut nggejapkenca. Janah adi sada ringring ipehaga, kerina ringring si deban ikut ermeriah.

²⁷Kam me kerina kula Kristus janah sekalak-sekalak kam ringringNa.

²⁸I bas perpulungen enggo itetapken Dibata sekalak-sekalak i bas dahinna; pemena rasul, peduaken nabi, peteluken guru; jenari kalak si ngelakoken perbahanen si ngelebihi kuasa manusia, bage pe kalak si lit i bas ia pemere pepalem kalak si penakiten, ntah kengasupen nampati kalak si deban, ntah kengasupen jadi peminpin, ntah kengasupen ngerana i bas cakap Kesah. [53†]

²⁹Labo kerina rasul, ntah nabi, ntah guru. Labo kerina ngasup ngelakoken perbahanen si ngelebihi kuasa manusia.

³⁰Labo kerina kalak si lit i bas ia pemere pepalem kalak si penakiten, ntah kengasupen ngerana i bas erbage-bage cakap Kesah, ntah kengasupen nuriken antusen cakap Kesah e.

³¹E maka ersura-suralah kam guna ndatken pemere-pemere Kesah si terulin. Janah genduari kuturiken ateku man bandu dalan si mehulina kal.