Read Batak Karo 1 KORINTI 13 Bible Online

1 KORINTI 13 - Batak Karo bible

1 KORINTI 13

¹Bicara beluh kal pe aku ngerana i bas kerina cakap manusia janah i bas cakap malekat pe, tapi adi la aku erkeleng ate man kalak si deban, maka kai si kubelasken e la lebih asangken gung si erbulnang ntah pe penganak si erdeping.

²Aminna gia lit i bas aku pemere ernubuat, aminna gia kueteh kerina rahasia, janah lit i bas aku kerina pemeteh, aminna gia cukup kinitekenku seh maka ngasup aku mindahken deleng pe, tapi adi la aku erkeleng ate nandangi kalak si deban, sia-sia me aku. [54†]

³Bicara kusumbangken pe kerina erta-ertangku, janah bicara kukorbanken pe diringku seh mate guna ndatken kemegahen, tapi adi la aku erkeleng ate nandangi kalak si deban labo lit untungna man bangku.

⁴Kalak si erkeleng ate, ia arus megenggeng, mehuli, la percian, la meganjang ukur, la sombong.

⁵IA labo mekarus, la ncariken untung man bana saja, la pergelut, la ngkira kesalahen kalak.

⁶La meriah ukurna adi kalak erbahan si jahat, tapi ikut ermeriah ukur i bas si benar.

⁷Kalak si erkeleng ate ngasup nggengken kai-kai pe, tek maka lit si mehuli i bas kerinana, tetap erpengarapen dingen saber i bas kai-kai pe.

⁸Kekelengen la erkeri-kerin. Adi ernubuat masap kap; ngerana i bas erbage-bage cakap Kesah ngadi me, janah pemeteh pe masap nge.

⁹Sabap pemeteh ras nubuatta labo dem.

¹⁰Tapi kenca reh pagi si kuh dingen serta e, bene me si la kuh dingen la serta e.

¹¹Asum anak-anak denga aku, pengeranangku, perukurku, ras pengertinku bali ras anak-anak. Tapi kenca aku dewasa, kutadingken kerina biak anak-anak e.

¹²Kai siidah kita genduari enda bali ras awih si meremang-remang i bas cermin tembaga; tapi pagin kerina siidah alu petala-tala. Pemeteh si lit i bas aku genduari langa dem; tapi pagin pemetehku e jadi kuh dingen serta me, bali ras pemeteh Dibata kerna aku kuh dingen serta kap.

¹³Dage lit telu si tetap arus idalanken, e me: erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban.