Read Batak Karo 1 KORINTI 16 Bible Online

1 KORINTI 16 - Batak Karo bible

1 KORINTI 16

¹Kerna pepulung penampat guna perpulungen si i Judea, bahanlah bagi si kuaturken i bas perpulungen-perpulungen si lit i Galatia. [68†]

²Tep-tep wari Minggu sekalak-sekalak kam nerapken sada bagin i bas keuntungenndu, sue ras kengasupenndu. Pepulunglah e gelah asum aku reh pagi lanai man pepulungen.

³Kenca aku reh, kubereken pagi surat pengantar man kalak si enggo isetujuindu, jenari kalak enda isuruh maba pemerendu e ku Jerusalem.

⁴Janah adi penampatndu e cukup metunggung aku ikut naruhkenca ku jah, ras kami pagi berkat.

⁵Aku reh ndahi kam kenca kusiari Makedoni -- sabap ateku reh arah Makedoni. [69†]

⁶Ndekah sitik ateku ras kam, banci jadi kidekah musim mbergeh. Alu bage banci aku iperberkatndu guna nerusken perdalanenku, ntah ku ja gia pagi aku lawes.

⁷Ateku min i bas kerehenku ndahi kam ola aku singgah saja. Ngarap aku banci ndekah sitik ras kam, adi ibere Tuhan.

⁸Tapi seh ngayak wari Pentakosta i Epesus enda aku lebe. [70†] [71†]

⁹Sabap enggo talang pintun si mbelang man bangku guna ndahiken dahin si erguna, janah nterem pe si ngelawan.

¹⁰Adi reh Timotius, alo-alolah ia gelah ola metumbur iakapna, sabap ia pe erdahin guna Tuhan, bali ras aku. [72†]

¹¹Ola ise pe mekarus nandangi ia, tapi peberkatlah ia, gelah mejuah-juah ia i bas nerusken perdalanenna, maka banci ia mulihken ndahi aku. Sabap aku ngarapken kerehenna ras senina-senina si deban.

¹²Kerna seninanta Apolos, enggo piga-piga kali kupindoken gelah reh ia ndahi kam ras senina-senina si deban, tapi seh asa genduari la ia nggit. Tapi adi lit pagi kesempaten si mehuli tentu reh nge ia ndahi kam.

¹³Erjaga-jagalah! Tetaplah erkiniteken! Bagi dilakilah kam, dingen megenggenglah!

¹⁴Kasa kai si ilakokenndu bahanlah e alu ate keleng.

¹⁵Ietehndu kerna Istepanus ras isi jabuna; ia me kalak Kristen si tangtangna i propinsi Akaya, janah enggo iendeskenna dirina guna nampati anak-anak Dibata. Kupindoken man bandu o senina-seninangku. [73†]

¹⁶Patuhlah kam man kalak si bage, bage pe man kerina kalak si latih erdahin ras ia.

¹⁷Meriah ukurku kerna kerehen Istepanus, Portunet, ras Akaikus, sabap ia reh jadi gancihndu.

¹⁸Malem kal ateku ibahanna bagi malemna atendu ibahanna. Kalak si bagi enda patut iergaken.

¹⁹Perpulungen-perpulungen si i daerah Asia ngataken mejuah-juah man bandu. Akuila ras Persila bage pe perpulungen si pulung i rumahna ngataken man bandu mejuah-juah i bas Tuhan. [74†]

²⁰Kerina senina si sada kiniteken i jenda ngataken mejuah-juah man bandu. Sisalam-salamenlah kam alu dem keleng ate bagi si ersenina.

²¹Alu tanku jine kusuratken enda man bandu: Mejuah-juah i bas aku nari, Paulus.

²²Kalak si la erkeleng ate man Tuhan, kena sumpahlah ia! Maranatha -- Rehlah Kam o Tuhan kami.

²³Lias ate Tuhan Jesus ras kam kerina gelah.

²⁴Keleng ateku i bas Kristus Jesus ras kam kerina gelah.