Read Batak Karo 1 KORINTI 2 Bible Online

1 KORINTI 2 - Batak Karo bible

1 KORINTI 2

¹O senina-seninangku, asum reh aku nai ndahi kam meritaken rahasia kebenaren Dibata, labo kubeluh-beluhi ngerana ntah pe kupake pemeteh si meganjang.

²Sabap asum aku nai ras kam enggo kutetapken i bas ukurku maka kerina kulupaken seakatan Jesus Kristus, dingen kuga IA ipakuken seh mate i kayu persilang.

³E maka asum aku ndahi kam la aku megegeh dingen nggirgir erkiteken mbiar. [8†]

⁴Pengajaren ras berita si kusehken e labo rikutken kebeluhen ngerana, tapi alu ncidahken kuasa Kesah Dibata.

⁵Gelah kinitekenndu labo erpalasken kepentaren manusia, tapi erpalasken Kuasa Dibata.

⁶Amin bage gia, iberitaken kami nge berita kerna kepentaren man kalak si enggo dewasa kinitekenna. Tapi kepentaren e labo kepentaren jaman si genduari, ntah pe kepentaren penguasa i bas jaman si enda, kuasa-kuasa si nuju ku kemasapen.

⁷Kepentaren si iberitaken kami kepentaren Dibata si terbuni, si terligen man manusia, si enggo itetapken Dibata guna kemulianta ope denga doni enda ijadiken.

⁸Penguasa i doni enda sekalak pe la meteh kepentaren e. Sabap adi ietehna, labo min ndai ipakukenna ku kayu persilang Tuhan si mada kemulian e.

⁹Tapi lit tersurat i bas Pustaka Si Badia, “Kai si langa pernah iidah ntah pe ibegi manusia, kai si langa pernah iukuri manusia, e kal me si enggo isikapken Dibata man kalak si erkeleng ate man baNa.” [9†]

¹⁰E me kerina si enggo ipetangkas Dibata man banta arah KesahNa. Kesah e ipepayona kai pe, terus ku biak Dibata si terbuni kal pe.

¹¹Bagi manusia, pusuh si lit i bas ia e ngenca si meteh kerina kerna ia, bage me pe kerna Dibata, Kesah Dibata e nge ngenca metehsa kerina kerna Dibata.

¹²Si ialoken kita labo biak doni enda, tapi Kesah si i bas Dibata nari, gelah sieteh kerina pemere Dibata man banta.

¹³Dage asum iterangken kami kebenaren pertendin man kalak si enggo dewasa kegeluhen pertendinna labo kami ngerana alu kata-kata si iajarken kepentaren manusia, tapi alu kata-kata si iajarken Kesah Dibata.

¹⁴Tapi kalak si la lit i bas ia Kesah Dibata, labo ngaloken kasa kai si asalna i bas Kesah Dibata nari. La ia ngasup ngangkasa, janah si lang-lang nge e iakapna, sabap arah cara pertendin nge ngenca maka si e banci iergai.

¹⁵Kalak si enggo dewasa kegeluhen pertendinna, ngasup ia ertimbang kerna kai pe, tapi la lit kalak si ngasup ertimbang kerna ia.

¹⁶Bagi lit tersurat i bas Pustaka Si Badia, “Ise kin meteh perukuren Tuhan? Ise kin ngasup ngajarken IA?” Tapi i bas kita lit kap perukuren Kristus. [10†]