Read Batak Karo 1 KORINTI 3 Bible Online

1 KORINTI 3 - Batak Karo bible

1 KORINTI 3

¹O senina-seninangku, sanga si e aku labo banci ngerana man bandu bagi pengeranangku nandangi kalak si enggo dewasa kegeluhen pertendinna. Aku arus ngerana man bandu bagi man kalak si nggeluh rikutken biak doni, man kalak si medanak denga kinitekenna man Kristus.

²La banci lang susu kubereken inemenndu, labo nakan keras kubereken man bandu, sabap langa kam ngasup ngalokenca. Janah genduari pe langa kam ngasup ngalokenca. [11†]

³Sabap kam nggeluh rikutken biak doni denga. Adi sician-cianen kam janah turah perubaten i tengah-tengahndu, ma kin enda biak doni? Ma kin perbahanenndu e bali ka nge ras kalak si deban?

⁴Adi lit si ngatakenca, “Aku arah Paulus,” janah lit ka si ngatakenca, “Aku arah Apolos,” ma la lit kelebihenndu asa manusia si deban? [12†]

⁵Ise kin Apolos? Ise kin Paulus? Kami enda pelayan Dibata kap ngenca, si negu-negu kam gelah erkiniteken. Sekalak-sekalak kami ndahiken dahin rikutken si ibereken Tuhan man kami.

⁶Aku nuanca, Apolos niramsa; tapi Dibata si erbahanca turah. [13†]

⁷Si nuanca ras si niramsa labo penting, tapi si penting e me Dibata, sabap ia nge si peturahsa.

⁸Si nuanca ras si niramsa sada aron kap; tapi sekalak-sekalak ibereken Dibata me upahna rikutken pendahinna sekalak-sekalak.

⁹Sabap kami sada aron kap ndahiken dahin Dibata, janah kam me jumaNa. Kam pe bangunen Dibata kap.

¹⁰Rikutken pemere si ibereken Dibata man bangku, enggo kupajekken palas bangunen selaku pande si beluh, jenari kalak si deban mbangunca i babo palas e. Tapi sekalak-sekalak arus metenget kuga ia mbangunca.

¹¹Sabap la lit palas si deban si banci ipajekken seakatan palas si enggo pajek e, e me Jesus Kristus.

¹²Ntah kalak mpergunaken emas, ntah pirak, ntah batu permata i bas ia majekken i babo palas e; ntah ka pe mpergunaken kayu, ntah dukut-dukut, ntah nggala.

¹³Jadi tangkas me pagi pendahinna sekalak-sekalak i bas wari kerehen Kristus. Sabap i bas wari e pagi ipetangkas api me pendahin sekalak-sekalak; iuji dingen icidahken api e pagi uga kin si tuhuna pendahin sekalak-sekalak.

¹⁴Adi pendahin kalak i bas ia majekken e tahan api, ialokenna me pagi upahna.

¹⁵Tapi adi meseng pendahinna e rugi me ia i bas upah; tapi ia iselamatken nge, bagi kalak si pulah i bas api nari.

¹⁶Ma ietehndu kin maka kam me Rumah Pertoton Dibata dingen Kesah Dibata ringan i bas kam? [14†]

¹⁷Adi ikernepken kalak Rumah Pertoton Dibata, ikernepken Dibata me kalak e. Sabap Rumah Pertoton Dibata badia kap, janah kam me rumahNa e.

¹⁸Ola ise pe nipu bana. Adi lit i tengah-tengahndu kalak si erpengakap maka ia pentar rikutken doni enda, arus min ia jadi bodoh lebe, gelah tuhu-tuhu ia pentar.

¹⁹Sabap kepentaren doni enda kebodohen i lebe-lebe Dibata. Bagi lit tersurat i bas Pustaka Si Badia, “Isidingi Dibata me kalak pentar alu kebeluhenna jine.” [15†]

²⁰Lit ka pe tersurat, “Ieteh Tuhan maka sia-sia nge perukuren kalak si pentar e.” [16†]

²¹E maka ola ise pe meganjang ukurna kerna kengasupen manusia si tuhuna kerina kap sikerajangenndu:

²²Paulus, Apolos, ras Petrus; doni enda, kegeluhen ras kematen, si genduari ras si pagin; kerina si enda sikerajangenndu:

²³janah kam sikerajangen Kristus, janah Kristus sikerajangen Dibata.