Read Batak Karo 1 KORINTI 4 Bible Online

1 KORINTI 4 - Batak Karo bible

1 KORINTI 4

¹Arus min iakuindu maka kami enda kap suruh-suruhen Kristus dingen pengurus erta-erta Tuhan si ertanggung jawab kerna rahasia Dibata.

²Sekalak pengurus arus teridah maka ia kalak si terteki kap. Enda me si la banci lang i bas sekalak pengurus.

³Soal kitik nge kuakap e adi aku iperiksandu tah iadili kalak si deban. Janah aku jine pe labo kuperiksa bangku.

⁴Sabap bersih pusuh peratenku; tapi labo e ngatakenca maka aku la ersalah. Tuhan me pagi si meriksa aku.

⁵E maka ola biasaken ngukum kalak ope denga seh paksana, tapi timailah ngayak reh Tuhan. Iterangina me pagi rahasia-rahasia si gelap denga, janah ipetangkasna isi pusuh peraten manusia si terbuni. Kenca bage maka sekalak-sekalak ngaloken pujin i bas Dibata nari sue ras si patut ialokenna.

⁶Kerina si enggo kukataken e, o senina-senina, e me kap kerna aku ras Apolos. Tujunku e me kap gelah erlajar kam i bas kami, maka ola ilanggarndu batas-batas si tersurat i bas Pustaka Si Badia, e me kap gelah ola meganjang ukurndu jenari iangkatkenndu sekalak tapi iperjakndu si deban.

⁷Ise kin erbahanca kam lebihen asa kalak si deban o seninangku? Ma kin kerina si lit i bas kam e pemere Dibata nge? Adi pemere nge e, ngkai dage maka meganjang ukurndu, tempa-tempa si lit i bas kam e labo pemere?

⁸Enggo tuhu cukup kerina si iperlukenndu! Enggo tuhu bayak kam! Enggo tuhu jadi raja kam; kami lang! Jadi raja lah gia min kam kerina pe, gelah banci kam jadi raja ras kam.

⁹Sabap rikutken pengakapku, maka man kami rasul-rasul enda enggo itentuken Dibata ingan kami i bas barisen si arah pudina kal, bali ras kalak si iukum mate, gelah jadi tontonen kerina si nasa lit, malekat-malekat ras manusia.

¹⁰Kami tuhu kalak bodoh erkiteken Kristus; tapi kam kalak Kristen si beluh! Kami kote, tapi kam megegeh! Kami ihina, tapi kam ipehaga!

¹¹Seh ku bas paksa enda pe muas dingen kelihen kami; uis kami pe si leket i bas daging kami e ngenca; kasar perbahanen kalak man kami; la lit ingan kami si tetap.

¹²Latih kami erdahin alu tan kami guna encariken keperlun kami. Adi isumpahi kalak kami, ipasu-pasu kami ia; adi isiksa kalak kami, megenggeng kami. [17†]

¹³Adi igombang-gombangi kalak kami, mehuli pengaloi kami man bana. Perbahan kalak man kami bali ras perbahanenna nandangi sampah doni enda; seh ku bas paksa enda kami me kalak si la terpakena i bas pengidah manusia.

¹⁴Si enda kusuratken man bandu labo gelah mela iakapndu, tapi guna ngajarken kam sabap kam anak-anakku si kukelengi.

¹⁵Sabap bicara lit gia sepuluh ribu kalak gurundu selaku kam kalak Kristen, bapandu labo mbue. I bas kegeluhenndu selaku kalak Kristen aku me bapandu, sabap aku nge si maba Berita Si Meriah man bandu.

¹⁶Dage kupindoken man bandu: Usihlah aku. [18†]

¹⁷Guna si e me maka kusuruh Timotius ndahi kam. I bas kiniteken man Tuhan ia me anakku si kukelengi dingen si setia. Ia me si mpersingeti kam kerna dalan kegeluhenku si kudalanken i bas Kristus Jesus, dingen e me pe si kuajarken i bas kerina perpulungen i japa pe.

¹⁸Tapi lit piga-piga kalak i bas kam enggo meganjang ukurna sabap iakapna labo aku reh ndahi kam.

¹⁹Tapi lanai ndekahsa reh nge aku ndahi kam adi bagelah peraten Tuhan. Jenari kupepayo me kalak si meganjang rukur e, labo cakapna tapi gegehna nge si kupepayo.

²⁰Sabap Kinirajan Dibata labo soal cakap, tapi soal gegeh.

²¹Kuga dage atendu? Reh atendu aku alu maba perpalu, ntah alu keleng ate dingen mesayang?