Read Batak Karo 1 KORINTI 6 Bible Online

1 KORINTI 6 - Batak Karo bible

1 KORINTI 6

¹Adi sekalak i bas kam lit perkarana ras seninana, ngkai maka ia pang ngadu man hakim si la nandai Tuhan? Engkai maka la ipindona kalak si nandai Tuhan ndungi perkarana e?

²La kin ietehndu maka anak-anak Dibata nge pagi ngadili doni enda? Dage adi ikut kam ngadili doni enda, ma kin ngasup nge pe kam ngadili perkara si kitik?

³La kin ietehndu maka kita nge pagi ngadili malekat-malekat? Apai denga ka kerna persoalen-persoalen i bas kegeluhen si tep-tep wari enda!

⁴Adi turah persoalen si bagenda, ngkai maka kam ngadu man kalak si sitik pe la meherga iakap perpulungen?

⁵Kukataken enda gelah mela iakapndu! La kin lit sekalaklah gia i tengah-tengahndu si pentar, si ngasup ngadili perkara kalak Kristen e?

⁶Sabap teridah maka kalak Kristen si adun ia sapih-sapih ia, janah kalak si la erkiniteken ngadili perkarana e!

⁷Si tuhuna, alu litna perubaten-perubaten i tengah-tengahndu teridah maka kam tuhu-tuhu enggo talu. Ma ulin kam kena perbahanen si la adil? Ma ulin kam kena tipu?

⁸Tapi teridah maka kam erbahan si la adil sapih-sapih kam, janah sitipu-tipun kam, aminna pe kam sapih-sapih Kristen!

⁹Tentu enggo ietehndu maka kalak si la adil la dat bagin i bas Kinirajan Dibata. Ola tipu bandu. Kalak si erlagu la mehuli, ntah si nembah berhala, ntah perlua-lua, ntah erlagu la mehuli sapih-sapih dilaki.

¹⁰Ntah penangko, ntah si rangap, ntah pemabuk, ntah pengisak-ngisak, ntah tukang kompas -- sada pe la dat bagin i bas Kinirajan Dibata.

¹¹Nai lit piga-piga kalak i bas kam si bage. Tapi genduari kam enggo ibersihken i bas dosa-dosandu nari. Kam enggo iserapken jadi sikerajangen Dibata. Kam enggo iperembakken ras Dibata arah gelar Tuhan Jesus Kristus dingen arah Kesah Dibatanta.

¹²Banci jadi lit si ngatakenca, “Bebas kap aku ngelakoken kai pe.” Payo nge min, tapi labo kerina erguna. Aku pe banci nge kukataken, “Bebas kap aku ngelakoken kai pe,” tapi la kupelepas kai pe ngkuasai aku. [24†]

¹³Banci ka nina kalak tole, “Pangan ma guna beltek nge, janah beltek ma guna pangan?” Payo nge katana e, tapi duana pagi imasapken Dibata! Labo tuhu maka kula manusia guna erlagu la mehuli, tapi guna Tuhan; janah Tuhan guna kula.

¹⁴Dibata enggo mpekeke Tuhan i bas si mate nari, janah kita pe ipekekeNa nge pagi alu kuasaNa.

¹⁵La kin ietehndu maka kulandu e me ringring Kristus? Banci kin kubuat ringring Kristus e jenari kubahan e jadi ringring diberu si pendahinna erlua-lua? Tentu lang!

¹⁶Ntah la kin ietehndu maka kalak si ersada kula ras diberu si pendahinna erlua-lua enggo ia jadi sada kula rassa? Kerna si enda tangkas i bas Pustaka Si Badia, nina, “Si dua kalak e jadi sada kula.” [25†]

¹⁷Tapi kalak si mpersadaken dirina ras Tuhan, enggo ia jadi sada ras Tuhan secara pertendin.

¹⁸E maka silahkenlah perbahanen erlagu la mehuli. Banci ka pe nina kalak, “Kasa kai dosa si ilakoken kalak labo mpengaruhi kulana.” Tapi e labo payo, sabap kalak si erlua-lua erdosa ia nandangi kulana.

¹⁹La kin ietehndu maka kulandu e me Rumah Pertoton Kesah Si Badia, si ringan i bas kam dingen si ibereken Dibata man bandu? Dirindu e labo kam empuna. [26†]

²⁰Sabap kam enggo itukur Dibata meherga kal. Dage muliakenlah Dibata arah kulandu.