Read Batak Karo 1 KORINTI 8 Bible Online

1 KORINTI 8 - Batak Karo bible

1 KORINTI 8

¹Genduari kerna pangan si ipersembahken man berhala. Tuhu me bagi si ikataken kalak maka “kerina kita erpemeteh”. Amin bage gia, pemeteh erbahanca kalak meganjang ukur, tapi kekelengen pehuliken kap.

²Kalak si erpengakap maka i bas ia lit pemeteh, si tuhuna labo lit i bas ia pemeteh si arusna kin ietehna.

³Tapi kalak si erkeleng ate man Dibata itandai Dibata kap ia.

⁴Kerna pangan si ipersembahken man berhala; bagi si ikatakenndu, “Sieteh maka berhala-berhala si tuhuna kal labo lit i doni enda.” Sieteh ka pe maka, “La lit Dibata seakatan Dibata si Sada e.”

⁵Aminna lit gia igelari dibata-dibata, subuk i langit bage pe i doni enda, janah aminna melala pe “dibata-dibata” dingen “tuhan-tuhan” e.

⁶Tapi man banta sada ngenca Dibata, e me Bapanta. I bas IA nari me rehna kerina si nasa lit, janah kempak IA me pe perlawesta. Janah sada ngenca Tuhan, e me Jesus Kristus. Arah IA me kerina si nasa lit ijadiken, dingen arah IA kita nggeluh.

⁷Tapi labo kerina kalak meteh kerna si enda. Lit kalak si gelgel e biasa erbahan persembahen man berhala; e maka seh i bas paksa si genduari enda pe adi ipanna pangan si enggo ipersembahken man berhala e, iakapna maka pangan e tuhu-tuhu enggo berhalaan. Janah erkiteken ukurna la tetap, pusuh peratenna ngataken maka ia enggo melket.

⁸Si tuhuna pangan labo maba kita reh deherna ras Dibata. Bicara la pe sipan labo lit ruginta; bicara sipan pe labo lit untungta.

⁹Tapi metengetlah, gelah ola min kebebasanndu e erbahanca maka guling kalak si merampek kinitekenna.

¹⁰Sabap adi kalak si bage ngidah kam “si erpemeteh” man i bas ingan berhala, ma kin si enda erbahanca reh pangna ia man pangan si iakapna berhalaan?

¹¹Alu bage kalak si merampek kinitekenna bene erkiteken “pemetehndu” e, sedangken Kristus mate man guna seninandu si bage.

¹²I bas si enda erdosa kam man Kristus alu erbahan dosa man seninandu e, sabap ilukaindu pusuh peratenna.

¹³E maka adi pangan kin erbahanca seninangku erdosa, asa ndigan pe lanai kupan pangan e, aminna pe e daging, gelah seninangku e ola ndabuh ku bas dosa arah pengelakongku.