Read Batak Karo 1 KORINTI 9 Bible Online

1 KORINTI 9 - Batak Karo bible

1 KORINTI 9

¹Ma bebas kin aku? Ma rasul kin aku? Ma enggo kin pernah kuidah Jesus Tuhanta? Ma kin kam nge bekas dahinku i bas Tuhan?

²Amin la gia iakui kalak si deban aku rasul, kam tentu iakuindu nge! Kam me desken materai si mbuktiken maka aku sekalak rasul, erkiteken kam nggeluh i bas Tuhan.

³Adi iorati kalak kerna kinirasulenku, bagenda me ningku mbela diringku:

⁴Ma kin lit hakku ngaloken pangan ras inemen erkiteken dahinku?

⁵Ma kin lit hakku maba sekalak ndehara si enggo Kristen i bas perdalanenku bali ras si ibahan rasul-rasul si deban? Ma bage pe si ibahan Petrus ras senina-senina Tuhan?

⁶Ntah kin Barnabas ras aku saja ngenca arus ncariken keperlun kami jine?

⁷Lit kin perajurit si ikut erperang alu biayana jine? Lit kin perjuma si la man buah anggur si isuanna i bas kebun anggurna? Lit kin permakan si la kenan susu asuh-asuhenna?

⁸Tuhu maka kerina si kuturiken enda umpama-umpama i bas manusia; tapi ma kin bage ka nge si ikataken i bas Undang-undang Musa?

⁹I bas Undang-undang e lit tersurat, “Ola tutupi babah lembu si sangana ipake ngerik.” IAkapndu lembu kin si iperdiateken Dibata? [28†]

¹⁰Ma kin enda si tuhuna kerna kita nge si ikatakenna e? Tentu si e isuratken guna kita. Kalak si nenggala bage pe kalak si ngerik arus ndahiken dahinna i bas pengarapen ndatken baginna i bas peranin e nari.

¹¹Enggo isuanken kami benih pertendin i bas kegeluhenndu. Mbelinca kin e adi iperani kami barang doni i bas kam nari? [29†]

¹²Adi kalak si deban lit hakna ngarapken si enda i bas kam nari, ma kin beliden pe hak kami? Amin bage gia, hak kami e la ipake kami. Tapi ulin iakap kami nggengken latih erdahin asangken terhalang perdalanen Berita Si Meriah kerna Kristus e.

¹³Tentu enggo ietehndu maka kalak si erdahin i bas Rumah Pertoton ngaloken pangan i bas Rumah Pertoton e nari, janah kalak si mpersembahken persembahen tutungen dat bagin i bas persembahen e nari. [30†]

¹⁴Bage me pe enggo itetapken Tuhan maka kalak si meritaken Berita Si Meriah ngaloken keperlun geluhna i bas dahinna e nari. [31†]

¹⁵Tapi sada pe labo kupake hakku enda, janah i bas aku erbahan surat enda pe labo ateku nuntut hakku e. Sabap ulin aku mate asangken bene kai si kumegahken e.

¹⁶Si tuhuna labo lit hakku ermegah i bas meritaken Berita Si Meriah e, sabap terpaksa kap aku. Janah cilaka kal aku adi la kin kuberitaken Berita Si Meriah e.

¹⁷Adi aku jine min ndai milih dahin e, banci nge aku ngarapken upah. Tapi adi dahin meritaken Berita Si Meriah e sada kearusen man bangku, janah e sada tanggung jawab si iendesken Dibata.

¹⁸Kai dage upahku? Upahku e me kap: meritaken Berita Si Meriah alu la ngarapken upah. La kutuntut hakku i bas dahinku meritaken Berita Si Meriah e.

¹⁹Aku bebas nge; aku labo budak ise pe. Tapi kujadiken diringku jadi budak nandangi kerina jelma gelah banci nterem kalak dat aku guna Kristus.

²⁰Nandangi kalak Jahudi bagi kalak Jahudi aku guna ndatken kalak Jahudi. Bagi ia patuh man Undang-undang Musa, aku pe patuh man Undang-undang e, gelah banci ia dat aku, aminna pe aku labo i teruh Undang-undang e.

²¹Bage me pe nandangi kalak si la lit i bas ia Undang-undang Musa, bagi ia e ka aku, gelah banci ia dat aku. Si enda labo nuduhken maka la aku i teruh Undang-undang Dibata, sabap si tuhuna aku i teruh Undang-undang Kristus.

²²Nandangi kalak si merampek kinitekenna, bagi ia e ka aku, gelah kudat ia. Aku enggo jadi bali ras kerina kalak rikutken paksana gelah banci deba-deba ia kuselamatken alu kerina dalan si payo.

²³Si enda kerina kubahan guna Berita Si Meriah, gelah aku pe dat bagin subuk i bas dahin bage pe i bas pasu-pasu Berita Si Meriah e.

²⁴Tentu ietehndu maka kalak si erlumba kiam i bas sada perlumban, kerina ia kiam, tapi sekalak ngenca si dat pemere. E maka empetlah kiam gelah kam menang.

²⁵Kerina kalak si ikut i bas perlumban e arus ia lebe ngikuti latihen si mberat. Si enda idalankenna guna ndatken rudang-rudang tanda kemenangen si ermasap-masap; tapi kita sidalanken e guna ndatken rudang-rudang si tahan seh rasa lalap.

²⁶E me sabapna maka pinter aku kiam ku garis batas. Janah bali ras sekalak si jago ertinju, la aku nggit ninju angin.

²⁷Kupekpeki badanku seh batu-batun, seh maka kukuasai tuhu-tuhu, gelah ola pagi aku itulak kenca kudilo kalak si deban ku perlumban e.