Read Batak Karo 2 KORINTI 4 Bible Online

2 KORINTI 4 - Batak Karo bible

2 KORINTI 4

¹Erkiteken pendahin kami e erpalasken perkuah ate Dibata, e maka la kami erleja-leja.

²Enggo itulak kami kerina perbahanen si erbuni-buni si erbahanca mela iakap kami. Kami labo nggeluh nipui, bage pe labo iputar balikken kami Kata Dibata. Tapi kebenaren si icidahken kami e jadi sada pujin kerna diri kami gelah kami ialoken kerina pusuh peraten manusia i adep-adepen Dibata.

³Janah adi kin Berita Si Meriah si iberitaken kami e tertutup denga man kalak, e tertutup man kalak si perlawesna kempak kebenen nge ngenca.

⁴Kalak e kalak si la tek, si ukurna enggo ipepentang dibata palsu jaman enda. La ipelepasna kalak e ngidah terang sinalsal erpagi-pagi si sangana mbincar man bana. Terang e, e me Berita Si Meriah si encidahken kemulian Kristus si segambar ras Dibata.

⁵Labo kerna diri kami si iberitaken kami, tapi kerna Jesus Kristus selaku Tuhan, janah kami enda budakndu erkiteken Jesus.

⁶Dibata kap si ngataken, “Ersinalsallah terang i bas gelap nari.” IA me pe Dibata si erbahanca terang e ersinalsal i bas pusuhta, gelah jelas man banta pemeteh kerna kemulian Dibata si teridah i bas ayo Kristus. [10†]

⁷Kami si jadi ingan nimpan erta-erta pertendin e, desken kudin taneh saja ngenca, gelah teridah maka gegeh si mbelin e i bas Dibata nari kap, labo i bas kami nari.

⁸Arah apai pe kami itindih, tapi la kami meripuk. Bingung kami, tapi la seh putus asa.

⁹IAyak-ayak musuh kami, tapi la kami itadingken Dibata. Idampesken kalak kami, tapi la seh getem.

¹⁰Kiniseran Jesus si maba kematen lalap ipersan kami jadi baban kula kami, gelah kegeluhenNa pe jadi tangkas i bas kula kami.

¹¹I bas gedang-gedang geluh kami, lalap kami iendesken kempak kematen erkiteken Jesus, gelah kegeluhenNa banci tangkas ia bas kula kami si ermasap-masap enda.

¹²Dage kematen e erdahin i bas kami, tapi kegeluhen erdahin i bas kam.

¹³I bas Pustaka Si Badia lit tersurat, “Erkiteken aku tek, e maka aku ngerana.” Erkiteken perukuren kami i bas erkiniteken bali ras si enda, e maka kami ngerana, erkiteken kami tek. [11†]

¹⁴Ieteh kami maka Dibata si enggo mpekeke Tuhan Jesus i bas si mate nari, mpekeke kita ka pe pagin ras Jesus, jenari ibabaNa kita ku lebe-lebe Dibata.

¹⁵Kerina si enda man gunandu kap. Janah erkiteken reh teremna rusur kalak si ngaloken lias ate Dibata, reh sampurna ka pe isehken pengataken bujur man Dibata; alu bage Dibata imuliaken.

¹⁶Enda me sabapna maka la kami erleja-leja dingen la lesek ate kami. Aminna pe kula kami enda reh burukna reh dekahna, tapi ukur kami tep-tep wari ipelimbarui.

¹⁷Janah kiniseran si genduari e menahang nge dingen labo ndekah, janah ulihna e me kemulian si rasa lalap si la terturiken beratna ertimbangken kiniseran si menahang e.

¹⁸Sabap kami labo natap kempak si teridah, tapi kempak si la teridah. Sabap si teridah kentisik nge ngenca; tapi kai si la teridah tetap seh rasa lalap.