Read Batak Karo 2 KORINTI 5 Bible Online

2 KORINTI 5 - Batak Karo bible

2 KORINTI 5

¹Sabap ieteh kami maka adi kemah si jadi rumahta i doni enda e me kulanta enda, itangtangi, lit kap rumahta i Surga, si tahan rasa lalap, la bekas tan manusia, tapi bekas Dibata erbahan.

²Kidekah kita ringan i bas kemah enda, kelsehen kita, sabap metedeh kal ateta make rumahta si asalna i Surga nari e i babo kemahta si genduari e.

³Alu make rumah e, la kap kita ketunduken manjang-anjang.

⁴Kidekah kita ringan i bas kemah si i doni enda, kelsehen kita erkiteken bage beratna babanta. Labo perban ateta nangtangi si male e, tapi sura-suranta e me makeken si mbaru i babona, gelah si ermasap-masap e itelen kegeluhen.

⁵Dibata nge si nikapken kita guna si e, janah selaku jaminenna, Dibata enggo mereken KesahNa man banta.

⁶E maka tetap kami pang ngalaken kematen. Ieteh kami maka kidekah kami i bas rumah enda, e me kula enda, kami langa serumahen ras Tuhan. --

⁷Sabap kami nggeluh erpalasken kiniteken, labo erpalasken kai si teridah. --

⁸Sitik kal pe labo kami mbiar, janah pangen kal kami nadingken kula enda gelah banci kami serumahen ras Tuhan.

⁹Tapi lebih asa si e, perayaken kami e me kap ndarami uga maka ngena ateNa, subuk i bas rumah kami si i jenda tah pe i jah.

¹⁰Sabap kerina kita la banci lang ngadap ku lebe-lebe Kristus guna iadiliNa, gelah sekalak-sekalak ngaloken kai si patut ialokenna rikutken kai si enggo ibahanna arah kulana paksa ia nggeluh, subuk perbahanen si mehuli ntah si jahat. [12†]

¹¹Ieteh kami kai ertina erkemalangen man Tuhan, e maka iusahaken kami alu meseksek gelah tek kalak. Perukuren kami tangkas kap man Dibata, janah ngarap pe aku maka pusuh peratenndu enggo tangkas nandai perukurenku.

¹²Labo ate kami mujiken diri kami ka i lebe-lebendu. Saja ngenca isehken kami man bandu alasen si mehuli gelah megah iakapndu kerna kami, gelah lit i bas kam bekal guna ngelawan kalak si megah iakapna kerna kai si teridah saja, tapi la ia ngenehen ku bas pusuh.

¹³Adi tuhu kin kami adon, guna Dibata kap e. Janah adi jore ukur kami, man gunandu kap e.

¹⁴Erkiteken kekelengen Kristus ngkuasai kami nge maka enggo kami seh ku bas sada pengertin, e me: sekalak Manusia enggo mate guna kerina manusia. Enda ertina maka kerina manusia e enggo mate.

¹⁵IA mate guna kerina manusia, gelah kalak si nggeluh lanai nggeluh erbana-bana, tapi guna IA si enggo mate dingen si enggo ipekeke Dibata i bas si mate nari.

¹⁶Dage genduari pengerganta nandangi sekalak manusia lanai bo rikutken pertimbangen manusia. Aminna gia nai pengerganta nandangi Kristus e rikutken pertimbangen manusia, tapi genduari lanai bage sibahan.

¹⁷Adi kalak ersada ras Kristus, ia me tinepa si mbaru, si male enggo lepas janah nehenlah, si mbaru enggo reh.

¹⁸Kerina si enda Dibata erbahanca, maka arah Kristus, kita si gelgel nari ermusuhen ras IA, enggo ibahanNa jadi temanNa. Janah man kami iberekenNa dahin guna njadiken musuhNa jadi temanNa.

¹⁹Alu kata si deban: Dibata enggo nai reh i bas Kristus; enggo ijadikenNa manusia jadi teman Dibata. Dibata la mperkiraken kelepaken manusia. Janah man kami enggo iendeskenNa Berita perdamen e.

²⁰Dage kami enda me utusen-utusen Kristus, bali ras Dibata jine si mindo man bandu arah kami. I bas gelar Kristus ipindo kami alu mesangat man bandu: bere min maka kam si gelgel nari ermusuhen ras Dibata banci ibahan Dibata jadi temanNa!

²¹Aminna pe Kristus la erdosa, enggo ibahan Dibata maka IA si mersan dosa-dosanta, gelah i bas persadan ras Kristus kita irembakken mulihken ras Dibata.