Read Batak Karo 2 KORINTI 7 Bible Online

2 KORINTI 7 - Batak Karo bible

2 KORINTI 7

¹Kerina padan enda ibahan Dibata man banta, o teman-temanku. E maka sibersihkenlah banta i bas kerina sierbahanca kula ras tendinta meluat. Kita enggo khusus jadi sikerajangen Dibata; sibahanlah e jadi serta alu erkemalangen man baNa.

²Alokenlah kami i bas pusuh peratenndu. La pernah ibahan kami salah man ise pe. La pernah ise pe irugiken kami. La pernah ise pe iperalat kami guna keuntungen kami.

³Si enda kukataken labo guna nalahken kam; sabap bagi si enggo kukataken ndai, maka kam enggo ialoken kami i bas pusuh kami seh maka kita tetap ersada, subuk mate ntah nggeluh.

⁴Tek kal aku nandangi kam janah megah kal kuakap kerna kam. Keriahen kami ngelebihi kerina kiniseran kami, e maka terapul kal aku.

⁵Kenca kami seh pe i Makedoni labo lit ketenengen i bas kami. Arah dampar si apai pe kami ikenai kiniseran: arah dampar si arah darat, perubaten; arah dampar si arah bas, aru ate. [18†]

⁶Tapi Dibata, si ngapuli kalak si lit i bas kepiceten ukur, enggo ngapuli kami alu kerehen Titus.

⁷Labo saja alu kerehenna, tapi pe alu berita si ibabana maka kam enggo mpegegehi ia. Iturikenna kerna uga tedehna atendu aku, uga erkadiolana kam, janah uga gegehna kam mbela aku. Erkiteken si e reh tambahna keriahenku.

⁸Aminna pe menek atendu ibahan suratku e, labo aku erkadiola. Tuhu kentisik erkadiola aku sabap kuidah maka menek atendu erkiteken suratku e.

⁹Tapi genduari meriah ukurku -- labo erkiteken menek atendu, tapi erkiteken menek atendu e erbahanca kam jera. Menek atendu e sue kap ras peraten Dibata, seh maka la kam sitik pe irugiken kami.

¹⁰Menek ate si sue ras peraten Dibata erbahan kalak jera kap, gelah ia selamat; janah kerna si e la perlu kalak erkadiola. Tapi menek ate si pelin-pelin erkiteken soal doni enda mabai ku kematen kap.

¹¹Nehenlah! Uga ulina menek atendu si sue ras peraten Dibata e: genduari enggo tutus atendu encidahkenca maka pengadun kerna kam lanai tuhu. Nembeh kal atendu man kalak si ngguluti e. Mbiar kam, tedeh atendu. Ergiah-giah ukurndu ndalanken si bujur. Enggo icidahkenndu maka i bas kerina persoalen e la kam ersalah.

¹²Dage, amin kubahan pe surat e, si pentingna labo erkiteken kalak si ersalah e, ntah pe kalak si isalahken e. Tapi surat e kubahan gelah teridah man bandu kuga tutusna atendu mperdiateken kami i lebe-lebe Dibata.

¹³Si enda me erbahanca maka malem kal ate kami. Labo saja malem ate kami, tapi pe sampur keriahen kami ngidah uga riahna ukur Titus, erkiteken kerina kam enggo pesalangken ukurna.

¹⁴Nai kupujiken kam i lebe-lebena, janah la aku kemalun ibahanndu. Bagi kerina si ikataken kami man bandu tuhu kap, bage pe kai si ipujiken kami i lebe-lebe Titus enggo teridah maka e tuhu kap.

¹⁵E maka genduari reh sampurna atena keleng nandangi kam, nginget kepatuhenndu man bana, janah nginget kuga nai kam ngaloken ia alu mehamat dingen erkemalangen man bana.

¹⁶E maka meriah ukurku sabap banci kam kupenalem tuhu-tuhu.